ಅಮೆರಿಕಾದ ವರ್ಜೀನಿಯಾದ ಶಾಪಿಂಗ್ ಸೆಂಟರ್ ನಲ್ಲಿ ಇತ್ತೀಚೆಗೆ ಹುಲಿಯೊಂದನ್ನು ಕಂಡ ಪೊಲೀಸ್ ಅಧಿಕಾರಿಯೊಬ್ಬರು ಭಯಭೀತರಾದ ಘಟನೆ ನಡೆದಿದೆ.
ಈ ವಿಷಯವನ್ನು ಪ್ರಿನ್ಸ್ ವಿಲಿಯಂ ಕೌಂಟಿ ಪೊಲೀಸ್ ಇಲಾಖೆ ಫೇಸ್ಬುಕ್ ನಲ್ಲಿ ಹುಲಿಯ ಫೋಟೋಗಳನ್ನು ಪೋಸ್ಟ್ ಮಾಡಿದ್ದು, "ನಮ್ಮ ಇಲಾಖೆಯ ಅಧಿಕಾರಿಯೊಬ್ಬರು ಬೆಚ್ಚಿ ಬೀಳುವಂತಹ ಒಂದು ಸನ್ನಿವೇಶವನ್ನು ಅನುಭವಿಸಿದ್ದಾರೆ. ಆ ಶಾಕ್'ನಿಂದ ಸಾವರಿಸಿಕೊಳ್ಳುವಷ್ಟರಲ್ಲಿ ಅದೊಂದು ತೊಂದರೆ ಮಾಡದ ಪ್ರಾಣಿ ಎಂಬುದು ಅರಿವಾಗಿದೆ" ಎಂದು ಅದರಲ್ಲಿ ಬರೆಯಲಾಗಿದೆ.
ಅಷ್ಟಕ್ಕೂ ಆ ಹುಲಿ ಯಾಕೆ ತೊಂದರೆ ನೀಡಲಿಲ್ಲ? ಎನ್ನುವ ಪ್ರಶ್ನೆ ನಿಮ್ಮನ್ನು ಈಗ ಕಾಡುತ್ತಿರಬಹುದು. ಅಷ್ಟಕ್ಕೂ ಅದು ನಿಜವಾದ ಹುಲಿ ಆಗಿರಲಿಲ್ಲ. ಅದೊಂದು ಹುಲಿಯ ಪ್ರತಿಮೆ ಎಂಬುದು ಆ ಪೋಲಿಸ್ ಅಧಿಕಾರಿಗೆ ತಡವಾಗಿ ಅರಿವಾಗಿತ್ತು. ಹಳೆಯದಾಗಿದ್ದ ಆ ಹುಲಿ ಸ್ಟ್ಯಾಚ್ಯೂವನ್ನು ಶಾಪಿಂಗ್ ಸೆಂಟರ್ ಹಿಂಬದಿಯಲ್ಲಿ ಇರಿಸಲಾಗಿತ್ತು. ರಾತ್ರಿ ಗಸ್ತಿನಲ್ಲಿದ್ದ ಪೋಲಿಸ್ ಅಧಿಕಾರಿ ಈ ಸ್ಟ್ಯಾಚ್ಯೂ ನೋಡಿ ಬೆಚ್ಚಿ ಬಿದ್ದಿದ್ದರು ಎನ್ನಲಾಗಿದೆ. ಸದ್ಯ ಈ ಫೋಟೋಗಳು ಫೇಸ್ಬುಕ್'ನಲ್ಲಿ ಸಖತ್ ವೈರಲ್ ಆಗಿದೆ.
ಇದೇ ಸಂದರ್ಭದಲ್ಲಿ ಹಳೆಯದಾದ ಪ್ರಾಣಿಗಳ ಸ್ಟ್ಯಾಚ್ಯೂಗಳನ್ನು ಸೂಕ್ತ ರೀತಿಯಲ್ಲಿ ವಿಲೇವಾರಿ ಮಾಡಬೇಕು ಹಾಗೂ ಈ ಬಗ್ಗೆ ಎಚ್ಚರಿಕೆ ವಹಿಸಬೇಕು ಎಂದು ಉದ್ಯಮಿಗಳಿಗೆ, ಶಾಪಿಂಗ್ ಸೆಂಟರ್ ಮಾಲೀಕಾರಿಗೆ ಪೊಲೀಸ್ ಇಲಾಖೆ ಸೂಚನೆ ನೀಡಿದೆ.
