Andhrapradesh: ആന്ധ്രയിൽ ട്രെയിനുകൾ കൂട്ടിയിടിച്ചു; മൂന്ന് മരണം

Trains collide in Andhrapradesh: പാസഞ്ചർ ട്രെയിനും പാലസ എക്‌സ്പ്രസും കൂട്ടിയിടിച്ചാണ് അപകടമുണ്ടായത്.

അമരാവതി: ആന്ധ്രാപ്രദേശിൽ ട്രെയിനുകൾ കൂട്ടിയിടിച്ച് മൂന്ന് മരണം. വിഴിയനഗര ജില്ലയിലെ കണ്ടകപ്പള്ളി എന്ന സ്ഥലത്ത് വെച്ചാണ് അപകടമുണ്ടായത്. റായഗഡയിലേക്ക് പോവുകയായിരുന്ന പാസഞ്ചർ ട്രെയിനും പാലസ എക്‌സ്പ്രസുമാണ് കൂട്ടിയിടിച്ചത്. 

ഓവർ ഹെഡ് കേബിൾ പൊട്ടിയതിനാൽ പാസഞ്ചർ ട്രെയിൻ ട്രാക്കിൽ നിർത്തിയിട്ടിരിക്കുകയായിരുന്നു. പാസഞ്ചർ ട്രെയിൻ നിർത്തിയിട്ടിരുന്ന അതേ ട്രാക്കിലൂടെ വന്ന പാലസ എക്‌സ്പ്രസ് ഇടിച്ചു കയറിയാണ് അപകടമുണ്ടായത്. തുടർന്ന് പാസഞ്ചർ ട്രെയിനിന്റെ മൂന്ന് ബോഗികൾ പാളം തെറ്റി. 

ആ ബോഗികളിൽ ഉണ്ടായിരുന്നവർ ആണ് മരിച്ചത്. പരിക്കേറ്റവരെ ആശുപത്രിയിലേക്ക് മാറ്റിയിട്ടുണ്ട്. ഇവരിൽ പലരുടെയും നില ഗുരുതരമായി തുടരുകയാണ്.  അപകടത്തിന്റെ കാരണം വ്യക്തമല്ല. സിഗ്‌നൽ പിഴവ് ആണോ കാരണം എന്ന് പരിശോധിക്കുമെന്ന് ഡിവിഷണൽ മാനേജർ അറിയിച്ചു. സ്ഥലത്ത് രക്ഷാപ്രവർത്തനം പുരോഗമിക്കുകയാണ്.