Ind vs Eng: അര്‍ഹിച്ച സെഞ്ച്വറിയ്ക്ക് അരികെ ജുറെല്‍ വീണു; ഇംഗ്ലണ്ടിന്റെ ലീഡ് കുറച്ച് ഇന്ത്യ

Ind vs Eng 4th test day 3: 219ന് 7 എന്ന നിലയിൽ മൂന്നാം ദിനം മത്സരം പുന:രാരംഭിച്ച ഇന്ത്യയ്ക്ക് വേണ്ടി വാലറ്റത്തെ കൂട്ടുപിടിച്ച് ധ്രുവ് ജുറെൽ തകർപ്പൻ പ്രകടനമാണ് പുറത്തെടുത്തത്.

റാഞ്ചി: ഇംഗ്ലണ്ടിനെതിരായ നാലാം ടെസ്റ്റിന്റെ ഒന്നാം ഇന്നിംഗ്‌സില്‍ ഇന്ത്യ 307 റണ്‍സിന് പുറത്ത്. ഇംഗ്ലണ്ടിന് 46 റണ്‍സിന്റെ ഒന്നാം ഇന്നിംഗ്‌സ് ലീഡായി. മത്സരത്തിന്റെ മൂന്നാം ദിനമായ ഇന്ന് ധ്രുവ് ജുറെലിന്റെ പോരാട്ടമാണ് ഇന്ത്യന്‍ സ്‌കോര്‍ 300 കടത്തിയത്. 

7ന് 219 എന്ന നിലയില്‍ ബാറ്റിംഗ് പുനരാരംഭിച്ച ഇന്ത്യയ്ക്ക് 88 റണ്‍സ് കൂടി കൂട്ടിച്ചേര്‍ക്കാനായി. അര്‍ഹിച്ച സെഞ്ച്വറി നഷ്ടമായെങ്കിലും ധ്രുവ് ജുറെലിന്റെ ഇന്നിംഗ്‌സാണ് ഇംഗ്ലണ്ടിന്റെ ലീഡ് 50ല്‍ താഴേയ്ക്ക് എത്തിക്കാന്‍ സഹായിച്ചത്. 149 പന്തുകള്‍ നേരിട്ട ജുറെല്‍ 6 ബൗണ്ടറികളും 4 സിക്‌സറുകളും സഹിതം 90 റണ്‍സ് നേടി. 131 പന്തുകള്‍ നേരിട്ട കുല്‍ദീപ് യാദവ് 28 റണ്‍സ് നേടിയാണ് പുറത്തായത്. സ്‌കോര്‍ 253 റണ്‍സില്‍ നില്‍ക്കെ ജെയിംസ് ആന്‍ഡേഴ്‌സന്റെ പന്തില്‍ കുല്‍ദീപ് പുറത്തായെങ്കിലും വാലറ്റത്തെ കൂട്ടുപിടിച്ച് ധ്രുവ് ജുറെല്‍ ആഞ്ഞടിച്ചു. 

ആകാശ് ദീപിനെ കൂട്ടുപിടിച്ച് സ്‌കോര്‍ ജുറെല്‍ സ്‌കോര്‍ ഉയര്‍ത്തി. ഇരുവരും ചേര്‍ന്ന് 40 റണ്‍സിന്റെ കൂട്ടുകെട്ടാണ് പടുത്തുയര്‍ത്തിയത്. ആകാശ് ദീപ് 29 പന്തില്‍ 9 റണ്‍സ് നേടി. സ്‌കോര്‍ 307ല്‍ നില്‍ക്കെ ടോം ഹാര്‍ട്‌ലിയുടെ പന്തില്‍ ജുറെല്‍ പുറത്തായതോടെ ഇന്ത്യയുടെ പോരാട്ടം അവസാനിച്ചു. ഇംഗ്ലണ്ടിന് വേണ്ടി ഷോയിബ് ബഷീര്‍ 119 റണ്‍സ് വഴങ്ങി 5 വിക്കറ്റുകള്‍ സ്വന്തമാക്കി. ടോം ഹാര്‍ട്‌ലി 3 വിക്കറ്റുകള്‍ വീഴ്ത്തിയപ്പോള്‍ ജെയിംസ് ആന്‍ഡേഴ്‌സണ്‍ 2 വിക്കറ്റുകള്‍ നേടി.