California Earthquake: കാലിഫോർണിയയിൽ ശക്തമായ ഭൂചലനം; 7.0 തീവ്രത രേഖപ്പെടുത്തി

California Earthquake Updates: വടക്കൻ കാലിഫോർണിയയിൽ റിക്ടർ സ്കെയിലിൽ 7.0 തീവ്രത രേഖപ്പെടുത്തിയ ഭൂകമ്പം ഉണ്ടായി.

കാലിഫോര്‍ണിയ: അമേരിക്കയിലെ വടക്കൻ കാലിഫോര്‍ണിയ തീരത്ത് ശക്തമായ ഭൂചലനം. 7.0 തീവ്രതയുള്ള ഭൂചലനമാണ് രേഖപ്പെടുത്തിയിരിക്കുന്നത്. ഒറിഗൺ അതിർത്തിക്കടുത്തുള്ള തീരദേശ ഹംബോൾട്ട് കൗണ്ടിയിലെ ഫെൺഡെയ്‌ലിന്റെ പടിഞ്ഞാറ് ഭാഗത്താണ് ഭൂചലനമുണ്ടായത്. 

വ്യാഴാഴ്ച രാത്രിയാണ് ഭൂചലനമുണ്ടായത്. ഇന്ത്യൻ സമയം അർധരാത്രി 12:14 ഓടെയായിരുന്നു ഭൂചലനം.  റിപ്പോർട്ടുകൾ അനുസരിച്ച് സാൻ ഫ്രാൻസിസ്കോ വരെ ഭൂചലനം അനുഭവപ്പെട്ടതായി പറയുന്നു.  പെട്രോളിയ, സ്കോട്ടിയ, കോബ് എന്നിവയുൾപ്പെടെ വിവിധ പ്രദേശങ്ങളിലും ശക്തമായ ഭൂചലനം അനുഭവപ്പെട്ടിരുന്നു എന്നാണ് റിപ്പോർട്ട്.  

ഭൂചലനത്തിന് പിന്നാലെ യുഎസിലെ ദേശീയ സുനാമി കേന്ദ്രം സുനാമി മുന്നറിയിപ്പ് നൽകിയിരുന്നെങ്കിലും മണിക്കൂറുകൾക്ക് ശേഷം പിൻവലിച്ചു.  ഒറിഗോൺ, കാലിഫോർണിയ തീരപ്രദേശങ്ങളിലായിരുന്നു ആദ്യം സുനാമി മുന്നറിയിപ്പ് നൽകിയത്. ഭൂചലനത്തിൽ ആളപായമോ മറ്റ് നാശനഷ്ടങ്ങളോ റിപ്പോർട്ട് ചെയ്തിട്ടില്ല. ഭൂചലനത്തെ തുടർന്ന് യെല്ലോ അലർട്ട് പ്രഖ്യാപിച്ച യുഎസ് ജിയോളജിക്കൽ സർവേ  വൈകാതെ സുനാമി മുന്നറിയിപ്പ് പിൻവലിക്കുകയായിരുന്നു.

ഭൂചലനം നിരവധി സെക്കൻഡുകൾ  നീണ്ടുനിന്നതായും തുടർന്ന് ചെറിയ തുടർ ചലനങ്ങൾ അനുഭവപ്പെട്ടതായും റിപ്പോർട്ടുണ്ട്. ഭൂകമ്പത്തിന്‍റെ പ്രഭവകേന്ദ്രത്തിൽ നിന്ന് 300 കിലോമീറ്റർ ചുറ്റളവിൽ സ്ഥിതി ചെയ്യുന്ന തീരങ്ങളിലായിരുന്നു കാലാവസ്ഥാ വിഭാഗം ആദ്യം സുനാമി സാധ്യത പ്രവചിച്ചത്. അതോടൊപ്പം തീരപ്രദേശത്തിന് സമീപമുള്ളവർ അപകടസാധ്യത കണക്കിലെടുത്ത് ജാഗ്രത പാലിക്കണമെന്നും മുന്നറിയിപ്പിലുണ്ടായിരുന്നു.