IPL 2024 Auction Player List: డిసెంబర్ 19న దుబాయ్‌ వేదికగా ఐపీఎల్ 2024 వేలం జరగనుంది. మొత్తం 333 మంది ఆటగాళ్లు వేలానికి అందుబాటలో ఉన్నారు. 10 టీమ్‌లలో 77 స్లాట్స్‌ ఖాళీగా ఉన్నాయి. ఇప్పటికే ఆటగాళ్లను ట్రేడింగ్ చేసుకున్న జట్లు.. మిగిలిన పర్స్‌తో వేలానికి సిద్ధమవుతున్నాయి.
ఐపీఎల్ వేలంలో మొత్తం 214 మంది భారత ఆటగాళ్లు తమ అదృష్టాన్ని పరీక్షించుకోనున్నారు. కేవలం ముగ్గురు మాత్రమే తమ బేస్ ప్రైస్‌గా రూ.2 కోట్ల కేటగిరీలో ఉన్నారు.
ఇద్దరు అసోసియేట్ ప్లేయర్‌లతో సహా 119 మంది విదేశీ ఆటగాళ్లు ఐపీఎల్ వేలంలో పాల్గొనబోతున్నారు. మొత్తం ప్లేయర్లలో 116 మంది క్యాప్‌డ్‌, 215 మంది అన్‌క్యాప్‌డ్‌ ఆటగాళ్లు ఉన్నారు. రూ.2 కోట్ల కేటగిరీలో ఉన్న విదేశీ ఆటగాళ్లలో ఇంగ్లాంండ్‌కు చెందిన హ్యారీ బ్రూక్, ఆస్ట్రేలియాకు చెందిన ట్రావిస్ హెడ్, మిచెల్ స్టార్క్, పాట్ కమిన్స్ వంటి ఆటగాళ్లు ఉన్నారు.
మొత్తం రూ.2 కోట్ల కేటగిరీలో 23 మంది ఆటగాళ్లు నమోదు చేసుకోగా.. వారిలో భారత ఆటగాళ్లు ముగ్గురు మాత్రమే ఉన్నారు. శార్దూల్ ఠాకూర్, ఉమేష్ యాదవ్, హర్షల్ పటేల్ ఉన్నారు.
రూ.2 కోట్ల బేస్ ప్రైస్ కేటగిరీ తర్వాత.. రూ.1.5 లేదా రూ.కోటి కేటగిరీలో ఏ భారతీయ ఆటగాడు లేడు. మరో 11 మంది భారత ఆటగాళ్ల రూ.50 లక్షల కేటగిరీలో ఉన్నారు.
మనీష్ పాండే, కరుణ్ నాయర్, జయదేవ్ ఉనద్కత్, చేతన్ సకారియా, శివమ్ మావి, కేఎస్ భరత్, సందీప్ వారియర్, బరీందర్ స్రాన్, సిద్ధార్థ్ కౌల్, వరుణ్ ఆరోన్, హనుమ విహారి రూ.50 లక్షల కేటగిరీలో ఉన్నారు.
