Crime News: നടുറോഡിൽ ഭാര്യയെയും സുഹൃത്തിനെയും തീകൊളുത്തി; ശേഷം സ്റ്റേഷനിലെത്തി കീഴടങ്ങലും

ഭാര്യ ബേക്കറി അടച്ച് വരുന്നതും കാത്ത് നിന്ന പ്രതി ഇവർ സഞ്ചരിച്ചിരുന്ന കാറിന് മുന്നിൽ വാൻ കുറുകെയിട്ട് തടഞ്ഞ ശേഷം പെട്രോൾ ഒഴിച്ച് തീ കൊളുത്തുകയായിരുന്നു.

കൊല്ലം: ചെമ്മാംമുക്കിൽ കാറിൽ സഞ്ചരിക്കുകയായിരുന്ന ഭാ​ര്യയെ പെട്രോളൊഴിച്ച് തീയിട്ട് കൊന്ന ഭർത്താവ് അറസ്റ്റിൽ. പത്മരാജൻ എന്നയാളാണ് പൊലീസ് സ്റ്റേഷനിലെത്തി കീഴടങ്ങിയത്. ഭാര്യയേയും സുഹൃത്തിനേയും പെട്രോളൊഴിച്ചു തീ കൊളുത്തിയെന്ന് പത്മരാജൻ സ്റ്റേഷനിലെത്തി അറിയിക്കുകയായിരുന്നുവെന്ന് പൊലീസ് പറഞ്ഞു. കൊട്ടിയം സ്വദേശി അനിലയാണ് മരിച്ചത്. ഇവർക്കൊപ്പമുണ്ടായിരുന്ന സുഹൃത്തും തഴുത്തല സ്വദേശിയുമായ സോണിക്ക് പൊള്ളലേറ്റു. ഇയാളെ ആശുപത്രിയിൽ പ്രവേശിപ്പിച്ചു. രാത്രി 9 മണിയോടെയാണ് സംഭവം.

കാറിൽ സഞ്ചരിക്കുകയായിരുന്ന ഇരുവരെയും വാൻ കുറുകെയിട്ട് തടഞ്ഞ ശേഷം പെട്രോൾ ഒഴിച്ച് തീ കൊളുത്തുകയായിരുന്നു. എന്നാൽ  ഭാര്യക്കൊപ്പം ലക്ഷ്യമിട്ടത് മറ്റൊരാളെയാണെന്നും പ്രതി പൊലീസിനോട് പറഞ്ഞു. കൊട്ടിയത്ത് കേറ്ററിങ് സ്ഥാപനം നടത്തുകയാണ് പത്മരാജൻ. അനില കടപ്പാക്കട നായേഴ്സ് ജംക്ഷന് സമീപം ബേക്കറി നടത്തി വരികയായിരുന്നു. ഈ ബേക്കറിയിലെ ജീവനക്കാരനാണ് സോണി.

 കുടുംബ പ്രശ്നവും സാമ്പത്തിക പ്രശ്നവുമാണ് കൊലപാതകത്തിന് കാരണമെന്ന് പ്രതി പറഞ്ഞു. ഇൻക്വസ്റ്റ് നടപടികൾ ഇന്ന് നടത്തുമെന്ന് പൊലീസ് വ്യക്തമാക്കി. തീ കൊളുത്തുന്നതിനിടെ പത്മരാജന് പൊള്ളലേറ്റിരുന്നു. തുടർന്ന് ഇയാൾ ഓട്ടോറിക്ഷയിൽ കയറി സ്റ്റേഷനിലെത്തി കീഴടങ്ങുകയായിരുന്നു.