Snake Farming Gives Excellent Profit : உழைத்து உண்டால் உண்ணும் உணவு செரிக்கும், மன நிம்மதி கிடைக்கும் என்று சொல்வார்கள். ஆனால், பாம்பு என்ற பெயரைக் கேட்டாலே படபடத்து பயத்தில் உயிர் போய்விடும் என்பதை குறிக்கும் பல பழமொழிகளும் வழக்கில் உள்ளன
ஆனால், பாம்புகளை வளர்ப்பதையே தொழிலாக வைத்து நன்றாக சம்பாதிக்கலாம் என்பது உங்களுக்குத் தெரியுமா? பாம்புப் பண்ணை வைத்து பணம் பார்க்கும் மக்களைப் பற்றி கேள்விப்பட்டதுண்டா?
வேளாண்மை என்ற சொல்லில் விவசாயம், கால்நடை வளர்ப்பு முதல் பல தொழில்கள் அடங்கிவிடும். ஆனால், பாம்பு வளர்ப்பும் வேளாண்மை என்ற வரையறைக்குள் வரும் என்பது தெரியுமா?
விலங்குகள், பறவைகள், காளான், மண்புழு என பல உயிரினங்களை தொழில்முறையில் வளர்ப்பதை கேள்விப்பட்டிருக்கலாம். ஆனால், பாம்பு வளர்த்து லாபம் சம்பாதிக்கும் தொழில் உலகில் ஒருசில நாடுகளில் செய்யப்படுகிறது
சீனாவின் ஜிசிகியாவோ என்ற கிராமத்தில் மக்கள் பெரிய அளவில் பாம்புகளின் பல வகைகளை வளர்த்து நல்ல லாபம் ஈட்டுகின்றனர்
ஜிசிகியாவோ கிராமத்தில் ஆண்டுதோறும் சுமார் மூன்று மில்லியனுக்கும் அதிகமான பாம்புகள் உற்பத்தி செய்யப்படுகின்றன
ஜிசிகியாவோ கிராமத்தில் சுமார் 170 குடும்பங்கள் பாம்பு உற்பத்தி தொழிலில் ஈடுபட்டுள்ளன. பாம்புகள், நாட்டிலுள்ள விலங்கு உணவு சந்தையில் விற்கப்படுகின்றன. மக்கள், பாம்புகளை வாங்கி சமைத்து சாப்பிடுகிறார்கள்.
பாரம்பரிய மருத்துவ முறைகள் சீனாவில் ஆயிரக்கணக்கான ஆண்டுகளாக நடைமுறையில் உள்ளன. பாம்பு விஷத்தைக் கொண்டு பல நோய்களுக்கு சிகிச்சை அளிக்கப்படுகிறது. இதற்காக விஷப்பாம்புகளை விலைக்கு வாங்கி, அவற்றின் விஷம் பிரித்தெடுக்கப்படுகிறது. பின்னர் அந்த விஷத்தில் இருந்து மருந்து தயாரிக்கப்படுகிறது.
சீனாவில் பாம்புகளை உற்பத்தி செய்ய சிறப்பு முறை கண்டுபிடிக்கப்பட்டுள்ளதாக கூறப்படுகிறது. அங்கு பாம்புகள் முட்டையிடும் போது, மற்ற பாம்புகள் அவற்றை உண்ணாதபடி, மரம் மற்றும் கண்ணாடியால் செய்யப்பட்ட சிறிய பெட்டிகளில் அடைத்து வைக்கப்படுகின்றன
தனியாக வைக்கப்படும் பாம்புகள் கொஞ்சம் வளர்ந்தவுடன், அவை வெவ்வேறு அடைப்புகளில் இனம் வாரியாக வைத்து பராமரிக்கப்படுகின்றன
பாம்பின் விஷம், இறைச்சி மற்றும் பற்களின் பொருட்கள் அண்டை நாடான ஜப்பான், வியட்நாம், தாய்லாந்து, பிலிப்பைன்ஸ் போன்ற நாடுகளுக்கு ஏற்றுமதி செய்யப்படுகிறது. சீனாவில் பாம்பு பண்ணைத் தொழில், அந்நியச் செலாவணியைப் பெற்று தரும் நல்ல தொழிலாகவும் மாறியிருக்கிறது
