Gold Treasure: ബോംബാണെന്ന് കരുതി വലിച്ചെറിഞ്ഞു; ചിതറി വീണത് സ്വർണ്ണവും വെള്ളിയും; സംഭവം കണ്ണൂരിൽ!

Kannur News: 17 മുത്തുമണികൾ,13 സ്വർണപതക്കങ്ങൾ, കാശ് മാലയുടെ നാല് പതക്കങ്ങൾ, ഒരു സെറ്റ് കമ്മൽ, വെള്ളിനാണയങ്ങൾ എന്നിവയാണ് ഈ കുടത്തിനുള്ളിലുണ്ടായിരുന്നത്

കണ്ണൂർ: കണ്ണൂർ ചെങ്ങളായിയിൽ റബർ തോട്ടത്തിൽ നിന്ന് നിധിയെന്ന് തോന്നിക്കുന്ന വസ്തുക്കൾ കണ്ടെത്തിയതായി റിപ്പോർട്ട്. പരിപ്പായി ഗവൺമെൻറ് എൽപി സ്കൂളിനടുത്ത് സ്വകാര്യ വ്യക്തിയുടെ റബർ തോട്ടത്തിൽ നിന്നാണ് ഇവ കണ്ടെത്തിയിരിക്കുന്നത്. 

മഴക്കുഴി എടുത്തുകൊണ്ടിരുന്ന തൊഴിലുറപ്പ് തൊഴിലാളികളാണ് ആഭരണങ്ങളും നാണയങ്ങളും അടങ്ങുന്ന കുടം കണ്ടെത്തിയിരിക്കുന്നത്. 17 മുത്തുമണികൾ,13 സ്വർണപതക്കങ്ങൾ, കാശ് മാലയുടെ നാല് പതക്കങ്ങൾ, ഒരു സെറ്റ് കമ്മൽ, വെള്ളിനാണയങ്ങൾ എന്നിവയാണ് ഈ കുടത്തിനുള്ളിലുണ്ടായിരുന്നത്.  

മണ്ണ് കുഴിച്ചപ്പോൾ കണ്ടെത്തിയ ഈ വസ്തുവിനെ ആദ്യം ബോംബ് ആണെന്നാണ് തൊഴിലാളികൾ കരുതിയതെങ്കിലും എടുത്തെറിഞ്ഞപ്പോൾ അതിൽ നിന്നും സ്വർണ്ണവും മുത്തും അടങ്ങിയ വസ്തുക്കൾ ചിതറി വീഴുകയായിരുന്നു. തുടർന്ന് ഇവർ പോലീസിനെ അറിയിച്ചു.  പോലീസെത്തി ലഭിച്ച വസ്തുക്കൾ അടങ്ങിയ കുടം തളിപ്പറമ്പ് കോടതിയിൽ ഹാജരാക്കിയിട്ടുണ്ട്. ഇവ സ്വർണ്ണം പൂശിയതാണോ എന്ന സംശയവുമുണ്ട്. വസ്തുക്കൾ പുരാവസ്തു വകുപ്പ് പരിശോധിക്കുകയാണ്.