WhatsApp Data Breach: നിങ്ങളുടെ വിവരങ്ങളും വിൽപ്പനയ്ക്കുണ്ടോ? വാട്സാപ്പ് ഉപയോക്താക്കളുടെ വിവരങ്ങൾ ചോർന്നതായി റിപ്പോർട്ട്

WhatsApp Users Data Leak: വാട്സാപ്പ് ഉപയോക്താക്കളുടെ വിവരങ്ങൾ വളരെ കുറഞ്ഞ വിലയ്ക്കാണ് ഹാക്കിംഗ് ഗ്രൂപ്പുകളിലും കമ്മ്യൂണിറ്റികളിലും വിൽക്കുന്നത്.

വാട്സാപ്പിന്റെ ലോകമെമ്പാടുമുള്ള 500 മില്യൺ ഉപയോക്താക്കളുടെ വിവരങ്ങൾ ചോർന്നതായി റിപ്പോർട്ട്. ഇന്ത്യയുൾപ്പെടെ 80 രാജ്യങ്ങളിലെ ഉപയോക്താക്കളുടെ വിവരങ്ങളാണ് ചോർന്നത്. റഷ്യ, ഇറ്റലി, ഈജിപ്ത്, ബ്രസീൽ, സ്പെയിൻ എന്നീ രാജ്യങ്ങളും ഇതിൽ ഉൾപ്പെടുന്നു. ഈ വിവരങ്ങൾ നിരവധി ഹാക്കിംഗ് ഗ്രൂപ്പുകളിലും കമ്മ്യൂണിറ്റികളിലും വിൽപ്പനയ്‌ക്ക് വെച്ചിരിക്കുന്നതായാണ് റിപ്പോർട്ടുള്ളത്. രണ്ട് ബില്യണിലധികം ഉപയോക്താക്കളാണ് വാട്സാപ്പിനുള്ളത്. ഇതിന്റെ നാലിലൊന്ന് അല്ലെങ്കിൽ 25 ശതമാനം ഉപയോക്താക്കളുടെ വിവരങ്ങളാണ് ചോർന്നത്. മെറ്റായുടെ ഉടമസ്ഥതയിലുള്ള ആപ്പിന് ഇത് വൻ തിരിച്ചടിയാണ്. 

സൈബർ ന്യൂസാണ് സംഭവം ആദ്യം റിപ്പോർട്ട് ചെയ്തത്. അതേസമയം മെറ്റാ ഈ സംഭവം സ്ഥിരീകരിക്കുകയോ നിഷേധിക്കുകയോ ചെയ്തിട്ടില്ല. യുഎസിലെ 32 മില്യൺ ഉപയോക്താക്കളുടെ റെക്കോർഡുകളും ഈജിപ്ത്, ഇറ്റലി, ഫ്രാൻസ്, യുകെ, റഷ്യ, ഇന്ത്യ എന്നിവിടങ്ങളിൽ നിന്നുള്ള ദശലക്ഷക്കണക്കിന് ഉപയോക്താക്കളുടെ റെക്കോർഡുകളും ഈ സെറ്റിലുണ്ടെന്ന് ഡാറ്റ വിൽപ്പനയ്ക്ക് വെച്ച വ്യക്തി അവകാശപ്പെടുന്നു. 

റിപ്പോർട്ട് അനുസരിച്ച്, വളരെ കുറഞ്ഞ വിലയ്ക്കാണ് ഉപയോക്താക്കളുടെ വിവരങ്ങൾ വിൽക്കുന്നത്. യുഎസ് ഡാറ്റാസെറ്റ് 7,000 ഡോളറിന് ലഭ്യമാണ്. അതേസമയം യുകെ ഡാറ്റാസെറ്റിന് 2,500 ഡോളർ വിലവരും. വിൽപ്പനക്കാരനെ ബന്ധപ്പെട്ടപ്പോൾ യുകെ അടിസ്ഥാനമാക്കിയുള്ള 1,097 നമ്പറുകൾ തെളിവായി അയാൾ നൽകിയതായി സൈബർ ന്യൂസ് റിപ്പോർട്ട് ചെയ്തു. സൈബർ ന്യൂസ് ഈ നമ്പറുകൾ പരിശോധിച്ച് അവ വാട്സാപ്പ് അക്കൗണ്ടുകളിൽ നിന്നുള്ളതാണെന്ന് സ്ഥിരീകരിക്കുകയായിരുന്നു.

സ്മിഷിംഗ്, വിഷിംഗ് തുടങ്ങിയ സൈബർ കുറ്റകൃത്യങ്ങൾക്കായി ഇത്തരം വിവരങ്ങൾ പലപ്പോഴും ഉപയോഗിക്കാറുണ്ട്. ഉപയോക്താവിന് സന്ദേശം  അയയ്ക്കുകയും ഒരു ലിങ്കിൽ ക്ലിക്ക് ചെയ്യാൻ ആവശ്യപ്പെടുകയും ചെയ്ത് തട്ടിപ്പ് നടത്തുന്നതാണ് സ്മിഷിംഗ്, വിഷിംഗ് എന്നിവ. ഇത്തരത്തിൽ ലിങ്ക് ക്ലിക്ക് ചെയ്ത ശേഷം അവരുടെ ക്രെഡിറ്റ് കാർഡോ മറ്റ് വ്യക്തിഗത വിവരങ്ങളോ നൽകാൻ ഉപയോക്താവിനോട് ആവശ്യപ്പെടും.

മെറ്റായുടെ ഉടമസ്ഥതയിലുള്ള ഒരു പ്ലാറ്റ്‌ഫോമിൽ ഡാറ്റാ ലംഘനം സംഭവിക്കുന്നത് ഇത് ആദ്യ സംഭവമല്ല. കഴിഞ്ഞ വർഷം, ഇന്ത്യയിൽ നിന്നുള്ള ആറ് മില്യൺ റെക്കോർഡുകൾ ഉൾപ്പെടെ 500 മില്യണിലധികം ഫേസ്ബുക്ക് ഉപയോക്താക്കളുടെ സ്വകാര്യ വിവരങ്ങൾ ചോർന്നതായാണ് ആരോപണം. ചോർന്ന ഡാറ്റയിൽ ഫോൺ നമ്പറുകളും മറ്റ് വിവരങ്ങളും ഉൾപ്പെടുന്നു.

2019ൽ 419 മില്യൺ ഫേസ്ബുക്ക് ഉപയോക്താക്കളുടെയും 49 മില്യൺ ഇൻസ്റ്റാഗ്രാം ഉപയോക്താക്കളുടെയും വിവരങ്ങൾ ചോർന്നിരുന്നു. അതേ വർഷം തന്നെ 267 മില്യൺ ഉപയോക്താക്കളുടെ വിവരങ്ങൾ ചോർന്ന് കൊണ്ട് മറ്റൊരു ലംഘനം കൂടി നടന്നിരുന്നു.

ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്...  മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEE MALAYALAM App ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...

ios Link - https://apple.co/3hEw2hy