વિશ્વની અજાયબીઓને જોવી હોય તો પહોંચી જાવ મોરબીના આ આર્ટિસ્ટ પાસે

લાકડામાંથી વિન્ટેજ કાર બનાવી રહેલા આ હાથ નીતિન પ્રજાપતિના છે. જે હાલ લાકડામાંથી રજવાડાના સમયથી એન્ટિક કાર બનાવી રહ્યા છે. મોરબી એટલે કલાકારોનું નગર અને મોરબીમાં એવા એવા કલાકારો છે જેઓ અદભૂત કલાનું નિર્માણ કરે છે. આવા જ એક કલાકાર છે નીતિનભાઇ પ્રજાપતિ, જેમણે લાકડામાંથી વિશ્વના પ્રખ્યાત ટાવર તૈયાર કર્યા છે. 

મોરબીની શાનસમાન નહેરુ ગેટ ચોકની ટાવર ઘડિયાળ લાકડા પર બનાવીને નીતિનભાઇને પણ લાકડાંમાંથી વસ્તુઓ બનાવવાનું ઘેલું લાગ્યું. પરંતુ નીતિનભાઇ કંઇક અલગ કરવા માંગતા હતા. એટલે જ તેમણે એફિલ ટાવર, બુર્જ ખલીફા, રોમનો ટાવર, લંડનનો બિગબેન ટાવર, ઇટલીનો ટાવર, તાજમહાલ સહિતની અનેક જાણીતી ઇમારતોની આબેહૂબ પ્રતિકૃતિ બનાવી છે. સાથે જ નીતિનભાઇએ રાજા-રજવાડાં સમયની એન્ટિક કાર પણ લાકડામાંથી જ બનાવી છે. 

દરેક કલાકારનું એક સ્વપ્ન હોય છે. તેવી જ રીતે નીતિનભાઇનું પણ સ્વપ્ન છે કે તેઓ વિશ્વની સૌથી ઊંચી એવી સરદાર પટેલની પ્રતિમાની પ્રતિકૃતિ લાકડામાંથી બનાવે અને તેને પ્રધાનમંત્રી મોદીને ભેટ સ્વરૂપે આપે. નીતિનભાઇની કારીગરી તો અદભુત છે. ત્યારે આપણે આશા રાખીએ કે નીતિનભાઇનું સ્વપ્ન પૂર્ણ થાય અને તેમની આ કારીગીરીને નવી પાંખ મળે.