State School Sports Meet: സംസ്ഥാന സ്കൂൾ കായികമേള നവംബറിൽ; രാത്രിയും പകലും മത്സരങ്ങൾ, 'തക്കുടു' ഭാഗ്യചിഹ്നം

State School Sports Meet 2024: എറണാകുളത്താണ് കായിക മേള നടക്കുന്നത്. 17 വേദികളിലായാണ് മത്സരങ്ങൾ നടക്കുക. 24,000 കായിക താരങ്ങൾ മേളയിൽ പങ്കെടുക്കും.

കൊച്ചി: സംസ്ഥാന സ്കൂൾ കായിക മേള നവംബർ നാല് മുതൽ 11 വരെ നടക്കുമെന്ന് വിദ്യാഭ്യാസ മന്ത്രി വി ശിവൻകുട്ടി. എറണാകുളത്താണ് കായിക മേള നടക്കുന്നത്. 17 വേദികളിലായാണ് മത്സരങ്ങൾ നടക്കുക. കായിക മേളയുടെ ഉ​ദ്ഘാടന വേദിയിൽ നടൻ മമ്മൂട്ടി എത്തും. 24,000 കായിക താരങ്ങൾ മേളയിൽ പങ്കെടുക്കും.

ഏറ്റവും കൂടുതൽ പോയിന്റ് നേടുന്ന ടീമിന് മുഖ്യമന്ത്രിയുടെ എവർ റോളിങ് ട്രോഫി സമ്മാനമായി നൽകും. തക്കുടു (അണ്ണാറക്കണ്ണൻ) ആണ് മേളയുടെ ഭാ​ഗ്യചി​ഹ്നം. മത്സരങ്ങൾ രാത്രിയിലും പകലുമായി നടത്തും. സവിശേഷ പരി​ഗണന അർഹിക്കുന്ന കുട്ടികളെ (ഭിന്നശേഷി) കൂടി ഉൾപ്പെടുത്തിയാകും സംസ്ഥാന സ്കൂൾ കായിക മേള സംഘടിപ്പിക്കുകയെന്ന് വിദ്യാഭ്യാസ മന്ത്രി വി ശിവൻകുട്ടി പറഞ്ഞു.

കായികമേള സ്കൂൾ ഒളിംപിക്സ് എന്ന് പേര് മാറ്റാനായി ഒളിംപിക്സ് അസോസിയേഷനെ സമീപിച്ചെങ്കിലും സംഘടനയിലെ വിഭാ​ഗീയതയെ തുടർന്ന് ഇതിന് മറുപടി ലഭിച്ചിട്ടില്ലെന്നും കൂടുതൽ നിയമപ്രശ്നങ്ങൾ ഉണ്ടാകാതിരിക്കാൻ ഇത്തവണ സ്കൂൾ ഒളിംപിക്സ് എന്ന പേര് ഉപയോ​ഗിക്കില്ലെന്നും മന്ത്രി പറഞ്ഞു.

ഇന്ത്യയിൽ തന്നെ ആദ്യമായി ഇൻക്ലൂസീവ് സ്പോർട്സ് നടപ്പാക്കുന്ന സംസ്ഥാനമാണ് കേരളം. ആദ്യ ഘട്ടത്തിൽ 1,600ഓളം കുട്ടികൾ പങ്കെടുക്കുമെന്നും സവിശേഷ പരി​ഗണന അർഹിക്കുന്ന കൂടുതൽ കുട്ടികളെ അടുത്ത വർഷം മുതൽ മേളയുടെ ഭാ​ഗമാക്കുമെന്നും മന്ത്രി വി ശിവൻകുട്ടി പറഞ്ഞു.