CMDRF: ദുരിതാശ്വാസ നിധി: കോൺഗ്രസിൽ തമ്മിലടി രൂക്ഷം; കെ. സുധാകരനെതിരെ ചെന്നിത്തലയും സതീശനും

CMDRF Ramesh Chennithala reply to Sudhakaran: മുഖ്യമന്ത്രിയുടെ ദുരിതാശ്വാസ നിധിയിലേയ്ക്ക് രമേശ് ചെന്നിത്തല ഒരു മാസത്തെ ശമ്പളം സംഭാവനയായി അനുവദിച്ചതിന് പിന്നാലെയാണിത്.

തിരുവനന്തപുരം: വയനാട്ടിലെ ഉരുൾപൊട്ടൽ ദുരന്തത്തിൽ മുഖ്യമന്ത്രിയുടെ ദുരിതാശ്വാസ നിധിയിലേയ്ക്ക് സംഭാവന നൽകിയതുമായി ബന്ധപ്പെട്ട് കോൺഗ്രസിൽ തമ്മിലടി. മുഖ്യമന്ത്രിയുടെ ദുരിതാശ്വാസ നിധിയിലേയ്ക്ക് മുതിർന്ന കോൺഗ്രസ് നേതാവ് രമേശ് ചെന്നിത്തല ഒരു മാസത്തെ ശമ്പളം സംഭാവനയായി അനുവദിച്ചതിന് പിന്നാലെയാണ് കേൺഗ്രസിൽ പൊട്ടിത്തെറി ആരംഭിച്ചത്. സംഭാവന നൽകിയതിനെ വിമർശിച്ച് കെപിസിസി അധ്യക്ഷൻ കെ.സുധാകരൻ രംഗത്ത് വരികയായിരുന്നു. 

സർക്കാരിന് സംഭാവന നൽകണമെന്ന് ഇവിടെയാരും പറഞ്ഞിട്ടില്ലെന്നും ഇടതുപക്ഷത്തിന് പണം നൽകേണ്ട കാര്യമില്ലെന്നുമായിരുന്നു കെ സുധാകരന്റെ പ്രതികരണം. സംഭാവന നൽകാൻ കോൺഗ്രസിന്റെ ഫോറങ്ങളുണ്ട്. അതിലൂടെയാണ് സംഭാവന നൽകേണ്ടിയിരുന്നതെന്നും സുധാകരൻ പറഞ്ഞിരുന്നു. എന്നാൽ, വയനാട് ദുരന്തത്തിന്റെ പശ്ചാത്തലത്തിൽ മുഖ്യമന്ത്രിയുടെ ദുരിതാശ്വാസ നിധിയിലേയ്ക്ക് പണം അനുവദിച്ചത് ശരിയായ നടപടിയാണെന്നായിരുന്നു ചെന്നിത്തലയുടെ പ്രതികരണം. 

'കക്ഷിരാഷ്ട്രീയത്തിനും മറ്റു ചിന്താഗതികൾക്കും അപ്പുറത്ത് ദുരിതമനുഭവിക്കുന്നവരെ ഒരുമിച്ചു നിന്ന് സഹായിക്കുകയാണ് ഇപ്പോൾ വേണ്ടത്. അതിനാലാണ് എംഎൽഎ ശമ്പളം ദുരിതാശ്വാസ നിധിയിലേക്ക് നൽകിയത്. പ്രളയ സമയത്തും ഇങ്ങനെ ചെയ്തിരുന്നു. അതേ പാത പിന്തുടരാനാണ് ഇത്തവണയും അങ്ങനെ ചെയ്തത്. ഇക്കാര്യത്തിൽ കോൺഗ്രസിന് അഭിപ്രായ വ്യത്യാസം ഇല്ല'. രമേശ് ചെന്നിത്തല പറഞ്ഞു.

ദുരിതാശ്വാസ നിധി വകമാറ്റി ചെലവഴിക്കുകയാണെങ്കിൽ അതിനെതിരെ നേരത്തെയും പോരാടിയിട്ടുണ്ടെന്ന് ചെന്നിത്തല ചൂണ്ടിക്കാട്ടി. ഇപ്പോൾ രാഷ്ട്രീയം കാണേണ്ട സമയമല്ല. പാർട്ടിയ്ക്ക് നൽകാനുള്ളത് പാർട്ടിക്ക് നൽകുമെന്നും ദുരിതാശ്വാസ നിധിയിലേയ്ക്ക് നൽകാനുള്ളത് അങ്ങനെയും നൽകുമെന്നും ചെന്നിത്തല വ്യക്തമാക്കി. 

ഇതിന് പിന്നാലെ കെ.സുധാകരനെ തള്ളി പ്രതിപക്ഷ നേതാവ് വി.ഡി സതീശനും രംഗത്തെത്തി. എല്ലാവരും ദുരിതാശ്വാസ നിധിയിലേയ്ക്ക് സംഭാവന നൽകണമെന്നും സർക്കാരിനെ വിമർശിക്കേണ്ട സമയമല്ല ഇതെന്നുമായിരുന്നു സതീശന്റെ പ്രതികരണം. ദുരിതാശ്വാസ നിധിയുടെ കാര്യത്തിൽ സുതാര്യത വേണമെന്നും സതീശൻ വ്യക്തമാക്കി.