LDF പോസ്റ്റർ നശിപ്പിച്ചത് ചോദ്യം ചെയ്ത DYFI നേതാവിനെ ബിജെപി സംഘം വീട്ടിൽക്കയറി വെട്ടി!

Crime News: സംഭവം നടന്നത് ബുധനാഴ്ച രാത്രിയായിരുന്നു. അക്രമിസംഘം കത്തിയും സിമൻറ് കട്ടയും മൺവെട്ടിയും ഉപയോഗിച്ചായിരുന്നു ആക്രമണം നടത്തിയത്.

തിരുവനന്തപുരം: ആറ്റിങ്ങലിലെ എൽഡിഎഫ് സ്ഥാനാർത്ഥി വി ജോയിയുടെ പോസ്റ്റർ നശിപ്പിച്ചത് ചോദ്യം ചെയ്ത ഡിവൈഎഫ്ഐ നേതാവിനെ വീട്ടിൽക്കയറി വെട്ടിയതായി റിപ്പോർട്ട്. ഡിവൈഎഫ്ഐ പുളിമാത്ത് മേഖലാ കമ്മിറ്റി അംഗം സുജിത്തിനെയാണ് ആക്രമിച്ചത്.

സംഭവം നടന്നത് ബുധനാഴ്ച രാത്രിയായിരുന്നു. അക്രമിസംഘം കത്തിയും സിമൻറ് കട്ടയും മൺവെട്ടിയും ഉപയോഗിച്ചായിരുന്നു ആക്രമണം നടത്തിയത്.  സംഭവത്തിൽ സുജിത്തിന്റെ കൈയ്ക്ക് വെട്ടേൽക്കുകയും തലയ്ക്ക് ഗുരുതരമായ പരിക്കേൽക്കുകയും ചെയ്തിട്ടുണ്ട്. ആക്രമണത്തെ തുടർന്ന് സുജിത്തിനെ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചിട്ടുണ്ട്. 

സംഭവത്തെ കുറിച്ച് പോലീസ് പറയുന്നത് ഇപ്രകാരമാണ് കമുകിൻകുഴി ജംഗ്ഷനിൽ സ്ഥാപിച്ച എൽഡിഎഫ് പോസ്റ്റർ ബിജെപി സംഘം നശിപ്പിച്ചിരുന്നു, ഇതിന് പകരമായി വീണ്ടും പോസ്റ്റർ ഒട്ടിക്കാൻ സുജിത്തടക്കമുള്ള സിപിഎം പ്രവർത്തകർ എത്തിയപ്പോൾ ബിജെപി സംഘം ഇവരെ തടഞ്ഞിരുന്നു. ഇതിന്റെ ബാക്കിയെന്നോളമായിരിക്കും സുജിത്തിനെ വീടുകയറി ആക്രമിച്ചതെന്നാണ് പരാതി.  

സുജിത്തിനെ ആക്രമിക്കനെത്തിയ ആളെ നാട്ടുകാർ തടഞ്ഞുവെക്കുകയും അക്രമിയിൽ നിന്ന് വെട്ടുകത്തിയും ഇരുമ്പ് വടിയും അടക്കമുള്ള ആയുധങ്ങൾ പോലീസ് പിടിച്ചെടുത്തു. സംഭവവുമായി ബന്ധപ്പെട്ട് ഒരാളെ കിളിമാനൂർ പോലീസ് കസ്റ്റഡിയിലെടുത്തു.