ಸಿನಿಮಾ ನಿರ್ಮಿಸಲು ಸಾಲ ಪಡೆದ ಸಹೋದರನಿಂದ ಕೊಲೆ ಬೆದರಿಕೆ : ಪೊಲೀಸ್ ಠಾಣೆ ಮೆಟ್ಟಿಲೇರಿದ ನಾಯಕ ನಟ

ಬೆಂಗಳೂರು : ಚಲನಚಿತ್ರ ನಿರ್ಮಿಸಲು ಸಾಲ ಪಡೆದ ಸಹೋದರ ಹಣ ವಾಪಸ್ ನೀಡದೇ ಜೀವ ಬೆದರಿಕೆ ಹಾಕುತ್ತಿದ್ದಾನೆ ಎಂದು ಆರೋಪಿಸಿ ಉದಯೋನ್ಮುಖ ನಟನೊಬ್ಬ ಪೊಲೀಸ್ ಠಾಣೆ ಮೆಟ್ಟಿಲೇರಿದ್ದಾರೆ. ನಾಯಕ ನಟ, ನಿರ್ದೇಶಕನಾಗಿ ಗುರುತಿಸಿಕೊಂಡಿರುವ ರೂಪೇಶ್ ಎಂಬುವವರು ತಮ್ಮ ಸಹೋದರ ಗಿರೀಶ್ ಎಂಬಾತನ ವಿರುದ್ಧ ಮಹಾಲಕ್ಷ್ಮಿ ಲೇಔಟ್ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ.

ಆರೋಪಿ ಗಿರೀಶ್, 2014 - 19ರ ಅವಧಿಯಲ್ಲಿ ʼಸಾರೀ ಕಣೇʼ ಹಾಗೂ ʼಧೂಳೀಪಟʼ ಎಂಬ ಹೆಸರಿನ ಎರಡು ಚಿತ್ರಗಳ ನಿರ್ಮಿಸಿದ್ದರು.‌ ಎರಡೂ ಚಿತ್ರಗಳಿಗೆ ಗಿರೀಶ್ ಸಹೋದರ ರೂಪೇಶ್ ನಾಯಕನಟನಾಗಿ, ನಿರ್ದೇಶಕನಾಗಿ ಕೆಲಸ ಮಾಡಿದ್ದ. ಚಿತ್ರೀಕರಣದ ವೇಳೆ ಹಣವಿಲ್ಲ ಎಂದಿದ್ದ ಗಿರೀಶ್ ರೂಪೇಶ್ ನಿಂದ 33 ಲಕ್ಷ ಸಾಲ ಪಡೆದುಕೊಂಡಿದ್ದನಂತೆ.

ಇದನ್ನೂ ಓದಿ: ಕರೆಂಜಿತ್ ಕೌರ್ ʼಸನ್ನಿ ಲಿಯೋನ್‌ʼ ಆಗಿದ್ದೇಗೆ..! ಯುವಕರ ಹೃದಯದೊಡತಿಯ ಲೈಫ್‌ ಕಹಾನಿ

ಅಲ್ಲದೇ ರೂಪೇಶ್ ನನ್ನ ಸಾಕ್ಷಿಯಾಗಿರಿಸಿಕೊಂಡು ಬೇರೆ ಬೇರೆ ವ್ಯಕ್ತಿಗಳಿಂದ ಒಟ್ಟು 1 ಕೋಟಿ 10 ಲಕ್ಷ ರೂ ಸಾಲ ಪಡೆದಿದ್ದನಂತೆ. ಆದರೆ ಎರಡು ಸಿನಿಮಾನಗಳು ಮಕಾಡೆ ಮಲಗಿದ್ದವು. ಹೀಗಾಗಿ ಲಾಸ್ ಸಹ ಆಗಿತ್ತು.‌  ನಂತರ ಗಿರೀಶ್ ಬಳಿ ರೂಪೇಶ್ ಹಣ ವಾಪಾಸ್ ಕೇಳಿದರೆ ಕೊಲ್ಲುವುದಾಗಿ ಬೆದರಿಕೆ ಹಾಕಿದ್ದಾನೆ ಎಂದು  ಗಿರೀಶ್ ವಿರುದ್ಧ ದೂರಿನಲ್ಲಿ ಆರೋಪಿಸಲಾಗಿದೆ. 

ಇದಲ್ಲದೇ ಗಿರೀಶ್ ತನ್ನ ಸ್ನೇಹಿತರಾದ ಅಂಜುಂ, ವಿ.ಕೆ‌.ಮೂರ್ತಿ ಹಾಗೂ ಮೋಹನ್ ಎಂಬುವವರಿಂದ ಕರೆ ಮಾಡಿಸಿ 'ನೀನು ಹಣ ನೀಡಿಯೇ ಇಲ್ಲ ಎಂದು ಬರೆದುಕೊಡಬೇಕು' ಎಂದು ಬೆದರಿಕೆ ಹಾಕಿಸುತ್ತಿದ್ದಾನೆ ಎಂದು ಆರೋಪಿಸಲಾಗಿದೆ. ಸದ್ಯ ರೂಪೇಶ್ ನೀಡಿದ ದೂರಿನ ಆಧಾರದ ಮೇಲೆ ಗಿರೀಶ್ ಹಾಗೂ ಆತನ ಸ್ನೇಹಿತರಾದ ಅಂಜುಂ, ವಿ.ಕೆ‌.ಮೂರ್ತಿ, ಮೋಹನ್ ವಿರುದ್ಧ  ಮಹಾಲಕ್ಷ್ಮಿ ಲೇಔಟ್ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.