Mathew kuzhalnadan: അളവിൽ പിശകുണ്ടായെന്ന് ഉടമകൾ; മാത്യു കുഴൽനാടന്റെ റിസോർട്ട് ഭൂമി വീണ്ടും അളക്കും

Mathew Kuzhalnadan's resort land will be re-measured: കഴിഞ്ഞ അഞ്ചാം തീയതി ഹീയറിംഗിന് ഹാജരാകാൻ നോട്ടീസ് നൽകിയെങ്കിലും റിസോർട്ടിന്റെ പാർട്ണർമാരായ ടോണി, ടോം എന്നിവരാണ് ഹിയറിം​ഗിന് ഹാജരായത്.

ഇടുക്കി: മാത്യു കുഴൽനാടന്റെ ചിന്നക്കനാലിലെ റിസോർട്ട് ഭൂമി വീണ്ടും അളക്കും. മുമ്പ് അളന്നപ്പോൾ പിശകുണ്ടെന്ന് ചൂണ്ടിക്കാണിച്ച് ഉടമകൾ നൽകിയ പരാതിയുടെ അടിസ്ഥാനത്തിലാണ് വീണ്ടും അളക്കാൻ റവന്യൂ വകുപ്പിൻ്റെ  തീരുമാനം.

വിജിലൻസ് അന്വേഷണത്തിന്റെ ഭാഗമായി നടത്തിയ സർവ്വേയിൽ ആയിരുന്നു മാത്യു കുഴൽനാടൻ 50 സെൻറ് സർക്കാർ ഭൂമി അനധികൃതമായി കൈവശം വെച്ചിട്ടുണ്ടെന്ന് കണ്ടെത്തിയത്. തുടർന്ന് റവന്യൂ വകുപ്പ് ഇത് ശരിവെക്കുകയും മാത്യു കുഴൽനാടനെതിരെ കേസെടുക്കുകയും ചെയ്തിരുന്നു. കഴിഞ്ഞ അഞ്ചാം തീയതി ഹീയറിംഗിന് ഹാജരാകാൻ നോട്ടീസും നൽകി. എന്നാൽ റിസോർട്ടിന്റെ പാർട്ണർമാരായ ടോണി, ടോം എന്നിവരാണ് ഹിയറിം​ഗിന് ഹാജരായത്. 

ഹിയറിം​ഗിന് ഹാജരാകാൻ ഒരു മാസം സമയം ദീർഘിപ്പിച്ചു കിട്ടണം എന്ന് ആവശ്യപ്പെട്ട് മാത്യു കുഴൽനാടൻ എൽ ആർ തഹസിൽദാർക്ക് രേഖാമൂലം കത്ത് നൽകിയിരുന്നു. ഇതിനിടയിലാണ് മുമ്പ് ഭൂമി അളന്നപ്പോൾ പിശകുണ്ടായി എന്ന് ചൂണ്ടിക്കാണിച്ച് ഉടമകൾ വീണ്ടും റവന്യൂ വകുപ്പിനെ സമീപിച്ചത്. ഇതേ തുടർന്നാണ് ഇപ്പോൾ വീണ്ടും ഹെഡ് സർവ്വേയറുടെ നേതൃത്വത്തിൽ ഭൂമി അളക്കാൻ റവന്യൂ വകുപ്പ് തീരുമാനമെടുത്തത്. അടുത്തയാഴ്ച തന്നെ വീണ്ടും സർവ്വേ നടപടികൾ പൂർത്തീകരിക്കുവാനാണ് റവന്യൂ വകുപ്പിന്റെ നീക്കം.