ന്യൂഡല്ഹി: പാക്കിസ്ഥാനെതിരെ ലോകകപ്പ് കളിക്കുന്ന കാര്യത്തില് തീരുമാനമെടുക്കാനാവാതെ ബിസിസിഐയുടെ അഡ്മിനിസ്ട്രേറ്റിവ് കമ്മിറ്റി.
അഡ്മിനിസ്ട്രേറ്റര് കമ്മിറ്റി ചെയര്മാന് വിനോദ് റായ്, ഡയാന എഡുള്ജി, പുതുതായി നിയമിതനായ ലഫ്. ജനറല്. രവി തോഗ്ഡെ എന്നിവര് ലോകകപ്പ് കളിക്കുന്ന കാര്യത്തിലെ നിലപാട് ആലോചിക്കാന് യോഗം ചേര്ന്നിരുന്നു. ഈ യോഗമാണ് കേന്ദ്രസര്ക്കാര് നിലപാട് വ്യക്തമാക്കിയ ശേഷം മറ്റ് കാര്യങ്ങള് തീരുമാനിക്കാമെന്ന് വ്യക്തമാക്കിയത്.
ഇന്ത്യയും പാക്കിസ്ഥാനും തമ്മിലുള്ള ആദ്യ മത്സരം നടക്കുന്ന ജൂണ് 16ന് ഇനിയും ഏറെ സമയമുണ്ട്. കേന്ദ്ര സര്ക്കാരുമായി ആലോചിച്ചശേഷം ഈ വിഷയത്തില് തീരുമാനമെടുക്കുമെന്ന് അഡ്മിനിസ്ട്രേറ്റര് കമ്മിറ്റി ചെയര്മാന് വിനോദ് റായ് മാധ്യമങ്ങളോട് പറഞ്ഞു. കൂടാതെ, കേന്ദ്ര സര്ക്കാരിന്റെ നിലപാടറിഞ്ഞ ശേഷം മറ്റ് കാര്യങ്ങള് പറയാമെന്നും അദ്ദേഹം വ്യക്തമാക്കി.
അതേസമയം, പാക്കിസ്ഥാനെതിരെ കളിക്കുന്ന കാര്യത്തിലെ വിയോജിപ്പും ആശങ്കകളും അറിയിച്ച് ഐസിസിക്ക് കത്തയക്കുമെന്നും ബിസിസിഐ വൃത്തങ്ങള് വ്യക്തമാക്കി.
വരുന്ന ഐപിഎല് ടൂര്ണമെന്റിന്റെ ഉദ്ഘാടന ദിവസത്തെ ആഘോഷ ചടങ്ങുകള് ഒഴിവാക്കാനും ബിസിസിഐ തീരുമനാനിച്ചു. ഇതിന് ചെലവാകുമായിരുന്ന തുക പുല്വാമയില് കൊല്ലപ്പെട്ട ജവാന്മാരുടെ കുടുംബങ്ങള്ക്ക് നല്കാനാണ് തീരുമാനം.
അതേസമയം, പുല്വാമ ആക്രമണത്തില് പ്രതിഷേധിച്ച് പാക്കിസ്ഥാനെതിരെ ഇനി ക്രിക്കറ്റ് മത്സരങ്ങള് കളിക്കേണ്ടതില്ലെന്ന് ബിസിസിഐ നിലപാടെടുത്തിരുന്നു. മുന് ഇന്ത്യന് ക്യാപ്റ്റന് സൗരവ് ഗാംഗുലി, ചേതന് ചൗഹാന്, ഹര്ഭജന് സിംഗ് തുടങ്ങിയവര് ഇന്ത്യ പാകിസ്ഥാനുമായി കളിക്കുന്നത് ഒഴിവാക്കണമെന്ന് ആവശ്യപ്പെട്ട് രംഗത്തെത്തിയിരുന്നു.
എന്നാല്, ലോകകപ്പില് പാക്കിസ്ഥാനെതിരേ കളിക്കാതിരിക്കുന്നത് തെറ്റായ തീരുമാനമാണെന്നും, പാക്കിസ്ഥാനെ പരാജയപ്പെടുത്തി, ടൂര്ണമെന്റില് മുന്നേറാന് അനുവദിക്കാതിരിക്കുകയാണ് വേണ്ടതെന്നും മുന് ക്യാപ്റ്റന് സുനില് ഗവാസ്കര് അഭിപ്രായപ്പെട്ടു.