பட்ஜெட் கூட்டத் தொடர் இன்றுடன் நிறைவு பெறும் நிலையில், முத்தலாக் தடை சட்ட மசோதா, குடியுரிமை சட்ட மசோதா ஆகியவை மாநிலங்களவையில் இன்று தாக்கல் செய்யப்பட உள்ளன.
பட்ஜெட் கூட்டத் தொடர் கடந்த மாதம் 31 ஆம் தேதி தொடங்கியது. பிப்ரவரி ஒன்றாம் தேதி இடைக்கால பட்ஜெட்டை நிதியமைச்சர் பியூஸ் கோயல் தாக்கல் செய்தார். ரஃபேல் விமான ஒப்பந்தம் தொடர்பாக நாடாளுமன்றத்தின் இரு அவைகளிலும் அமளி நிலவியதால் மசோதாக்கள் எதையும் நிறைவேற்ற முடியவில்லை. கூட்டத்தொடரின் கடைசி நாளான இன்று முத்தலாக் தடைச் சட்டமசோதா, குடியுரிமை சட்டத்திருத்த மசோதா ஆகியவற்றை நிறைவேற்ற மத்திய அரசு தீவிரம் கொண்டுள்ளது.
மாநிலங்களவையின் இன்றைய அலுவல் பட்டியலில் இந்த இரு மசோதாக்களும் தாக்கல் செய்யப்படுவதாக தெரிவிக்கப்பட்டுள்ளது. மக்களவையில் நிறைவேறிய குடியுரிமைச் சட்டத்திருத்த மசோதாவுக்கு வடகிழக்கு மாநிலங்களில் கடும் எதிர்ப்பு காணப்படுகிறது. பிப்ரவரி 6 ஆம் தேதி இந்த மசோதா மாநிலங்களவையில் அறிமுகம் செய்யப்பட்ட போதும் சமாஜ்வாதி கட்சியினர் அமளியால் அது ஒத்திவைக்கப்பட்டது. இதே போன்று முத்தலாக் தடைச் சட்டம் அவசர சட்டமாக உள்ளதால், நாடாளுமன்றத்தில் மசோதாவை நிறைவேற்றிட மத்திய அரசு முனைப்பு கொண்டுள்ளது. ஆனால் காங்கிரஸ் உள்ளிட்ட கட்சிகள் இந்த சட்டத்திற்கு கடும் எதிர்ப்புத் தெரிவித்து வருகின்றன
இவை தவிர ஆதார் திருத்த மசோதா, நிறுவனச் சட்ட மசோதா போன்ற பல்வேறு முக்கிய மசோதாக்களும் நிலுவையில் உள்ளன. நாடாளுமன்ற கூட்டத் தொடர் இன்றுடன் நிறைவடைவதால், மசோதாக்களை நிறைவேற்றுவதற்கான வாய்ப்புகள் குறைவாகவே காணப்படுகின்றன.
மாநிலங்களவையில் 49 அரசு மசோதாக்கள் மற்றும் 130 தனி நபர் மசோதாக்கள் நிலுவையில் உள்ளன. இதே போன்று மக்களவையில் 25 அரசு மசோதாக்கள், ஆயிரத்துக்கும் மேற்பட்ட தனிநபர் மசோதாக்கள் நிலுவையில் உள்ளன. இத்தொடரின் போது மக்களவையில் இரண்டு மசோதாக்கள் மட்டும் நிறைவேறியுள்ளன.
