Pm Kisan Samman Nidhi: ప్రధాన మంత్రి కిసాన్ సమ్మాన్ నిధి (పీఎం కిసాన్ స్కీమ్) ప్రయోజనాన్ని పొందుతున్న కోట్లాది మంది రైతులకు శుభవార్త. పీఎం కిసాన్ 13వ విడత నిధులను త్వరలోనే రిలీజ్ చేసేందుకు కేంద్ర ప్రభుత్వం రెడీ అవుతోంది.
పీఎం కిసాన్ యోజన 13వ విడత నగదును డిసెంబర్ 2022 నుంచి మార్చి 2023 వరకు కేంద్రం బదిలీ చేయనుంది. ఈ ఏడాది అక్టోబర్ 17న ప్రభుత్వం 12వ విడత సొమ్మును కోట్లాది మంది రైతుల ఖాతాల్లోకి జమ చేసింది.
పీఎం కిసాన్ యోజనకు సంబంధించి అనేక రకాల మోసాలు జరుగుతున్న నేపథ్యంలో కేంద్ర ప్రభుత్వం కీలక నిర్ణయం తీసుకుంది. ఇక నుంచి ఈ పథకం పొందాలంటే కచ్చితంగా రేషన్ కార్డ్ నంబర్‌ను సమర్పించాలని స్పష్టం చేసింది. మీ రేషన్ కార్డు నంబర్‌ను సమర్పించకపోతే మీకు రూ.2 వేలు అందదు.
ప్రభుత్వం ఈ-కేవైసీ, భూమి రికార్డు ధృవీకరణ, రేషన్ కార్డ్ నంబర్‌ను సమర్పించడం తప్పనిసరి చేసింది. సాఫ్ట్ కాపీలు అందజేస్తే సరిపోతుంది.
ప్రభుత్వోద్యోగి లేదా పదవీ విరమణ పొందిన వారు ప్రస్తుత లేదా మాజీ ఎంపీ, ఎమ్మెల్యే, మంత్రి అయినా కూడా ఈ పథకానికి అనర్హులే. ప్రొఫెషనల్ రిజిస్టర్డ్ డాక్టర్లు, ఇంజనీర్లు, లాయర్లు, చార్టర్డ్ అకౌంటెంట్లు లేదా వారి కుటుంబ సభ్యులు అనర్హుల జాబితాలోకి వస్తారు. ఆదాయపు పన్ను చెల్లించే కుటుంబాలకు కూడా ఈ పథకం ప్రయోజనం ఉండదు.
ఈ పథకంలో రైతులకు ఏటా 6 వేల రూపాయలు కేంద్ర ప్రభుత్వం అందజేస్తుంది. ఇప్పటివరకు 12 విడతల సొమ్మును ప్రభుత్వం రైతుల ఖాతాలోకి జమ చేయగా.. త్వరలో 13వ విడత సొమ్ము కూడా ఖాతాలోకి రాబోతోంది.
