Suicide: നഗ്ന ഫോട്ടോ അയയ്ക്കുമെന്ന് ലോൺ ആപ്പ് ഭീഷണി; മനംനൊന്ത യുവതി ജീവനൊടുക്കി

Loan App Message: യുവതിയുടെയും ഭർത്താവിന്റെയും ഫോണിലേക്ക് നഗ്ന ഫോട്ടോകൾ അയച്ചു നൽകുമെന്ന് ഓൺലൈൻ ലോൺ ദാതാക്കൾ ഭീഷണി മുഴക്കിയിരുന്നു

എറണാകുളം: ഓൺലൈൻ ലോൺ ഭീഷണിയിൽ മനംനൊന്ത യുവതി ജീവനൊടുക്കിയതായി റിപ്പോർട്ട്. സംഭവം പെരുമ്പാവൂരിൽ. ആരതി എന്ന 31 വയസുകാരിയാണ് മരിച്ചത്. ആരതിയെ കിടപ്പുമുറിയിൽ തൂങ്ങിമരിച്ച നിലയിൽ കണ്ടെത്തുകയായിരുന്നു. 

യുവതിയുടെയും ഭർത്താവിന്റെയും ഫോണിലേക്ക് നഗ്ന ഫോട്ടോകൾ അയച്ചു നൽകുമെന്ന് ഓൺലൈൻ ലോൺ ദാതാക്കൾ ഭീഷണി മുഴക്കിയിരുന്നു. ഇതിൽ മനംനൊന്താണ് ആരതി ആത്മഹത്യ ചെയ്തതെന്നാണ് റിപ്പോർട്ട്. ആരതിയുടെ മരണശേഷവും ഫോണിലേക്ക് ചില ഫിനാൻസ് സ്ഥാപനത്തിന്റെ പേരിൽ ഫോൺവിളികൾ വന്നിരുന്നു. 

കുറുപ്പുംപടി പോലീസ് മൊബൈൽ ഫോൺ കസ്റ്റഡിയിലെടുത്തു. ലോൺ ആപ്പുകാരുടെ സന്ദേശങ്ങൾ പോലീസിനും ലഭിച്ചുവെന്നാണ് റിപ്പോർട്ട്. ഫോൺ പോലീസ് ഫോറൻസിക് പരിശോധനയ്ക്ക് അയച്ചിട്ടുണ്ട്.  മരിച്ച ആരതിയുടെ ഭർത്താവ് അനീഷ് വിദേശത്താണ്. മൃതദേഹം കോതമംഗലത്തെ സ്വകാര്യ ആശുപത്രിയിൽ സൂക്ഷിച്ചിട്ടുണ്ട്. ഇവർക്ക് ഏഴും മൂന്നും വയസ്സ് പ്രായമുള്ള രണ്ട് കുട്ടികളുണ്ട്. ലോൺ ആപ്പുകാരിൽ നിന്നും 6500 രൂപ യുവതി വായ്പ എടുത്തിട്ടുണ്ടെന്നും അതിൽ കുറച്ച് തിരിച്ചടച്ചിരുന്നു.  യുവതിയുടെ ഭർത്താവ് രണ്ടു മാസം മുൻപാണ് സൗദിയിലേക്ക് ജോലിക്കായി പോയത്.