Thunivu OTT Update : അജിത് ചിത്രം തുനിവിന്റെ ഡിജിറ്റൽ അവകാശങ്ങൾ നേടി നെറ്റ്ഫ്ലിക്സ്

Thunivu Movie OTT Update : റിപ്പോർട്ടുകൾ അനുസരിച്ച് വമ്പൻ തുകയ്ക്കാണ് ചിത്രത്തിന്റെ ഒടിടി അവകാശങ്ങൾ വിറ്റ് പോയിരിക്കുന്നത്.

അജിത് കുമാറിന്റെ ഏറ്റവും പുതിയ ചിത്രം തുനിവിന്റെ ഒടിടി പാർട്ണറെ പ്രഖ്യാപിച്ചു. ചിത്രത്തിൻറെ ഡിജിറ്റൽ അവകാശങ്ങൾ സ്വന്തമാക്കിയിരിക്കുന്നത് ഒടിടി പ്ലാറ്റ്‌ഫോമായ നെറ്റ്ഫ്ലിക്‌സാണ്. റിപ്പോർട്ടുകൾ അനുസരിച്ച് വമ്പൻ തുകയ്ക്കാണ് ചിത്രത്തിന്റെ ഒടിടി അവകാശങ്ങൾ വിറ്റ് പോയിരിക്കുന്നത്. ചിത്രം 2023 പൊങ്കലിന് തീയേറ്ററുകളിൽ റിലീസ് ചെയ്യും. എച്ച് വിനോദാണ് ചിത്രം സംവിധാനം ചെയ്യുന്നത്. പ്രേക്ഷകർ ഏറെ പ്രതീക്ഷയോടെ കാത്തിരിക്കുന്ന ചിത്രങ്ങളിൽ ഒന്ന് കൂടിയാണ് തുനിവ്. ചിത്രത്തിൻറെ ഫസ്റ്റ് ലുക്ക് പോസ്റ്റർ സെപ്റ്റംബറിൽ പുറത്തുവിട്ടിരുന്നു.

താടിയും മുടിയം നരച്ചിൽ ലുക്കിൽ എത്തുന്ന താരം, കൈയ്യിൽ തോക്കും വെച്ച് ശാന്തനായി വിശ്രമിക്കുന്ന ദൃശ്യമാണ് ഫസ്റ്റ് ലുക്കിലൂടെ അണിയറപ്രവർത്തകർ പങ്കുവെച്ചത്. ധൈര്യമില്ലാത്തവർക്ക് മഹത്വമുണ്ടാങ്കില്ല (No Guts No Glory) എന്ന ടാഗ് ലൈനോടെയാണ് ചിത്രത്തിന്റെ ടൈറ്റിൽ അവതരിപ്പിച്ചത്. തുടരെ തുടരെ ആക്ഷൻ ഹിറ്റുകൾ സമ്മാനിച്ച താരത്തിന്റെ മറ്റൊരു മാസ് മസാല ചിത്രമായിരിക്കും തുനിവ് എന്നാണ് സ്ഥിരീകരിക്കാത്ത റിപ്പോർട്ടുകൾ സൂചിപ്പിക്കുന്നത്. 

അജിത്-എച്ച് വിനോദ് കൂട്ടുകെട്ടിൽ കോളിവുഡിൽ ഒരുങ്ങുന്ന മൂന്നാമത്തെ ചിത്രമാണ് തുനിവ്. നേരത്തെ ഇരുവരും ചേർന്ന് വലിമൈ, ബോളിവുഡ് ചിത്രം പിങ്കിന്റെ റീമേക്കായ നേർക്കൊണ്ട പാർവൈ എന്നീ ഹിറ്റുകൾ സമ്മാനിച്ചിരുന്നു. സീ സ്റ്റുഡിയോസും ബോണി കപൂറിന്റെ ബെയ് വ്യൂ പ്രോജക്ടും ചേർന്നാണ് ചിത്രം നിർമിക്കുന്നത്. മലയാളത്തിന്റെ ലേഡി സൂപ്പർ സ്റ്റാർ മഞ്ജു വാര്യറാണ് ചിത്രത്തിൽ മറ്റൊരു പ്രധാന കഥാപാത്രമായി എത്തുന്നത്. പൃഥ്വിരാജ് അസിഫ് അലി എന്നിവരെ കേന്ദ്രകഥാപാത്രമാക്കി ഷാജി കൈലാസ് ഒരുക്കുന്ന കാപ്പ എന്ന സിനിമ ഒഴിവാക്കിയാണ് മഞ്ജു വാര്യർ അജിത്ത് ചിത്രത്തിനൊപ്പം ചേർന്നത്.

നീരവ് ഷായാണ് ചിത്രത്തിന്റെ ഛായഗ്രഹകൻ. സൂപ്രീം സുന്ദറാണ് തുനിവിന്റെ ആക്ഷൻ കോറിയോഗ്രഫർ. ഗ്രിബ്രനാണ് സിനിമയ്ക്ക് സംഗീതം ഒരുക്കുന്നത്. വലിമൈ അതേ അണിയറപ്രവർത്തകരെ വെച്ചാണ് തുനിവും നിർമുക്കുന്നത്. ചിത്രത്തിന്റെ ചിത്രീകരണം നേരത്തെ തന്നെ ആരംഭിച്ചിരുന്നു.  അജിത്തിന്റെ 60-ാം ചിത്രമായിരുന്ന വലിമൈ നിരൂപക വിമർശനം നേരിട്ടെങ്കിലും തമിഴ്നാട്ടിൽ ഏറ്റവും കൂടുതൽ ബോക്സ് ഓഫീസ് കളക്ഷൻ നേടിയ രണ്ടാമത്തെ ചിത്രമായിരുന്നു വലിമൈ.

തുനിവിന് ശേഷം അജിത്ത് ഡേറ്റ് നൽകിയിരിക്കുന്നത് വിഘ്നേഷ് ശിവനാണ്. എകെ 62 എന്ന് താൽക്കാലിക പേര് നൽകിയിരിക്കുന്ന ചിത്രം 2023 തിയറ്ററുകളിൽ എത്തും. ലൈക്ക പ്രൊഡക്ഷൻസാണ് ചിത്രം നിർമിക്കുന്നത്. വിഘ്നേഷ് ശിവന്റെ പതിവ് ടീം തന്നെയായിരിക്കും എകെ 62നുമെന്നാണ് റിപ്പോർട്ട്.