 "Virat Kohli Absence : ഒരു കൈയബദ്ധം! വിരാട് കോലി മാറി നിൽക്കുന്നതിന്റെ കാരണം താൻ പറഞ്ഞതല്ലയെന്ന് ഡിവില്ലിയേഴ്സ്")
)
Virat Kohli Absence Real Reason : ഇംഗ്ലണ്ടിനെതിരെയുള്ള ടെസ്റ്റ് പരമ്പരയിൽ നിന്നും ഇന്ത്യൻ സൂപ്പർ താരം വിരാട് കോലി വിട്ട് നിൽക്കുന്നതിന്റെ കാരണം കഴിഞ്ഞ ദിവസം മുൻ ദക്ഷിണാഫ്രിക്കൻ ക്രിക്കറ്റ് ടീം ക്യാപ്റ്റൻ എ ബി ഡിവില്ലിയേഴ്സ് വെളിപ്പെടുത്തിയിരുന്നു. വിരാട് കോലിയും ഭാര്യയും നടിയുമായ അനുഷ്ക ശർമയും രണ്ടാമതൊരു കുഞ്ഞിനായി കാത്തിരിക്കുകയാണ്. ഇതെ തുടർന്ന് കോലി ഇന്ത്യൻ ടീമിൽ നിന്നും വിട്ട് നിൽക്കുന്നതെന്നായിരുന്നു മുൻ ആർസിബി താരം തന്റെ യുട്യൂബ് ചാനലിലൂടെ വെളിപ്പെടുത്തിയത്. കുടുംബത്തിന് പ്രഥമ പരിഗണന നൽകുന്ന വിരാട് കോലിയെ ഡിവില്ലിയേഴ്സ് തന്റെ വീഡിയോയിൽ അഭിനന്ദിക്കുകയും ചെയ്തിരുന്നു.
എന്നാൽ താൻ പറഞ്ഞ കാര്യം തെറ്റാണെന്ന് അറിയിച്ചുകൊണ്ട് ഡിവില്ലിയേഴ്സ് വീണ്ടും രംഗത്തെത്തിയിരിക്കുകയാണ്. കോലിയുടെ സ്വകാര്യ ജീവിതത്തെ കുറിച്ച് താൻ നൽകിയത് തെറ്റായ ഒരു വിവരമാണെന്ന് അറിയിച്ച മുൻ ദക്ഷിണാഫ്രിക്കൻ താരം ഖേദം പ്രകടിപ്പിക്കുകയും ചെയ്തു. ഇരുവരും രണ്ടാമത്തെ കുട്ടിക്കായി കാത്തിരിക്കുന്ന എന്ന പ്രസ്താവനയാണ് ഡിവില്ലിയേഴ്സ് ഇപ്പോൾ തിരുത്തിയിരിക്കുന്നത്.
"എന്റെ യുട്യൂബിൽ ഞാൻ പറഞ്ഞത് പോലെ തീർച്ചയായിട്ടും കുടുംബത്തിനാണ് ആദ്യ പരിഗണന നൽകേണ്ടത്. അതോടൊപ്പം ഞാൻ വലിയ ഒരു തെറ്റും ചെയ്തു, സത്യമല്ലാത്ത ഒരു വാർത്ത പങ്കുവെച്ചു. ആർക്കുമറിയില്ല എന്താണ് സംഭവിക്കുന്നത്. അദ്ദഹേത്തിന് നല്ലത് വരട്ടെ എന്ന് മാത്രമാണ് എനിക്കിപ്പോൾ ചെയ്യാൻ സാധിക്കുക" ദൈനിക് ഭാസ്കർ എന്ന ഹിന്ദി മാധ്യമത്തിന് നൽകിയ അഭിമുഖത്തിൽ ഡിവില്ലിയേഴ്സ് പറഞ്ഞു.
സ്വകാര്യമായ ആവശ്യത്തെ തുടർന്ന് വിരാട് കോലി ഇംഗ്ലണ്ടിനെതിരെയുള്ള ആദ്യ രണ്ട് ടെസ്റ്റ് മത്സരങ്ങളിൽ നിന്നും പിന്മാറി നിൽക്കുമെന്നായിരുന്നു ബിസിസിഐ അറിയിച്ചിരുന്നത്. എന്നാൽ കോലി ഇംഗ്ലണ്ടിനെതിരെയുള്ള പരമ്പരയിൽ നിന്നും പൂർണമായി മാറി നിൽക്കാനാണ് സാധ്യത. ടീം മാനേജ്മെന്റിനും ക്യാപ്റ്റൻ രോഹിത് ശർമയും തന്റെ ആവശ്യങ്ങൾ ധരിപ്പിച്ചതിന് ശേഷം കോലി പരമ്പരയിൽ നിന്നും വിട്ടുമാറിയത്. കൂടാതെ താരത്തിന്റെ സ്വകാര്യതയെ മാനിക്കണമെന്നും ബിസിസിഐ ആരാധകരോടും മാധ്യമങ്ങളോടും ആവശ്യപ്പെട്ടിരുന്നു. നിലവിൽ രാജ്യത്തിന്റെ പുറത്തുള്ള താരം ഇംഗ്ലണ്ടിനെതിരെയുള്ള പരമ്പരയ്ക്ക് ശേഷമായിരിക്കും ടീമിലേക്ക് തിരിച്ചു വരാൻ സാധ്യത.
അതിനിടെ സൂപ്പർ താരം ടീമിൽ നിന്നും വിട്ടുനിൽക്കുന്നത് തന്റെ മാതാവിന്റെ ആരോഗ്യ പ്രശ്നത്തെ തുടർന്നാണെന്നുള്ള അഭ്യൂഹങ്ങൾ സോഷ്യൽ മീഡിയയിൽ ഉയർന്നിരുന്നു. എന്നാൽ താരത്തിന്റെ സഹോദരൻ വികാസ് കോലി ഇക്കാര്യ തള്ളി കളയുകയും ചെയ്തിരുന്നു. ഈ കഴിഞ്ഞ ജനുവരിയിലാണ് കോലി തന്റെ മകൾ വാമികയുടെ മൂന്നാം പിറന്നാൾ ആഘോഷിക്കുന്നതിനായി ഇന്ത്യൻ ടീമിൽ നിന്നും അഫ്ഗാനിസ്ഥാനെതിരെയുള്ള ആദ്യ ടി20 മത്സരത്തിൽ നിന്നും വിട്ടു നിന്നത്.
2017ലാണ് വിരാട് കോലിയും ബോളിവുഡ് താരവുമായ അനുഷ്ക ശർമയും തമ്മിൽ വിവാഹിതരാകുന്നത്. 2021ലാണ് താരദമ്പതികൾക്ക് ആദ്യ കുഞ്ഞുണ്ടാകുന്നത്. അന്ന് ഓസ്ട്രേലിയയ്ക്കെതിരെയുള്ള ടെസ്റ്റ് പരമ്പരയ്ക്കിടെ വിരാട് കോലി ടീം വിട്ട് കുടുംബത്തിനൊപ്പം ചേർന്നിരുന്നു. അനുഷ്ക വീണ്ടും ഗർഭിണിയാണെന്നുള്ള സംശയം അടുത്തിടെ ബോളിവുഡ് താരത്തിന്റെ പുറത്ത് വന്ന ചിത്രങ്ങളിൽ ചൂണ്ടിക്കാട്ടി ആരാധകർ ഉയർത്തിയിരുന്നു.
അതേസമയം ഫെബ്രുവരി 15നാണ് ഇന്ത്യ-ഇംഗ്ലണ്ട് മൂന്ന് ടെസ്റ്റിന് തുടക്കമാകുക. രാജ്കോട്ടിൽ വെച്ചാണ് മത്സരം നടക്കുക. മൂന്നാം ടെസ്റ്റിനുള്ള ടീമിനെ ഇതുവരെ ബിസിസിഐ പ്രഖ്യാപിച്ചിട്ടില്ല. പരമ്പരയിലെ ബാക്കി മൂന്ന് മത്സരങ്ങളിൽ നിന്നും ശ്രെയസ് അയ്യർക്ക് ബിസിസിഐ വിശ്രമം അനുവദിച്ചിട്ടുണ്ട്. ആദ്യ ടെസ്റ്റിൽ പരിക്കേറ്റ കെ.എൽ രാഹുൽ തിരികെ ഇന്ത്യൻ ടീമിലേക്ക് വന്നേക്കും. അഞ്ച് മത്സരങ്ങളുടെ പരമ്പര 1-1ന് സമനിലയിലാണ്.
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില് വാര്ത്തകള് ലഭ്യമാണ്. ZEE MALAYALAM App ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...
ios Link - https://apple.co/3hEw2hy
ഞങ്ങളുടെ സോഷ്യൽ മീഡിയ പേജുകൾ സബ്സ്ക്രൈബ് ചെയ്യാൻ X (Twitter), Facebook ലിങ്കുകളിൽ ക്ലിക്കുചെയ്യുക. ഏറ്റവും പുതിയ വാര്ത്തകൾക്കും വിശേഷങ്ങൾക്കുമായി സീ മലയാളം ന്യൂസ് ടെലഗ്രാം ചാനല് സബ്സ്ക്രൈബ് ചെയ്യൂ. അപ്ഡേറ്റുകൾ അറിയാൻ സീ മലയാളം ന്യൂസ് വാട്സാപ്പ് ചാനൽ സബ്സ്ക്രൈബ് ചെയ്യൂ.
