70 કરોડ બચાવીને ભારતમાં બની બૂલેટ જેવી પહેલી સ્વદેશી ટ્રેન, એન્જિન વગર દોડશે

આ ટ્રેન મેક ઈન ઈન્ડિયા અંતર્ગતનો સૌથી મહત્વનો પ્રોજેક્ટ હતો. તમિલનાડુની કોચ ફેક્ટરીમાં રેલવે દ્વારા આ એસી ટ્રેન બનાવવામાં આવી છે. ઘર આંગણે આ ટ્રેન બનાવીને ભારતીય રેલવેએ સરકારી તિજોરીના 70 કરોડ રૂપિયા બચાવ્યા છે. કારણ કે, તેનાથી વિદેશી ટેકનોલોજીનો ટ્રાન્સફર ખર્ચ અને સમય બચાવવામાં આવ્યો છે. જો આ ટ્રેન વિદેશમાંથી આયાત કરવામાં આવી હોત તો તેનો ખર્ચ 170 કરોડ થાત. ભારતમાં બનાવાયેલી ટ્રેન-18 માત્ર 100 કરોડના ખર્ચે 18 મહિનાના અંતરમાં બની ગઈ છે. ટ્રેન માટે માત્ર બ્રેકિંગ સિસ્ટમ, ટ્રાન્ફફોર્મર્સ અને સીટ્સ જ વિદેશમાંથી આયાત કરાયા છે. 

આ ટ્રેનની ખાસિયત એ છે કે, તે કલાકના 160થી 220 કિલોમીટરની સ્પીડે દોડશે. બૂલેટ ટ્રેન જેવી દેખાતી આ ટ્રેન રાજધાની અને શતાબ્દી કરતા પણ તેજ રફ્તારે દોડશે, અને મુસાફરીનો 10થી 15 ટકાનો સમય બચાવશે. સામાન્ય ટ્રેનના મુકાબલે તેની એક્સલેરેશન (સ્પીડ)ની ક્ષમતા 50 ટકાથી વધુ રહેશે. સ્પીડ નિયંત્રણ માટે સ્માર્ટ બ્રેકનો ઉપયોગ કરાયો છે. ટ્રેન સંપૂર્ણ કમ્પ્યૂટરાઈઝ્ડ અને એન્જિન વગર દોડશે. 

ટ્રેનમાં 16 એસી કોચ અને બે એક્ઝિક્યુટિવ કોચ ફિટ કરાય છે. ટ્રેન તમામ આધુનિક ટેકનોલોજીથી સજ્જ છે. ટ્રેનમાં દિવ્યાંગો માટે બે બાથરૂમ અને બેબી કેર માટે વિશેષ સુવિધા છે. ટ્રેનમાં 24 અવર્સ ચાંપતી નજર રાખવા માટે 6 સીસીટીવી કેમેરા લગાવાયા છે. એક્ઝિક્યુટિવ કોચ માટે સ્પેનથી સીટ્સ મંગાવાઈ છે, જે 360 ડિગ્રી ફરી શકે છે. ચાલુ ટ્રેનમાં કોઈ ઈમરજન્સી આવે તો મુસાફરો ડ્રાઈવર સાથે સીધી જ વાત કરી શકશે. જે માટે દરેક ડબ્બામાં ટોક બેક યુનિટ ફીટ કરાયું છે. 

આ ટ્રેનનું પહેલું પરીક્ષણ 160 કિલોમીટર પ્રતિ કલાકની સ્પીદે મુરાદાબાદથી બરેલી અને રાજસ્થાનના કોટાથી સવાઈ માધોપુર વચ્ચે કેટલાક સ્ટેશનોમાં કરાશે. હાલ તો તે શતાબ્દી તથા રાજધાનીના રુટ માટે તૈયાર કરાઈ છે. બાદમાં તે દિલ્હી-ભોપાલ, ચેન્નાઈ-બેંગલુરુ અને મુંબઈ-અમદાવાદના રુટ પર નિયમિત દોડાવાશે. જાન્યુઆરી, 2019માં તેને લોન્ચ કરવાની શક્યતા છે. તો હાલ કોચ ફેક્ટરીમાં બીજી ટ્રેનનું પણ કામ ચાલી રહ્યું છે. બીજી ટ્રેન માર્ચ, 2019 સુધી તૈયાર થઈ જાય તેવી શક્યતા છે.