7th Pay Commission: સરકારી કર્મચારીઓ માટે નવા વર્ષ પહેલાં મોટી ખુશખબર, પગારધોરણમાં આટલો વધારો

નવી દિલ્હીઃ કેન્દ્ર સરકારના કર્મચારીઓને આ વર્ષે અનેક બેનીફિટ્સ મળ્યા છે. ત્યારે હવે રાજ્ય સરકારે પણ પોતાના કર્મચારીઓની સેલેરીમાં વધારો કરી રહી છે. હિમાચલ પ્રદેશ સરકારે છઠ્ઠા પગાર પંચ હેઠળ તેના કર્મચારીઓ માટે નવા પગાર ધોરણની જાહેરાત કરી છે. સરકારના એક પ્રવક્તાએ આ માહિતી આપી છે. રાજ્ય સરકારે જાહેરાત કરી છે કે કોન્ટ્રાક્ટ પરના કર્મચારીઓને હવે બે વર્ષમાં નિયમિત કરવામાં આવશે.

રાજ્ય સરકારની જાહેરાત-
નોંધનીય છે કે, અત્યાર સુધી કોન્ટ્રાક્ટ કર્મચારીઓને ત્રણ વર્ષમાં નિયમિત કરી દેવામાં આવે છે. ત્યારે હિમાચલ પ્રદેશ નોન-ગેઝેટેડ એમ્પ્લોઇઝ ફેડરેશનની સંયુક્ત સંકલન સમિતિ (JCC) ને સંબોધિત કરતી વખતે, મુખ્યમંત્રી જય રામ ઠાકુરે રાજ્ય સરકારના કર્મચારીઓ માટે નવા પગાર ધોરણોની જાહેરાત કરી. માહિતી અનુસાર, જાન્યુઆરી, 2022નો પગાર સુધારેલા પગાર ધોરણ મુજબ ફેબ્રુઆરી, 2022માં મળવાપાત્ર થશે.

ક્યારથી મળશે સંશોધિત પેન્શનનો લાભ-
જય રામ ઠાકુરે જણાવ્યું હતું કે, રાજ્ય સરકાર તેના કુલ બજેટના લગભગ 43% કર્મચારીઓ અને પેન્શનરો પર ખર્ચ કરી રહી છે. છઠ્ઠા પગાર પંચના અમલ બાદ તે વધીને 50 ટકા થઈ જશે. મુખ્યમંત્રીએ કહ્યું કે, તમામ પેન્શનરો અને ફેમિલી પેન્શનરોને પણ 1 જાન્યુઆરી, 2016થી સુધારેલું પેન્શન અને અન્ય પેન્શન લાભો આપવામાં આવશે.

કેન્દ્ર સરકાર પણ કરી રહી છે તૈયારી-
બીજી તરફ કેન્દ્ર સરકાર પણ પોતાના કર્મચારીઓને ખુશખબર આપવાનું વિચારી રહી છે. નવા વર્ષની શરૂઆતમાં કર્મચારીઓના હાઉસ રેન્ટ એલાઉન્સ (HRA)માં વધારો થવાની ધારણા છે. જો આમ થશે તો કેન્દ્રીય કર્મચારીઓનો પગાર પણ વધશે. ઈન્ડિયન રેલવે ટેકનિકલ સુપરવાઈઝર એસોસિએશન (આઈઆરટીએસ) અને નેશનલ ફેડરેશન ઑફ રેલ્વેમેન (એનએફઆઈઆર) કર્મચારીઓની એચઆર વધારવાની માંગ પર પણ વિચાર કરવામાં આવી રહ્યો છે.

શહેર મુજબ મળે છે HRA-
નોંધનીય છે કે, હાઉસ રેન્ટ એલાઉન્સ (HRA)ની શ્રેણીને X, Y અને Z વર્ગના શહેરો અનુસાર વિભાજિત કરવામાં આવી છે. એટલે કે એક્સ કેટેગરીમાં આવતા કર્મચારીઓને હવે પ્રતિ માસ 5400 રૂપિયાથી વધુ HRA મળશે. આ પછી, Y વર્ગના વ્યક્તિને દર મહિને 3600 રૂપિયા અને પછી Z વર્ગના વ્યક્તિને દર મહિને 1800 રૂપિયા મળશે. 50 લાખથી વધુ વસ્તી ધરાવતા શહેરો X શ્રેણીમાં આવે છે. આ શહેરોમાં કેન્દ્રીય કર્મચારીઓને 27% HRA મળશે. Y શ્રેણીના શહેરોમાં તે 18 ટકા અને Z શ્રેણીમાં 9 ટકા રહેશે.