കൊറോണ ബാധിക്കുന്നത് മാംസാഹാരികളെ മാത്രമെന്ന് WHO? ഒരു വെജിറ്റേറിയനും ഇതുവരെ മരിച്ചിട്ടില്ല?

കൊറോണ വൈറസ് പൊട്ടി പുറപ്പെട്ടത് മുതല്‍ സമൂഹ മാധ്യമങ്ങളില്‍ ഇത്തരം വ്യാജ വാര്‍ത്തകളുടെ കുത്തൊഴുക്കാണ്. 

COVID-19നെക്കുറിച്ച് പൂര്‍ണമായ വിവരങ്ങള്‍ ഇനിയും പുറത്ത് വന്നിട്ടില്ല. ഈ സാഹചര്യത്തിലാണ് COVID-19ന്‍റെ "കാരണങ്ങൾ", "രോഗപ്രതിരോധം", "ചികിത്സ" എന്നിവ അവകാശപ്പെടുന്ന രീതിയില്‍ തെറ്റായ സന്ദേശങ്ങൾ സോഷ്യൽ മീഡിയയിൽ പ്രചരിക്കുന്നത്.

COVID-19 ബാധിക്കുന്നത് മാംസാഹാരികൾക്ക് മാത്ര൦. കൊറോണ വൈറസ് ബാധിച്ച് ഒരു വെജിറ്റേറിയനും ഇതുവരെ മരിച്ചിട്ടില്ല.  -ഇതൊക്കെയാണ് പുതിയ 'വാര്‍ത്ത'കള്‍. 

ചൈനയിലെ ആളുകൾ വവ്വാലുകൾ കഴിക്കുന്നതിനാലാണ് കൊറോണ വൈറസ് ഉണ്ടായതെന്ന അഭ്യൂഹങ്ങളുടെ അടിസ്ഥാനത്തിലാണ് ഇപ്പോള്‍ വ്യാജ വാര്‍ത്തകള്‍ പ്രചരിക്കുന്നത്. ഈ വാര്‍ത്ത പ്രചരിച്ചതോടെ ചിക്കൻ, മുട്ട, മറ്റ് കോഴി ഉൽപന്നങ്ങൾ തുടങ്ങിയ നോണ്‍-വെജിറ്റേറിയൻ ഭക്ഷ്യവസ്തുക്കളുടെ വിൽപ്പനയില്‍ കാര്യമായ ഇടിവുണ്ടായി. 

വെജിറ്റേറിയൻ ഭക്ഷണക്രമം പിന്തുടരുന്ന ആരും ഇതുവരെ മരിച്ചിട്ടില്ലെന്ന് ലോകാരോഗ്യ സംഘടന  അറിയിച്ചു എന്നാണ് വാര്‍ത്തയില്‍ പറയുന്നത്.

വാര്‍ത്തകള്‍ പ്രചരിച്ചതോടെ കൊറോണ വൈറസിനെ പ്രതിരോധിക്കാന്‍ നിരവധി ആളുകള്‍ നോണ്‍-വെജ് കഴിക്കുന്നത് അവസാനിപ്പിച്ചു എന്നതാണ് വാസ്തവം. 

എന്താണെങ്കിലും ഈ വാര്‍ത്തകള്‍ വ്യാജമാണ്. ലോകാരോഗ്യ സംഘടന ഇത്തരം പ്രസ്താവനകള്‍ ഒന്നും തന്നെ നടത്തിയിട്ടില്ല. വാസ്തവത്തിൽ, നോൺ-വെജിറ്റേറിയൻ ഭക്ഷണമാണ് കൊറോണ വൈറസ് ഉണ്ടാകുന്നതെന്ന് തെളിവുകളൊന്നുമില്ല. കോഴി, മട്ടൺ, സീഫുഡ് എന്നിവ കഴിക്കുന്നതിലൂടെ COVID-19 അണുബാധ പടരുമെന്ന ആശങ്ക ലോകാരോഗ്യ സംഘടന സ്ഥിരീകരിച്ചിട്ടില്ല.