મહિલા એશિયા કપઃ ભારતે થાઈલેન્ડને આપ્યો પરાજય, મેળવ્યો સતત બીજો વિજય

નવી દિલ્હીઃ કેપ્ટન હરમનપ્રીતના ઓલરાઉન્ડર દેખાવની મદદથી ભારતીય મહિલા ટીમે ટી20 એશિયા કપમાં સોમવારે થાઈલેન્ડને 66 રનથી હરાવીને ટૂર્નામેન્ટમાં સતત બીજી જીત મેળવી. ભારતે કુઆલાલ્મપુરમાં રમાયેલી આ મેચમાં 4 વિકેટ ગુમાવીને 132 રન બનાવ્યા હતા જેના જવાબમાં થાઇલેન્ડની ટીમ 20 ઓવરમાં 8 વિકેટે 66 રન બનાવી શકી હતી. 

ભારતીય ટીમે ટૂર્નામેન્ટમાં સતત બીજી જીત મેળવી. આ પહેલા ટીમ ઈન્ડિયાએ મલેશિયાને માત્ર 27 રનમાં ઓલઆઉટ કરીને પોતાનો પ્રથમ મેચ 142 રને જીત્યો હતો. 

પંજાબની 29 વર્ષીય ઓલરાઉન્ડર હરમનપ્રીતે બેટિંગની સાથે બોલિંગમાં કમાલ કર્યો. તેણે 17 બોલમાં 3 ફોરની મદદથી 27 રન ફટકાર્યા. તેણે અનુજા પાટિલ સાથે ચોથી વિકેટ માટે 49 રનની ભાગીદારી કરી. બોલિંગમાં પણ તે સૌથી વધુ વિકેટ લેનાર બોલર રહી. તેણે 3 ઓવરમાં માત્ર 11 રન આપીને 3 વિકેટ ઝડપી. આ શાનદાર પ્રદર્શનને કારણે તેને મેન ઓફ ધ મેચનો એવોર્ડ આપવામાં આવ્યો હતો. 

થાઈલેન્ડનું ખરાબ પ્રદર્શન
133નો ટાર્ગેટ હાસિલ કરવા ઉતરેલી થાઈલેન્ડની ટીમના માત્ર 3 બેટ્સમેનો બે અંકના સ્કોર કરવામાં સફળ રહ્યાં. બૂચાથમે 40 બોલમાં 21 અને જ્યારે ઓપરન ચાઇવાઇએ 28 બોલમાં 1 ફોરની મદદથી 14 રન બનાવ્યા. ટીમના બે બેટ્સમેનતો ખાતુ ખોલાવ્યા વિના પેવેલિયન પરત ફર્યા હતા. ભારત તરફથી હરમને 3, દીપ્તિ શર્માએ 2 અને પૂનમ યાદવ તથા પૂજા વસ્ત્રાકારને 1-1 વિકેટ મળી હતી.