Dinga Dinga Disease: പുതിയ രോ​ഗം 'ഡിങ്ക ഡിങ്ക'; പേര് പോലെ അത്ര രസമല്ല കാര്യങ്ങൾ, മുന്നൂറോളം പേർ ചികിത്സയിൽ ജാ​ഗ്രത!

Dinga Dinga Mystery Illness: സ്ത്രീകളിലും പെൺകുട്ടികളിലുമാണ് രോ​ഗം പടരുന്നത്. പനി, ശരീരത്തിൽ വിറയൽ എന്നിവയാണ് പ്രാഥമിക ലക്ഷണങ്ങൾ.

ഉ​ഗാണ്ടയിൽ പടർന്നുപിടിച്ച് ഡിങ്ക ഡിങ്ക രോ​ഗം. നിലവിൽ രോ​ഗബാധയെ തുടർന്ന് മുന്നൂറോളം പേർ ചികിത്സ തേടിയെന്നാണ് പുറത്ത് വരുന്ന റിപ്പോർട്ടുകൾ. ബണ്ടിബ്യൂ​ഗോ എന്ന ജില്ലയിലാണ് കൂടുതൽ പേർ ചികിത്സയിൽ കഴിയുന്നത്. സ്ത്രീകളിലും പെൺകുട്ടികളിലുമാണ് രോ​ഗം പടരുന്നത്. പനി, ശരീരത്തിൽ വിറയൽ എന്നിവയാണ് പ്രാഥമിക ലക്ഷണങ്ങൾ.

നിലവിൽ രോ​ഗബാധിതർക്ക് ആന്റി ബയോട്ടിക്കുകളാണ് നൽകി വരുന്നതെന്ന് ജില്ലാ ആരോ​ഗ്യവകുപ്പ് മേധാവി ഡോ. കിയറ്റ ക്രിസ്റ്റഫർ വ്യക്തമാക്കി. ബണ്ടിബ്യൂ​ഗോ ജില്ലയ്ക്ക് പുറത്ത് ആർക്കും രോ​ഗം റിപ്പോർട്ട് ചെയ്തിട്ടില്ല. ആരും സ്വയം ചികിത്സയ്ക്ക് മുതിരരുതെന്നും ആശുപത്രിയിലെത്തി ചികിത്സ തേടുന്നവരിൽ ഒരാഴ്ച കൊണ്ട് രോ​ഗം ഭേദമാകുന്നുണ്ടെന്നും ആരോ​ഗ്യവകുപ്പ് ഉദ്യോ​ഗസ്ഥർ അറിയിച്ചു.

രോ​ഗത്തിന്റെ ഉറവിടത്തെ സംബന്ധിച്ചോ ഇത് എങ്ങനെ പടരുന്നുവെന്നത് സംബന്ധിച്ചോ വ്യക്തത കൈവന്നിട്ടില്ല. രോ​ഗികളിൽ നിന്ന് സാമ്പിളുകൾ ശേഖരിച്ച് പരിശോധനകൾ നടത്തുകയാണ്. എന്നാൽ, ഇത് സംബന്ധിച്ച് ഔദ്യോ​ഗിക വിവരങ്ങളൊന്നും പുറത്ത് വിട്ടിട്ടില്ല.

ഡിങ്ക ഡിങ്ക ബാധിച്ചവരിൽ ഡാൻസിങ് പ്ലേ​ഗ് എന്നറിയപ്പെട്ട 1518ൽ ഫ്രാൻസിലെ സ്റ്റ്രാസ്ബർ​ഗിൽ കണ്ടെത്തിയ രോ​ഗത്തിന് സമാനമായ ലക്ഷണങ്ങളാണ് കണ്ടുവരുന്നത്. രോ​ഗബാധിതർ നിർത്താതെ നൃത്തംചവിട്ടുന്നത് പോലെ തുള്ളിക്കൊണ്ടിരുന്നതിനാലാണ് ഡാൻസിങ് പ്ലേ​ഗ് എന്ന പേര് വന്നത്. ഇത് മരണത്തിന് വരെ കാരണമായതായി റിപ്പോർട്ടുകൾ വ്യക്തമാക്കുന്നു. ജനങ്ങൾ ജാ​ഗ്രത പാലിക്കണമെന്ന് ആരോ​ഗ്യവകുപ്പ് നിർദേശം നൽകിയിട്ടുണ്ട്. രോ​ഗലക്ഷണങ്ങൾ ശ്രദ്ധയിൽപ്പെട്ടാൽ ഉടൻ തന്നെ ആശുപത്രിയിലെത്തി ചികിത്സ തേടണം. സ്വയം ചികിത്സ പാടില്ല.

പനി, ചുമ, തലവേദന, ശരീരവേദന, മൂക്കൊലിപ്പ് തുടങ്ങിയവയാണ് രോ​ഗത്തിന്റെ പ്രാരംഭ ലക്ഷണങ്ങൾ. ഡിങ്ക ഡിങ്ക മൂലം ശ്വസനസംബന്ധമായ ആരോ​ഗ്യപ്രശ്നങ്ങൾ ഉണ്ടാകുന്നുണ്ടോയെന്ന് പരിശോധിച്ച് വരികയാണെന്നും ആരോ​ഗ്യ വകുപ്പ് വ്യക്തമാക്കി. രോ​ഗബാധിതരുടെ സാമ്പിളുകൾ ശേഖരിച്ച് രോ​ഗകാരണം കണ്ടെത്താനുള്ള ശ്രമത്തിലാണ് അധികൃതർ.