തിരുവനന്തപുരം: പ്രായപൂർത്തിയാകാത്ത പെൺകുട്ടിക്ക് നേരെ ലൈംഗികാതിക്രമം നടത്തിയ കേസിൽ കെഎസ്ഇബി ലൈൻമാന് തടവും പിഴയും വിധിച്ച് കോടതി. മുട്ടുക്കോണം സ്വദേശി അജീഷ് കുമാറിനെ ആണ് കുറ്റക്കാരനായി കണ്ടെത്തി ശിക്ഷ വിധിച്ചത്. കുട്ടികൾക്കെതിരെയുള്ള ലൈംഗികാതിക്രമം തടയുന്ന നിയമത്തിലെ വകുപ്പുകൾ പ്രകാരം പ്രതിക്ക് മൂന്ന് വർഷം കഠിന തടവും 20,000 രൂപ പിഴ ശിക്ഷയുമാണ് കോടതി വിധിച്ചത്.
വീട്ടിലേയ്ക്ക് അതിക്രമിച്ച് കയറിയ കുറ്റത്തിന് ഇന്ത്യൻ ശിക്ഷാ നിയമത്തിലെ വകുപ്പുകൾ പ്രകാരം മൂന്ന് മാസം കഠിന തടവും 10,000 രൂപ പിഴയും വിധിച്ചിട്ടുണ്ട്. ഇതിന് പുറമെ, പിഴയായി കെട്ടിവെയ്ക്കുന്ന പിഴത്തുക 20,000 രൂപ നഷ്ടപരിഹാരമെന്ന നിലയ്ക്ക് അതിജീവിതയ്ക്ക് നൽകണമെന്നും വിധിയിലുണ്ട്. പിഴത്തുക കെട്ടിവെയ്ക്കുന്നതിൽ വീഴ്ച വരുത്തുന്ന പക്ഷം പ്രതി ആറ് മാസം കഠിന തടവ് കൂടുതലായി അനുഭവിക്കണം. ശിക്ഷ ഒരേ കാലയളവിൽ അനുഭവിച്ചാൽ മതിയെന്നും വിചാരണത്തടവുകാലം ശിക്ഷായിളവിന് അർഹതയുണ്ടെന്നും കോടതി വിധിയിൽ പറയുന്നു. സ്ത്രീകൾക്കും കുട്ടികൾക്കും എതിരെയുള്ള ലൈംഗികാതിക്രമ കുറ്റകൃത്യങ്ങൾ വിചാരണ ചെയ്യുന്ന ആറ്റിങ്ങൽ ഫാസ്റ്റ് ട്രാക്ക് സ്പെഷ്യൽ കോടതിയുടേതാണ് വിധി.
ALSO READ: ഷാറുഖ് സെയ്ഫി റിമാൻഡിൽ; ഡിസ്ചാർജ്ജ് ചെയ്തശേഷം ജയിലിലേക്ക് മാറ്റും
2016ലാണ് കേസിനാസ്പദമായ സംഭവം നടന്നത്. വീട്ടിൽ ആളില്ലാത്ത സമയത്ത് അതിക്രമിച്ച് കയറിയാണ് അജീഷ് കുമാർ പെൺകുട്ടിക്ക് നേരെ ലൈംഗികാതിക്രമം നടത്തിയത്. വൈദ്യുതി കണക്ഷൻ ശരിയാക്കാനെത്തിയ അജീഷ് കുമാർ പെൺകുട്ടിയുടെ വീട്ടിൽ ആരുമില്ലെന്ന് മനസിലാക്കുകയും അതിക്രമിച്ച് കയറി ലൈംഗികാതിക്രമം നടത്തുകയുമായിരുന്നു. പള്ളിക്കൽ പോലീസ് സ്റ്റേഷൻ സബ് ഇൻസ്പെക്ടറായിരുന്ന കിരണാണ് കേസിൽ അന്വേഷണം നടത്തിയത്. അജീഷ് കുമാറിൻറെ സഹപ്രവർത്തകനും പ്രതിയെ നേരിൽ കണ്ടെന്ന് മജിസ്ട്രേറ്റിന് മുമ്പാകെ രഹസ്യ മൊഴി നൽകിയ അയൽവാസികളും ഉൾപ്പെടെ പ്രധാന സാക്ഷികൾ കോടതിയിൽ കൂറുമാറിയിരുന്നു. കേസുമായി ബന്ധപ്പെട്ട് പ്രോസിക്യൂഷൻ 12 സാക്ഷികളെ വിസ്തരിക്കുകയും 18 രേഖകൾ തെളിവായി നൽകുകയും ചെയ്തു. പ്രോസിക്യൂഷന് വേണ്ടി സ്പെഷൽ പബ്ലിക് പ്രോസിക്യൂട്ടർ എം മുഹസിൻ ആണ് ഹാജരായത്.
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEE MALAYALAM App ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...
