ന്യൂഡല്ഹി: കോണ്ഗ്രസ് നേതാവ് ജനറല്സെക്രട്ടറി പ്രിയങ്ക ഗാന്ധിയുടെ വസതിയില് ഉണ്ടായ ഗുരുതരമായ സുരക്ഷാ വീഴ്ചയില് കര്ശന നടപടികളുമായി കേന്ദ്ര സര്ക്കാര്.
സംഭവത്തെക്കുറിച്ച് സര്ക്കാര് ഉന്നതതല അന്വേഷണം പ്രഖ്യാപിച്ചു. കൂടാതെ 3 സിആര്പിഎഫ് ജവാന്മാരെ സസ്പെന്ഡ് ചെയ്തതായും കേന്ദ്ര ആഭ്യന്തരമന്ത്രി അമിത് ഷാ പാര്ലമെന്റില് അറിയിച്ചു. അതേസമയം, സുരക്ഷയില് ഒരു ശതമാനം പോലും വിട്ടുവീഴ്ച ചെയ്യാന് സര്ക്കാര് ആഗ്രഹിക്കുന്നില്ലെന്നും വ്യക്തമാക്കി. സുരക്ഷാ ഭടന്മാര്ക്ക് ആശയക്കുഴപ്പമുണ്ടായതാണ് സുരക്ഷാ വീഴ്ചയ്ക്ക് കാരണമെന്നും അദ്ദേഹം പറഞ്ഞു.
പ്രിയങ്കയുടെ വസതിയിലേക്ക് രാഹുല് ഗാന്ധി എത്തുമെന്നു പറഞ്ഞ സമയത്തുതന്നെ അദ്ദേഹത്തിന്റേതിനു സമാനമായ വാഹനത്തില് ഏതാനും കോണ്ഗ്രസ് പ്രവര്ത്തകര് എത്തിയതാണു സുരക്ഷാ ഭടന്മാര്ക്ക് ആശയക്കുഴപ്പമുണ്ടാക്കിയത്, അദ്ദേഹം പറഞ്ഞു.
ചൊവ്വാഴ്ചയും ഈ വിഷയത്തില് അദ്ദേഹം സഭയില് മറുപടി നല്കിയിരുന്നു. കോണ്ഗ്രസ് ജനറല്സെക്രട്ടറി പ്രിയങ്കാ ഗാന്ധിയുടെ വസതിയിലുണ്ടായ സുരക്ഷാ വീഴ്ച തികച്ചും യാദൃശ്ചികമെന്നായിരുന്നു അദ്ദേഹം അഭിപ്രായപ്പെട്ടത്.
പ്രിയങ്കാ ഗാന്ധിയുടെ വസതിയിലുണ്ടായ സുരക്ഷാ വീഴ്ചയോടെ തങ്ങളുടെ നേതാക്കളുടെ ജീവന് അപകട സാധ്യതയേറുകയാണെന്ന് വ്യക്തമായിരിക്കുകയാണെന്ന കോണ്ഗ്രസ് എം.പിമാരുടെ വാദത്തിന് മറുപടി നല്കവേ ആണ് അമിത് ഷാ ഇപ്രകാരം പറഞ്ഞത്.