Pinarayi Vijayan: എല്ലാ മാസവും കൃത്യമായി ക്ഷേമപെൻഷൻ നൽകുന്ന നിലയിലെത്തും; മുഖ്യമന്ത്രി

തിരുവനന്തപുരം: എല്ലാ മാസവും കൃത്യമായി ക്ഷേമപെൻഷൻ നൽകുന്ന നിലയിലെത്തുമെന്ന് മുഖ്യമന്ത്രി പിണറായി വിജയൻ. ക്ഷേമപെൻഷൻ തുല്യ ഗഡുക്കളായി കുടിശ്ശിക നൽകുമെന്നും അദ്ദേഹം പറഞ്ഞു. ബിജെപിക്ക് ഒരു സീറ്റ് നേടാനായത് ഗൗരവപൂർവ്വം പരിശോധിക്കണം. ബിജെപിയെ സഹായിച്ച വിഭാഗങ്ങൾ ചെയ്തത് ശരിയോ എന്ന് ചിന്തിക്കണമെന്നും, ചില വിഭാഗങ്ങളെ തിരഞ്ഞെടുപ്പിനു വേണ്ടി ബിജെപി സ്വാധീനിക്കാൻ ശ്രമിച്ചു. ഇത്തരം വിഭാഗത്തിന്റെ മേധാവികളുമായി ബിജെപി നടത്തിയ ചർച്ചയിൽ പരസ്പര ധാരണകൾ ഉണ്ടായി.  സമ്മർദങ്ങൾക്ക് വഴങ്ങിയാണ് തൃശൂരിൽ ബിജെപിയെ വിജയപ്പിച്ചതെന്നും ചില വിഭാ​ഗങ്ങളുടെ നേതാക്കളും ബിജെപിയും പരസ്പരം ധാരണയുണ്ടാക്കിയെന്നും മുഖ്യമന്ത്രി കൂട്ടിച്ചേർത്തു.

 ഇനിയെങ്കിലും രാജ്യത്ത് അക്രമണത്തിന് നേതൃത്വം നൽകുന്ന വിഭാ​ഗത്തെ പിന്തുണച്ചത് ശരിയാണോയെന്ന് ചിന്തിക്കണമെന്നും മുഖ്യമന്ത്രി പറഞ്ഞു. തെരഞ്ഞെടുപ്പിൽ ബിജെപിക്കെതിരായ കൂട്ടായ്മക്കാണ് സിപിഐഎം ശ്രമിച്ചതെന്നും കേരളത്തിൽ ബിജെപിയും കോൺ​ഗ്രസും സമവായത്തിലാണെന്നും മുഖ്യമന്ത്രി വ്യക്തമാക്കി. മുസ്ലിം ലീ​ഗ് . ജമാഅത്ത‌ ഇസ്ലാമിയുടെയും എസ്ഡിപിഐയുടെയും മുഖമായി മാറിയെന്നും അദ്ദേഹം വിമർശിച്ചു. കൂട്ട് കൂടാൻ പറ്റാത്തവരുമായി നാല് വോട്ടിന് വേണ്ടി ലീ​ഗ് കൂട്ട് കൂടിയെന്നും വിമർശനം. മുസ്ലിം ലീ​ഗിന് മുഖം നഷ്ടപ്പെട്ടുവെന്നും മുഖ്യമന്ത്രി പറഞ്ഞു.