Omicron मुळे जगभरात खळबळ, या 2 देशांमध्ये विक्रमी रुग्णांची नोंद

लंडन : ब्रिटन आणि 27 देशांचा समूह असलेल्या युरोपियन युनियनमध्ये कोरोनाचा नवा प्रकार ओमायक्रॉन (Omicron) वेगाने पसरत आहे. डेल्टा (Delta Verient) प्रकार आधीच या प्रदेशात कहर करत आहे. परिणामी, बुधवारी ब्रिटन (Britain) मध्ये कोरोना संसर्गाची विक्रमी 78,610 नवीन प्रकरणे नोंदवली गेली. यापूर्वी 8 जानेवारी रोजी सर्वाधिक 68,053 प्रकरणे आढळून आली होती. फ्रान्स (France) मध्येही 65,713 नवीन रुग्ण आढळले आहेत. गेल्या एका आठवड्यात दररोज सरासरी 50 हजारांहून अधिक नवीन रुग्णांची नोंद होत आहे, जी गेल्या वर्षी नोव्हेंबरपासून सर्वाधिक आहे.

घरून काम करण्यावर भर (Work From Home)

ब्रिटनचे पंतप्रधान बोरिस जॉनसन यांनी पत्रकार परिषदेत सांगितले की, ओमायक्रॉनची प्रकरणे दोन दिवसांपेक्षा कमी कालावधीत दुप्पट होत आहेत. ते पुढे म्हणाले की, बूस्टर डोसची वाढती संख्या या प्रकाराचा प्रभाव कमी करण्यास मदत करेल. आरोग्य मंत्री साजिद जाविद यांनी येत्या काही दिवसांत कडक निर्बंध येण्याची शक्यता नाकारली नाही आणि शक्यतो मास्क घालण्याचा आणि घरातूनच काम करण्याचा आग्रह धरला आहे.

युरोपियन सेंटर फॉर डिसीज प्रिव्हेन्शन अँड कंट्रोलने म्हटले आहे की, पुढील महिन्याच्या मध्यापर्यंत ओमायक्रॉन युरोपमधील सर्वात प्रबळ प्रकार बनेल आणि डेल्टालाही मागे टाकेल. पॅन अमेरिकन हेल्थ ऑर्गनायझेशन (PAHO) ने इशारा दिला आहे की, लॅटिन अमेरिकन आणि कॅरिबियन देश कोरोनाच्या उपचारात मागे राहू शकतात. संघटनेने या भागातील सर्वांना समान वागणूक देण्यासाठी एकत्र काम करण्याचे आवाहन केले आहे.

नवीन प्रकार 77 देशांमध्ये पसरला

वर्ल्ड हेल्थ ऑर्गनायझेशन (WHO) चे महासंचालक टेड्रोस म्हणाले की, ओमायक्रॉन प्रकार विलक्षण पद्धतीने वाढत आहे. हा प्रकार पहिल्यांदा 24 नोव्हेंबर रोजी समोर आला होता. त्यानंतर, तीन आठवड्यांत तो 77 देशांमध्ये पसरला आहे. केवळ लस कोरोनापासून बचाव करू शकत नाही. कोरोनाचा संसर्ग टाळण्यासाठी मास्क घालणे, शारीरिक अंतर राखणे आणि गर्दीच्या ठिकाणी जाणे टाळले पाहिजे.