અમદાવાદમાં ભારતની હાર લગભગ પાક્કી! ઇંગ્લેંડ A જીતની નજીક, બોલરોએ ટીમ ઇન્ડીયાને ડૂબાડી

India a VS England Lions: ઈંગ્લેન્ડની A ટીમ સામે ભારત Aની હાલત ખરાબ થઈ ગઈ છે. કેપ્ટન અભિમન્યુ ઇશ્વરનની સંભવિત કારકિર્દી બદલાતી મેચોમાં નિષ્ફળતાઓનો દોર ચાલુ રહ્યો છે. ઈંગ્લેન્ડની 'A' ટીમે શુક્રવારે પ્રથમ બિનસત્તાવાર ટેસ્ટમાં ત્રીજા દિવસની રમત બાદ ભારત 'A' સામે મોટી જીતથી છ વિકેટ દૂર છે. ભારતની  'A' ટીમ 490 રનના મુશ્કેલ લક્ષ્‍યાંકનો પીછો કરતાં સ્ટમ્પ આઉટ સુધી 159 રનમાં ચાર વિકેટ ગુમાવી ચૂક્યું હતું.

છેલ્લા દિવસે, ભારતીય ટીમને વિજય નોંધાવવા માટે 331 રનની જરૂર પડશે અને તેની પાસે માત્ર બે મજબૂત બેટ્સમેન બાકી છે, બી સાઈ સુદર્શન અને વિકેટકીપર કોના ભરત બચ્યા છે. ઓપનર સુદર્શન 53 રન બનાવીને રમી રહ્યો છે જ્યારે ભરત હવે બેટિંગ કરવા ઉતરશે. સરફરાઝ ખાન (67 બોલમાં 55 રન) સારા ફોર્મમાં દેખાઈ રહ્યો હતો પરંતુ તેને મોટા સ્કોરમાં બદલી શક્યો ન હતો.

આ પહેલાં ઇંગ્લેન્ડ લાયન્સના બેટ્સમેનોએ સ્પિનરો માનવ સુતાર અને પુલકિત નારંગ સામે ઝડપી રન બનાવ્યા બાદ 29 ઓવરમાં છ વિકેટે 163 રન પર બીજી ઇનિંગ ડિકલેર કરી હતી. પ્રથમ ઇનિંગમાં 154 રનની શાનદાર સદી ફટકારનાર કીટન જેનિંગ્સે બીજી ઇનિંગમાં 65 બોલમાં 64 રન બનાવ્યા હતા. તેણે જેમ્સ રિયુ સાથે 95 રનની ભાગીદારી કરી હતી, જેમ્સ રિયુએ 61 બોલમાં 56 રનની અડધી સદી ફટકારી હતી.

દિવસની શરૂઆતમાં ભારતીય ટીમ 227 રનમાં સમેટાઈ ગઈ હતી જેમાં રજત પાટીદારે 151 રન બનાવ્યા હતા. ત્યાર બાદ લક્ષ્યનો પીછો કરવા આવેલા ઈન્ડિયા 'A' ટીમના કેપ્ટન ઈશ્વરન ફાસ્ટ બોલર મેથ્યુ પોટ્સના બોલને અડ્યો અને સ્ટમ્પની પાછળ વિકેટકીપર ઓલી રોબિન્સનના હાથે કેચ આઉટ થયો. ઇશ્વરન ઓફ સ્ટંપની ઉપર જતા બોલ પ્રત્યે અસહજ થઇ જાય છે જે જગજાહેર છે. તે લાંબા સમયથી ભારતીય ટીમમાં સ્થાન મેળવવાની રેસમાં છે પરંતુ મોટી તક પર તેમની નિષ્ફતા જ તેમના માટે મોટું વિઘ્ન બને છે.