Winter Diseases: ശൈത്യകാല രോ​ഗങ്ങളെ പ്രതിരോധിക്കാം; ഇക്കാര്യങ്ങൾ ശ്രദ്ധിക്കുക

Heart Health In Winter: ഹൃദയാഘാതം, വിഷാദം, ചുമ, ആസ്ത്മ തുടങ്ങിയ നിരവധി രോഗങ്ങൾ ശൈത്യകാലത്ത് ഉണ്ടാകാനുള്ള സാധ്യത കൂടുതലാണ്.

ശൈത്യകാലം അടുത്തെത്തി. ശൈത്യകാലം വളരെ മനോഹരമായ സമയമാണ്. എന്നാൽ, ശൈത്യകാലത്ത് നിരവധി രോ​ഗങ്ങളും പിടികൂടാനുള്ള സാധ്യത കൂടുതലാണ്. ഹൃദയാഘാതം, വിഷാദം, ചുമ, ആസ്ത്മ തുടങ്ങിയ നിരവധി രോഗങ്ങളും ഈ സമയം ഉണ്ടാകും. ശൈത്യകാലത്ത് ഉണ്ടാകാൻ സാധ്യതയുള്ള ആരോ​ഗ്യപ്രശ്നങ്ങളും ഇതിനെ എങ്ങനെ പ്രതിരോധിക്കാമെന്നും നോക്കാം.

ജലദോഷപ്പനി: ശൈത്യകാലത്ത് ആളുകൾ പൊതുവെ വീടുകളിൽ തുടരും. ഈ സമയം വിറ്റാമിൻ ഡി ലഭിക്കുന്നതിന് ആവശ്യമായ സൂര്യപ്രകാശം നമുക്ക് ലഭിക്കുന്നില്ല. ഇത് നമ്മുടെ ശരീരത്തിന്റെ പ്രതിരോധ സംവിധാനത്തെ മോശമാക്കുന്നു. ഇത് വൈറസ് പിടിപെടാനും ഇൻഫ്ലുവൻസ ബാധിക്കാനും സാധ്യത വർധിപ്പിക്കുന്നു. ഇൻഫ്ലുവൻസ വൈറസ് തണുപ്പുകാലത്ത് കൂടുതൽ നിലനിൽക്കുമെന്ന് കണ്ടെത്തിയിട്ടുണ്ട്. അതിനാൽ, ഈ അവസ്ഥ ഒഴിവാക്കാൻ, ബ്ലൂബെറി, ബ്രോക്കോളി, ഇഞ്ചി, ചീര മുതലായവ പോലുള്ള പ്രതിരോധശേഷി വർധിപ്പിക്കുന്ന ഭക്ഷണം കഴിക്കുക. ഫ്ലൂ ആന്റി വൈറൽ മരുന്നുകൾ കഴിക്കുകയും നല്ല ആരോഗ്യ ശീലങ്ങൾ പാലിക്കുകയും വേണം.

സന്ധി വേദന: തണുപ്പുകാലത്തെ താഴ്ന്ന താപനിലയാണ് സന്ധി വേദന വഷളാകുന്നതിന് പ്രധാന കാരണം. താഴ്ന്ന ഊഷ്മാവ് നമ്മുടെ ശരീരത്തെ സന്ധിവേദനയിലേക്ക് നയിക്കുന്നു. ശീതകാലം ശരീരത്തിലെ വേദന റിസപ്റ്ററുകളുടെ സംവേദനക്ഷമത വർധിപ്പിക്കുന്നു.

ആസ്ത്മ: ശൈത്യകാലത്ത്, അലർജി വർധിക്കുന്നു. ജലദോഷം ആസ്ത്മയുടെ ട്രിഗറായി പ്രവർത്തിക്കുന്നു. വരണ്ടതും തണുത്തതുമായ വായു കാരണം ശ്വാസനാളങ്ങൾ പ്രകോപിതമായേക്കാം.

ഹൃദയാരോഗ്യം: പ്രായമായവരിൽ ശരീര താപനില (ഹൈപ്പോതെർമിയ) കുറയുന്നത് അവരുടെ ഹൃദയാരോ​ഗ്യം കൂടുതൽ അപകടത്തിലാക്കുന്നു. ഉയർന്ന ഹൃദയമിടിപ്പും രക്തസമ്മർദ്ദവും ഹൃദയത്തെ സമ്മർദ്ദത്തിലാക്കുന്നു, ഇത് ശരീര താപനില നിലനിർത്താൻ കഠിനമായി പ്രവർത്തിക്കാൻ നിർബന്ധിതരാകുന്നു. ഈ മാറ്റങ്ങൾ രക്തം കട്ടപിടിക്കുന്നതിനോ രക്തക്കുഴലുകൾ കട്ടിയാകുന്നതിനോ ഉള്ള സാധ്യത വർധിപ്പിക്കുന്നു. ഇത് ഹൃദയാഘാതത്തിലേക്ക് നയിക്കാം.

വരണ്ട ചർമ്മം: ശൈത്യകാലത്തെ ഏറ്റവും സാധാരണമായ പ്രശ്നങ്ങളിലൊന്നാണ് ചർമ്മം വരണ്ടതാകുന്നത്. പുറത്തെ തണുത്ത കാലാവസ്ഥ നിങ്ങളുടെ ചർമ്മത്തിലെ വെള്ളം വേഗത്തിൽ ബാഷ്പീകരിക്കുന്നു. ഇതാണ് നിങ്ങളുടെ ചർമ്മത്തെ വരണ്ടതാക്കുന്നത്. ഇത് ചൊറിച്ചിൽ, വിള്ളൽ തുടങ്ങിയ അവസ്ഥകളിലേക്ക് ചർമ്മത്തെ നയിക്കും.

തൊണ്ട വേദന: തൊണ്ടവേദന വേദനാജനകമാണ്. അണുബാധ മൂലമുണ്ടാകുന്ന പനി കഠിനമായ തൊണ്ടവേദനയ്ക്ക് കാരണമാകും. ശൈത്യകാലത്ത് ജലദോഷം, തൊണ്ടവേദന എന്നീ രോ​ഗങ്ങൾ ഉണ്ടാകാനുള്ള സാധ്യത വളരെയധികമാണ്.

ശൈത്യകാല രോ​ഗങ്ങളിൽ നിന്ന് എങ്ങനെ സുരക്ഷിതരായിരിക്കാം?

ഇടയ്ക്കിടെ കൈ കഴുകുക, പൊടിപടലങ്ങൾ തടയാൻ വായും മൂക്കും മൂടുക, ധാരാളം വെള്ളം കുടിക്കുക എന്നിവയിലൂടെ രോഗപ്രതിരോധ ശേഷി നിലനിർത്താനും രോഗങ്ങൾ തടയാനും സാധിക്കും. പഴങ്ങളും പച്ചക്കറികളും അടങ്ങിയ പോഷകസമൃദ്ധമായ ഭക്ഷണക്രമം പിന്തുടരുന്നതും വ്യായാമം ചെയ്യുന്നതും പ്രധാനമാണ്.

സമീകൃതാഹാരം ശീലമാക്കുന്നതിലൂടെ ശരീരത്തിന് കൂടുതൽ ഫലപ്രദമായി പ്രവർത്തിക്കാൻ കഴിയും. ആരോ​ഗ്യകരമായ ജീവിതശൈലിയും കൃത്യമായ വ്യായാമവും ശീലമാക്കിയ ആളുകൾക്ക് ജലദോഷവും പനിയും ഉണ്ടാകാനുള്ള സാധ്യത കുറവാണ്, കാരണം ശാരീരിക പ്രവർത്തനങ്ങൾ രോഗപ്രതിരോധ സംവിധാനത്തെ ശക്തിപ്പെടുത്തുന്നു. സ്വയം ചികിത്സയും ആന്റിബയോട്ടിക് ഉപയോഗവും ഒഴിവാക്കുക.