Drowning Death: വർക്കലയിൽ വിദേശ വനിത കടലിൽ മുങ്ങി മരിച്ചു

Drown to death: മരിച്ചത് ആരാണെന്ന് തിരിച്ചറിഞ്ഞിട്ടില്ല. മൃതദേഹം വർക്കല താലൂക്ക് ആശുപത്രി മോർച്ചറിയിലേക്ക് മാറ്റി.

തിരുവനന്തപുരം: വർക്കല ബീച്ചിൽ വിദേശ വനിത കടലിൽ മുങ്ങി മരിച്ചു. ശക്തമായ തിരയിൽപ്പെട്ടാണ് മരിച്ചതെന്നാണ് പ്രാഥമിക നി​ഗമനം. ബുധനാഴ്ച രാവിലെ 11.30 യോടെ ഇടവ വെറ്റക്കട ബീച്ചിലാണ് സംഭവം. ഏകദേശം 35-40 വയസ്സ് പ്രായം തോന്നിക്കുന്ന യുവതി അവശനിലയിൽ ഒഴുകി വരുന്നത് തീരത്ത് സർഫിങ് നടത്തുന്ന സംഘം കാണുകയായിരുന്നു.

സർഫിങ് സംഘത്തിൽ ഉള്ളവർ കടലിലേക്ക്  നീന്തി എത്തി  ഇവരെ കരയ്ക്കെത്തിച്ചു. കരയ്ക്കെത്തിച്ച ഉടൻ തന്നെ കൃത്രിമ ശ്വാസം നൽകി വർക്കല താലൂക്ക് ആശുപത്രിയിൽ എത്തിച്ചെങ്കിലും മരണം സംഭവിച്ചിരുന്നു. മരിച്ചത് ആരാണെന്ന് തിരിച്ചറിഞ്ഞിട്ടില്ല. മൃതദേഹം വർക്കല താലൂക്ക് ആശുപത്രി മോർച്ചറിയിലേക്ക് മാറ്റി.

അയിരൂർ പോലീസ് തുടർ നടപടികൾ സ്വീകരിച്ചു വരുന്നു. വൈറ്റ് ലോട്ടസ് എന്ന പേരിൽ ഇടവയിൽ തന്നെയുള്ള ഒരു റിസോർട്ടിൽ താമസിച്ചു വന്നിരുന്ന റഷ്യൻ യുവതിയാണെന്നാണ് പ്രാഥമിക വിവരം. പോലീസ് ഇത് സംബന്ധിച്ച് കൂടുതൽ അന്വേഷണം നടത്തിവരികയാണ്.‌ പോസ്റ്റുമോർട്ടത്തിന് ശേഷം മാത്രമേ മരണകാരണം വ്യക്തമാകൂവെന്ന് പോലീസ് അറിയിച്ചു.