'अग्गबाई सासूबाई'ची टीम थुकरटवाडीत

मुंबई : झी मराठी वाहिनीवरील 'चला हवा येऊ द्या' या लोकप्रिय कार्यक्रमाला प्रेक्षकांचा खूप चांगला प्रतिसाद मिळतो. सुरुवातीपासूनच या कार्यक्रमाला आणि त्यातील विनोदवीरांना महाराष्ट्राच नव्हे तर संपूर्ण जगाने डोक्यावर उचलून धरलं. नुकतंच या कार्यक्रमाचं 'शेलिब्रेटी पॅटर्न' हे पर्व प्रेक्षकांच्या भेटीस आलं. यात विविध सेलिब्रेटी हजेरी लावताना पहायला मिळत आहेत. या शेलिब्रेटी पॅटर्नला देखील प्रेक्षकांचा भरघोस प्रतिसाद मिळतोय.

येत्या आठवड्यात चला हवा येऊ द्या च्या मंचावर झी मराठी वरील लोकप्रिय मालिका 'अग्गंबाई सासूबाई'ची टीम सज्ज होणार आहे. निवेदिता सराफ, गिरीश ओक या दिग्गज कलाकारांच्या उपस्थितीत थुकरट वाडीच्या विनोदवीरांनी एकच कल्ला केला. येत्या आठवड्यात हे विनोदवीर 'अग्गंबाई सासूबाई' या मालिकेवर आधारित एक विनोदी स्किट सादर करणार आहेत.

ज्यामध्ये भाऊ कदम - अभिजीत राजे, कुशल बद्रिके - आसावरी, श्रेया बुगडे - शुभ्रा, भारत गणेशपुरे - सोहम, डॉक्टर निलेश साबळे - आजोबा तर सागर कारंडे - कारखानीस यांची भूमिका साकारणार आहेत. त्यामुळे हास्यकल्लोळ होणार आणि हे विनोदवीर प्रेक्षकांना पोट धरून हसायला भाग पडणार यात काही शंकाच नाही. त्यामुळे ही धमाल पाहायला विसरू नका फक्त 'चला हवा येऊ द्या - शेलिब्रिटी पॅटर्न'मध्ये सोमवार मंगळवार रात्री ९.३० वाजता फक्त आपल्या झी मराठीवर.

मालिका आता पुढे सरकत आहे. आसावरी आणि अभिजीत राजे एकाच दिवशी आपला वाढदिवस साजरा करणार आहेत. अशा पद्धतीने ही कथा पुढे सरकत आहे.