Romance Ministry In Russia: రష్యాలోని త్వరలోనే కొత్త మంత్రిత్వ శాఖ ఏర్పడబోతోంది. ఈ దేశంలో జనాభా రేటు తగ్గడంతో పాటు సంతానోత్పత్తి రేటు కూడా విపరీతంగా పడిపోవడంతో రష్యా శృంగార మంత్రిత్వ శాఖను ఏర్పాటు చేయబోతున్నట్లు తెలుస్తోంది. దీనికి సంబంధించిన న్యూస్ ప్రస్తుతం సోషల్ మీడియాలో వైరల్ అవుతోంది.
Romance Ministry In Russia 2025: ప్రపంచవ్యాప్తంగా జనాభా క్రమంగా తగ్గిపోతూ వస్తోంది. అలాగే జననాల రేటు కూడా విపరీతంగా తగ్గుతూ రావడం ఆశ్చర్యానికి గురిచేస్తోంది. కొన్ని దేశాలు ఈ సమస్య నుంచి విముక్తి పొందడానికి, జననాల రేటును పెంచడానికి కొత్త కొత్త ప్రణాళికలను రచించి అమలు చేస్తున్నాయి. ప్రస్తుతం రష్యా కూడా జననాల రేటులో వెనకబడిపోవడంతో అనేక సమస్యలను ఎదుర్కొంటోంది. ఉక్రెయిన్ రష్యా యుద్ధం తర్వాత ఏర్పడిన ఈ సమస్య కారణంగా జననాల రేటును పెంచేందుకు ప్రభుత్వం కొత్త శాఖను ఏర్పాటు చేయబోతున్నట్లు తెలుస్తోంది.
ఇటీవల మిర్రర్ అందించిన నివేదికల ప్రకారం.. రష్యాలో తగ్గుతున్న జననాల రేటును మెరుగుపరిచేందుకు శృంగార మంత్రిత్వ శాఖను అతి త్వరలోనే రూపొందించే అవకాశాలు ఉన్నాయట. రష్యా అధ్యక్షుడు పుతిన్ విధేయురాలు ఇప్పటికే కుటుంబ సంరక్షణ, మాతృత్వ శాఖ పార్లమెంటరీ కమిటీ అధ్యక్షురాలుగా ప్రత్యేకమైన మంత్రిత్వ శాఖను ఏర్పాటు చేయాలని ప్రతి పిటిషన్ వేసింది.
ఆమె వేసిన పిటిషన్ ఇప్పటికే ప్రభుత్వం కూడా స్పందించి సమీక్షిస్తున్నట్లు తెలుస్తోంది. రష్యా, ఉక్రెయిన్ మధ్య జరిగిన యుద్ధం కారణంగా రెండు దేశాలకు ఎంతో ప్రాణ నష్టం జరిగింది. దీనికి తోడు జననాల రేటు కూడా విపరీతంగా తగ్గిపోయింది. అయితే రష్యాలో జననాల రేటును పెంచేందుకు పుతిన్ ఇప్పటికే పలు కీలక నిర్ణయాలు తీసుకున్నట్లు తెలుస్తోంది.
రష్యాలో విపరీతంగా జననాల రేటు పడిపోవడంతో.. ఎంత తొందరగా వీలైతే అంత తొందరగా జనాభాను పెంచేందుకు ఈ శృంగార మంత్రిత్వ శాఖను ఏర్పాటు చేయబోతున్నట్లు సమాచారం. ఈ శాఖ ప్రధాన లక్ష్యం సంతానోత్పత్తిని దేశంలో విపరీతంగా పెంచేందుకు శృంగార కార్యకలాపాలను ప్రోత్సహించడం, ప్రత్యేకమైన చర్యలు చేపట్టడమేనని కొన్ని నివేదికల్లో పేర్కొన్నారు.
శృంగార మంత్రిత్వ శాఖ అమల్లోకి వస్తే.. రష్యాలోని శృంగార కార్యక్రమాలను మెరుగుపరిచేందుకు ప్రభుత్వం రాత్రి పది గంటలకి ఇంటర్నెట్ సేవలను నిలిపి వేయబోతున్నట్లు తెలుస్తోంది. మళ్లీ తిరిగి ఉదయం 3 గంటలకు ఇంటర్నెట్ సేవలను అందుబాటులోకి తీసుకురాబోతున్నారు. అలాగే లైట్స్ను కూడా స్విచ్ ఆఫ్ చేయాలని ప్రభుత్వం సూచించిందట.
అంతేకాకుండా ఈ మంత్రిత్వ శాఖ అమల్లోకి వస్తే.. ఇంట్లో ఉండే ప్రతి తల్లికి వేతనం కూడా ప్రభుత్వం చెల్లించే అవకాశాలు ఉన్నాయట. అంతేకాకుండా ఫస్ట్ డేట్ లో భాగంగా సంబంధాలను మెరుగుపరుచుకునేందుకు ప్రతి ఒక్కరికి రూ.5,000 అందించబోతున్నట్లు తెలుస్తోంది. అంతేకాకుండా పనులు చేసే సమయంలో విరామం దొరికితే సంతానోత్పత్తిలో పాల్గొనే అవకాశాలు కూడా ప్రభుత్వం కలిగించబోతోంది.
