ಕನ್ನಡ ಭಾಷೆಯನ್ನು ಕಡೆಗಣಿಸಿದ ಲೋಕಸಭಾ ಸಚಿವಾಲಯ...!

ಸಾಂದರ್ಭಿಕ ಚಿತ್ರ

ನವದೆಹಲಿ: ಕೇಂದ್ರ ಸರ್ಕಾರದಿಂದ ಶಾಸ್ತ್ರಿಯ ಭಾಷೆಯ ಸ್ಥಾನಮಾನ ಪಡೆದ ಕೆಲವೇ ಭಾಷೆಗಳಲ್ಲಿ ಕನ್ನಡ ಭಾಷೆಯೂ ಕೂಡ ಒಂದು, ಆದರೆ ಇಂತಹ ಸುದೀರ್ಘ ಇತಿಹಾಸ ಇರುವ ಭಾಷೆಯನ್ನು ಈಗ ಲೋಕಸಭಾ ಸಚಿವಾಲಯ ಕಡೆಗಣಿಸಿದೆ.

ಹೌದು, ಈಗ ಲೋಕಸಭಾ ಸಚಿವಾಲಯದ ಅಡಿಯಲ್ಲಿ ಬರುವ 'ಪಾರ್ಲಿಮೆಂಟರಿ ರಿಸರ್ಚ್ ಅಂಡ್ ಟ್ರೈನಿಂಗ್ ಇನ್ಸ್ಟಿಟ್ಯೂಟ್ ಫಾರ್ ಡೆಮಾಕ್ರಸಿ ಸಂಸ್ಥೆಯು ಸಂಸತ್ತಿನ ಸದಸ್ಯರು, ರಾಜ್ಯ / ಕೇಂದ್ರಾಡಳಿತ ಪ್ರದೇಶದ ಶಾಸಕರು, ಅಧಿಕಾರಿಗಳಿಗೆ ವಿದೇಶದ ಆರು ಭಾಷೆಗಳು ಹಾಗೂ ಭಾರತೀಯ ಆರು ಭಾಷೆಗಳನ್ನು ಕಲಿಸಲು ಮುಂದಾಗಿದೆ.ವಿದೇಶಿ ಭಾಷೆಗಳಲ್ಲಿ ಫ್ರೆಂಚ್, ಜರ್ಮನ್,ಜಪಾನೀಸ್, ಪೋರ್ಚುಗೀಸ್, ರಷ್ಯನ್ ಮತ್ತು ಸ್ಪ್ಯಾನಿಷ್ ಭಾಷೆಗಳು ಈ ಕಲಿಕೆಯ ಭಾಗವಾಗಿರಲಿವೆ.

ಇದನ್ನೂ ಓದಿ: ದೇಶಾದ್ಯಂತ ಕನ್ನಡ ಭಾಷಾ ದಿನವನ್ನು ಯಾವಾಗ ಆಚರಿಸುತ್ತೀರಿ ಮೋದಿಯವರೇ ?- ಕುಮಾರಸ್ವಾಮಿ

ಇನ್ನೊಂದೆಡೆಗೆ ಭಾರತೀಯ ಭಾಷೆಗಳಲ್ಲಿ  ಪ್ರಮುಖವಾಗಿ ಗುಜರಾತಿ, ಬಂಗಾಳಿ, ಮರಾಠಿ, ಒಡಿಯಾ, ತಮಿಳು ಮತ್ತು ತೆಲುಗು ಭಾಷೆಗಳಿಗೆ ಮಾತ್ರ ಮಣೆ ಹಾಕಲಾಗಿದೆ.ದಕ್ಷಿಣ ಭಾರತದಿಂದ ತಮಿಳು ಮತ್ತು ತೆಲುಗು ಭಾಷೆಗಳಿಗೆ ಮಾತ್ರ ಪ್ರಾಧಾನ್ಯತೆ ನೀಡಿ ಕನ್ನಡ ಭಾಷೆ (Kannada Language) ಯನ್ನು ಕಡೆಗಣಿಸಲಾಗಿದೆ, ಈಗ ಲೋಕಸಭಾ ಸಚಿವಾಲಯದ ಈ ನಡೆ ಕನ್ನಡಿಗರ ಆಕ್ರೋಶಕ್ಕೆ ಕಾರಣವಾಗಿದೆ.

.

ಲೋಕಸಭಾ ಸಚಿವಾಲಯದಿಂದ ಆಯೋಜಿಸಿರುವ ವಿದೇಶಿ ಮತ್ತು ಭಾರತೀಯ ಭಾಷೆಗಳ ಈ ಆನ್ ಲೈನ್ ತರಗತಿಗಳು ಕ್ರಮವಾಗಿ ಜೂನ್ 22 ,ಮತ್ತು ಜುಲೈ 05 ರಿಂದ ಪ್ರಾರಂಭವಾಗಲಿದ್ದು, ಪ್ರತಿ ಭಾಷೆಗೆ 30 ಗಂಟೆಗಳನ್ನು ನಿಗದಿಪಡಿಸುವ ಮೂಲಕ ಮೂರು ತಿಂಗಳಲ್ಲಿ ಕೋರ್ಸ್ ನ್ನು ಮುಗಿಸಲಾಗುತ್ತದೆ. 75 ನಿಮಿಷಗಳ ಎರಡು ತರಗತಿಗಳ ಜೊತೆಗೆ ಒಟ್ಟು ತರಗತಿಗಳ ಸಂಖ್ಯೆ 24 ಆಗಿರುತ್ತದೆ ಎಂದು ಲೋಕಸಭಾ ಸಚಿವಾಲಯ ತಿಳಿಸಿದೆ.

ಇದನ್ನೂ ಓದಿ: ಹಿಂದಿ ಎಲ್ಲಾ ಭಾರತೀಯರ ಮಾತೃಭಾಷೆ ಅಲ್ಲ: ಒವೈಸಿ

ಈಗ ಕೇಂದ್ರ ಸರ್ಕಾರದ ನಡೆಗೆ ಕನ್ನಡಪರ ಸಂಘಟನೆಗಳು ಆಕ್ರೋಶ ವ್ಯಕ್ತಪಡಿಸಿ ಲೋಕಸಭಾ ಸಚಿವಾಲಯದ ಈ ಭಾಷಾ ತರಬೇತಿಯಲ್ಲಿ ಕನ್ನಡ ಭಾಷೆಯನ್ನು ಸಹ ಒಳಗೊಳ್ಳಬೇಕು ಎಂದು ಆಗ್ರಹಿಸಿವೆ.