നേരിന് ശേഷം ജീത്തു ജോസഫ് ഒരുക്കുന്ന പുതിയ ചിത്രം നുണക്കുഴിയുടെ ഷൂട്ടിംഗ് തുടങ്ങി. പൂജയോടെയാണ് ഷൂട്ടിംഗിന് തുടക്കമായത്. പൂജാ ചിത്രങ്ങൾ ജീത്തു ജോസഫ് ഉൾപ്പെടെയുള്ളവർ സോഷ്യൽ മീഡിയയിൽ പങ്കുവെച്ചിട്ടുണ്ട്. ബേസിൽ ജോസഫ് ആണ് ചിത്രത്തിൽ പ്രധാന കഥാപാത്രത്തെ അവതരിപ്പിക്കുന്നത്. ഗ്രേസ് ആന്റണി, സിദ്ദിഖ്, മനോജ് കെ ജയൻ, ബൈജു സന്തോഷ്, സൈജു കുറുപ്പ്, അജു വർഗീസ്, ബിനു പപ്പു, പ്രമോദ് വെളിയനാട്, അസീസ് നെടുമങ്ങാട് എന്നിവരാണ് ചിത്രത്തിലെ മറ്റ് താരങ്ങൾ.
സരിഗമയുടെയും വിന്റേജ് ഫിലിംസിന്റെയും ബാനറിലാണ് ചിത്രത്തിന്റെ നിർമ്മാണം. വിക്രം മെഹ്റ, സിദ്ധാർത്ഥ് ആനന്ദ് കുമാർ എന്നിവരാണ് ചിത്രം നിർമ്മിക്കുന്നത്. ലയേഴ്സ് ഡേ ഔട്ട് എന്നാണ് ടാഗ്ലൈൻ. കെആർ കൃഷ്ണകുമാർ ആണ് ചിത്രത്തിന്റെ രചന. 'കൂമൻ ' എന്ന ചിത്രത്തിന്റെ വിജയത്തിന് ശേഷം ജീത്തു ജോസഫും കെ ആർ കൃഷ്ണകുമാറും ഒന്നിക്കുന്നു എന്ന പ്രത്യേകതയും ഈ ചിത്രത്തിനുണ്ട്. ഡാർക്ക്‌ ഹ്യുമർ ജോണറിൽപെട്ട ചിത്രമാണ് 'നുണക്കുഴി '. സതീഷ് കുറുപ്പ് ആണ് ഛായാഗ്രഹണം നിർവഹിക്കുന്നത്. എഡിറ്റിംഗ് നിർവഹിക്കുന്നത് വിനായക് വിഎസ് ആണ്.
Also Read: Kaithi 2: 'കൈതി 2' ജനുവരിയിൽ തുടങ്ങേണ്ടിയിരുന്നത്; പക്ഷേ ഇനിയും താമസിക്കും, കാരണം ഇതാണ്!
സംവിധായകനും നടനുമായ ബേസിൽ ജോസഫുമൊത്ത് ജീത്തു ജോസഫ് ഒന്നിക്കുമ്പോൾ പ്രതീക്ഷകൾ ഏറെയാണ്. ജയ ജയ ജയ ജയ ഹേ പോലെയുള്ള സിനിമകൾ നായകനെന്ന നിലയിൽ ബേസിലിന്റെ സ്വീകാര്യത വർധിപ്പിച്ചവയാണ്. മേക്കപ്പ്: അമൽ ചന്ദ്രൻ, കോ-പ്രൊഡ്യൂസർ: സഹിൽ ശർമ്മ, എക്സിക്യുട്ടീവ് പ്രൊഡ്യൂസർ: സൂരജ് കുമാർ, കോസ്റ്റ്യൂം ഡിസൈനർ: ലിന്റ ജീത്തു, പ്രൊഡക്ഷൻ ഡിസൈനർ: പ്രശാന്ത് മാധവ്, പ്രൊഡക്ഷൻ കൺട്രോളർ: പ്രണവ് മോഹൻ, ചീഫ് അസോസിയേറ്റ് ഡയറക്ടർ: സുധീഷ് രാമചന്ദ്രൻ, ഡിസൈൻ: യെല്ലോടൂത്ത്.
