മുംബൈ: പ്രമുഖ നൃത്ത സംവിധായകന് ഗണേഷ് ആചാര്യയ്ക്കെതിരെ വീണ്ടും #MeToo ആരോപണം. അശ്ലീല വീഡിയോ കാണാന് നിര്ബന്ധിക്കുന്നുവെന്നും ജോലി ചെയ്യാന് അനുവദിക്കുന്നില്ല എന്നുമാണ് പരാതി.
അസിസ്റ്റന്റ് കൊറിയോഗ്രാഫറും മുപ്പത്തിമൂന്നുകാരിയുമായ യുവതിയാണ് നൃത്ത സംവിധായകനെതിരെ പരാതി നല്കിയിരിക്കുന്നത്. ഇതു സംബന്ധിച്ച് മുംബൈ അംബോലി പോലീസ് സ്റ്റേഷനിലും വനിതാ കമ്മീഷനിലും ഇവര് പരാതി നല്കിയിട്ടുണ്ട്.
ഗണേഷ് ആചാര്യയെ കാണാന് അന്ധേരിയിലെ ഓഫീസില് എത്തിയപ്പോള് ഇയാള് അശ്ലീല വീഡിയോ കാണാന് നിര്ബന്ധിച്ചെന്നാണ് ആരോപണം. ഞായറാഴ്ച നടന്ന ഇന്ത്യന് ഫിലിം ആന്ഡ് ടെലിവിഷന് കൊറിയോഗ്രാഫേഴ്സ് അസോസിയേഷന്റെ (ഐഎഫ്ടിസിഎ) ചടങ്ങിനിടെ തന്നെ ആക്രമിച്ചതായും ഇവര് പരാതിയില് പറയുന്നു.
ജയശ്രീ കെല്ക്കര്, പ്രീതി ലാഡ് എന്നീ രണ്ട് സ്ത്രീകളും തന്നെ ആക്രമിക്കാനായി ഗണേഷ് ആചാര്യയ്ക്കൊപ്പം ഉണ്ടായിരുന്നു എന്നും ഇവര് പറയുന്നു. ഐഎഫ്ടിസിഎ ജനറല് സെക്രട്ടറി കൂടിയാണ് ഗണേഷ് ആചാര്യ. പരാതിക്കാരിയായ യുവതിയും ഈ സംഘടനയില് അംഗമാണ്.