Edavela Babu: ലൈം​ഗികാതിക്രമ പരാതി; ഇടവേള ബാബുവിനെതിരെ എടുത്ത കേസിനു താൽക്കാലിക സ്റ്റേ

അമ്മയിലെ അം​ഗത്വത്തിന് അഡ്ജസ്റ്റ് ചെയ്യണമെന്ന് ആവശ്യപ്പെട്ടന്ന ജൂനിയർ ആർട്ടിസ്റ്റിന്റെ പരാതിയിലായിരുന്നു കേസെടുത്തത്.

ലൈം​ഗികാതിക്രമ പരാതിയിൽ അമ്മ മുൻ ജനറൽ സെക്രട്ടറിയും നടനുമായ ഇടവേള ബാബുവിനെതിരെ എടുത്ത കേസിന് താൽക്കാലിക സ്റ്റേ. നടക്കാവ് പൊലീസ് രജിസ്റ്റർ ചെയ്ത കേസാണ് ഹൈക്കോടതി സ്റ്റേ ചെയ്തത്. നവംബർ 18ന് കേസ് വീണ്ടും പരി​ഗണിക്കുന്നത് വരെ സ്റ്റേ തുടരുമെന്ന് ജസ്റ്റിസ് എ. ബദറുദീൻ അറിയിച്ചു.

എതിർകക്ഷിയായ ജൂനിയർ ആർട്ടിസ്റ്റിന് നോട്ടീസ് അയക്കാനും കോടതി നിർദ്ദേശിച്ചു. കേസ് റദ്ദാക്കണമെന്ന് ആവശ്യപ്പെട്ട് ഇടവേള ബാബു ഹൈക്കോടതിയെ സമീപിക്കുകയായിരുന്നു. 

ഹേമ കമ്മിറ്റി റിപ്പോ‍ർട്ട് വന്നതിന് പിന്നാലെയായിരുന്നു ഇടവേള ബാബുവിനെതിരെ ആരോപണം ഉന്നയിക്കപ്പെട്ടത്. അമ്മയിലെ അം​ഗത്വത്തിന് അഡ്ജസ്റ്റ് ചെയ്യണമെന്ന് ആവശ്യപ്പെട്ടന്നായിരുന്നു ജൂനിയർ ആർട്ടിസ്റ്റിന്റെ പരാതി. അമ്മയിലെ അം​ഗത്വത്തിന് രണ്ട് ലക്ഷം രൂപയാണ് ഫീസ്. എന്നാൽ അഡ്ജസ്റ്റ് ചെയ്യാൻ തയ്യാറായാൽ രണ്ടു ലക്ഷം രൂപ വേണ്ട, കൂടുതൽ അവസരവും കിട്ടുമെന്ന് ഇടവേള ബാബു പറഞ്ഞെന്നായിരുന്നു നടിയുടെ വെളിപ്പെടുത്തൽ.

താൻ അഡ്ജസ്റ്റ് ചെയ്യാത്തതിനാൽ അവസരങ്ങൾ ഇല്ലാതായെന്നും നടി വെളിപ്പെടുത്തി. സംവിധായകൻ ഹരികുമാർ, നടൻ സുധീഷ് എന്നിവർക്കെതിരെയും പരാതിക്കാരി ആരോപണം ഉന്നയിച്ചിരുന്നു. ലൈം​ഗിക ചുവയോടെ സംസാരിച്ചുവെന്നാണ് സുധീഷിനെതിരെയുള്ള പരാതി.