കുവൈറ്റ് സിറ്റി: കുവൈറ്റിലെ ഹവാല്ലി ഗവര്‍ണറേറ്റില്‍ ബുര്‍ഖ ധരിച്ചെത്തിയ യുവാവ് കളിത്തോക്ക് ചൂണ്ടി ബാങ്ക് കൊള്ളയടിച്ചു. ഹവാല്ലി ഗവര്‍ണറേറ്റിലുള്ള ഗള്‍ഫ് ബാങ്കിന്‍റെ ശാഖയിലാണ് പട്ടാപകല്‍ മോഷണം നടന്നത്.
ആളെ തിരിച്ചറിയാതിരിക്കാന്‍ ബുര്‍ഖ ധരിച്ച് മുഖവും ശരീരവും മറച്ച് ബാങ്കിലെത്തിയ ഇയാള്‍ മൂന്ന് ദിനാറിന്‍റെ കളിത്തോക്ക് ചൂണ്ടിയാണ് ബാങ്ക് ജീവനക്കാരെ ഭീഷണിപ്പെടുത്തിയത്. പണം കൈക്കലാക്കിയ ശേഷം അവിടെ നിന്നും ഓടി രക്ഷപ്പെട്ട ഇയാളെ പിന്നീട് പൊലീസ് പിടികൂടി.
തോക്ക് ചൂണ്ടിയ ശേഷം കൗണ്ടറിലുണ്ടായിരുന്ന ജീവനക്കാരോട് പണം ആവശ്യപ്പെടുന്നതിന്‍റെയും ഇയാളുടെ കൈയിലുണ്ടായിരുന്ന കവറിലേക്ക് ജീവനക്കാര്‍ പണം ഇട്ടുകൊടുക്കുന്നതിന്‍റെയും ദൃശ്യങ്ങള്‍ ബാങ്കിലെ സിസിടിവി ക്യാമറകളില്‍ പതിഞ്ഞിട്ടുണ്ട്.
പുറത്ത് തോക്കുമായി മൂന്ന് പേര്‍ കൂടി നില്‍ക്കുന്നുണ്ടെന്നും തന്നെ പിന്തുടരാനോ എതിര്‍ക്കാനോ ശ്രമിച്ചാല്‍ വകവരുത്തുമെന്നും ഇയാള്‍ പറഞ്ഞതായി ബാങ്ക് ജീവനക്കാര്‍ വ്യക്തമാക്കി.
വിദേശിയാണ് കൊള്ള നടത്തിയതെന്ന് നേരത്തെ സ്ഥിരീകരിച്ച പൊലീസ്, ജോര്‍ദ്ദാനിയന്‍ പൗരനെ അറസ്റ്റ് ചെയ്യുകയായിരുന്നു. ഇയാള്‍ കുറ്റം സമ്മതിച്ചു. കൊള്ളയടിച്ച പണത്തിന്‍റെ ഒരുഭാഗം ഇയാളില്‍ നിന്ന് കണ്ടെടുക്കുകയും ചെയ്തു.
تصريح صحفي: دون وقوع أي أضرار للعملاء أو الموظفين، يؤكد بنك الخليج عن حدوث سطو مسلح على أحد أفرعه وقد تم اتخاذ الإجراءات اللازمة فوراً وإحالة القضية إلى الجهات المعنية في وزارة الداخلية. و يشكر بنك الخليج سرعة استجابة وزارة الداخلية و الجهات الأمنية.
— Gulf Bank (@Gulf_Bank) September 20, 2018
ഒരു മാസം നീണ്ട തയ്യാറെടുപ്പുകള്‍ക്ക് ശേഷമാണ് പദ്ധതി നടപ്പാക്കിയതെന്ന് ഇയാള്‍ പൊലീസിനോട് പറഞ്ഞു. ബാങ്കില്‍ തിരക്ക് കുറവുള്ള സമയം തെരഞ്ഞെടുത്തു.
ആക്രമണമുണ്ടായാല്‍ പ്രതിരോധിക്കാന്‍ ശ്രമിക്കതരുതെന്ന് ബാങ്ക് ജീവനക്കാര്‍ക്ക് നിര്‍ദ്ദേശം ലഭിച്ചിട്ടുണ്ടെന്നും ഇയാള്‍ മനസിലാക്കിയിരുന്നു. താമസിക്കുന്ന സ്ഥലത്തിന്‍റെ വാടക നല്‍കാനാണ് ബാങ്ക് കൊള്ളയടിച്ചതെന്നും പ്രതി പൊലീസിനോട് പറഞ്ഞു. പ്രതിയെ തുടര്‍നടപടികള്‍ക്കായി പ്രോസിക്യൂഷന് കൈമാറി.
