ગુજરાતમાં આવી ગઈ છે વર્લ્ડકપ 2019ની ટ્રોફી, જોવા માટે લેવી પડશે આ સ્થળની મુલાકાત

અમદાવાદઃ ઈન્ટરનેશનલ ક્રિકેટ કાઉન્સિલ (આઈસીસી) વર્લ્ડ કપ 2019ની ટ્રોફી અમદાવાદ આવી પહોંચી છે. આ સમયે ટ્રોફીને વિશ્વભરમાં ફેરવવામાં આવી રહી છે અને ભારત તેનો આઠમો પડાવ છે. ભારતમાં આ ટ્રોફી કુલ 23 દિવસોમાં રહેશે. ટ્રોફીને અલગ-અલગ કુલ નવ શહેરોમાં ફેરવવામાં આવશે. જેના ભાગ રૂપે અમદાવાદમાં વિશ્વકપની ટ્રોફી પ્રદર્શન માટે આવી પહોંચી છે. તમારે આ ટ્રોફી જોવા માટે અમદાવાદ વન મોલની મુલાકાત લેવી પડશે. 

મહત્વનું છે કે, આગામી વર્ષે ઈંગ્લેન્ડમાં વિશ્વકપ 2019નો પ્રારંભ થવાનો છે. વિશ્વકપનો સંપૂર્ણ કાર્યક્રમ પણ જાહેર થઈ ગયો છે. આ વર્ષે કુલ 10 ટીમ ભાગ લઈ રહી છે. 1992ના વિશ્વકપની જેમ આ વિશ્વકપનું ફોર્મેટ રાખવામાં આવ્યું છે. દરેક ટીમ એકબીજી ટીમ સામે રમશે. જેથી દરેક ટીમને વિશ્વકપમાં કુલ 9 મેચ રમવા મળશે. 

જાણો વિશ્વકપમાં ભારતીય ટીમનો કાર્યક્રમ
ભારતીય ટીમ પાંચ જૂન 2019થી વિશ્વકપમાં પોતાના અભિયાનનો પ્રારંભ કરશે. 16 જૂને ભારત તેના કટ્ટર હરીફ પાકિસ્તાન સામે ટકરાશે. 

5 જૂન વિરુદ્ધ સાઉથ આફ્રિકા
9 જૂન વિરુદ્ધ ઓસ્ટ્રેલિયા
13 જૂન વિરુદ્ધ ન્યૂઝીલેન્ડ
16 જૂન વિરુદ્ધ પાકિસ્તાન
22 જૂન વિરુદ્ધ અફગાનિસ્તાન
27 જૂન વિરુદ્ધ વેસ્ટ ઈન્ડિઝ
30 જૂન વિરુદ્ધ ઈંગ્લેન્ડ
2 જુલાઇ વિરુદ્ધ બાંગ્લાદેશ
6 જુલાઇ વિરુદ્ધ શ્રીલંકા

વિશ્વકપની પ્રથમ સેમિ ફાઇનલ 9 જુલાઈ અને બીજી સેમિ ફાઇનલ 11 જુલાઇએ રમાશે. વિશ્વકપનો ફાઇનલ લોર્ડ્સના ઐતિહાસિક મેદાન પર 14 જુલાઈએ રમાશે.