ವಿವಾದಿತ ನಕ್ಷೆ ಅನುಮೋದಿಸಿ ಭಾರತದ ಈ ಪ್ರದೇಶಗಳನ್ನು ತನ್ನ ಪಾಲು ಎಂದ ನೇಪಾಳ

ನೆರೆಯ ರಾಷ್ಟ್ರ ನೇಪಾಳ (Nepal) ತನ್ನ ದೇಶದ ಹೊಸ ವಿವಾದಿತ ನಕ್ಷೆಯನ್ನು ಅನುಮೋದಿಸಿದೆ.

ನವದೆಹಲಿ: ಭಾರತದ ಗಡಿಯಲ್ಲಿನ ಮೂರು ಪ್ರದೇಶಗಳನ್ನು ತನ್ನ ಪ್ರದೇಶ ಎಂದು  ಬಿಂಬಿಸುವ ಹೊಸ ವಿವಾದಾತ್ಮಕ ನಕ್ಷೆಯನ್ನು ನೆರೆಯ ನೇಪಾಳ ಅನುಮೋದಿಸಿದೆ. ಪ್ರಧಾನಿ ಕೆ.ಪಿ. ಶರ್ಮಾ ಒಲಿ ನೇತೃತ್ವದ ಸಂಪುಟ ಸಭೆಯಲ್ಲಿ ವಿವಾದಿತ ನಕ್ಷೆಯನ್ನು ಸೋಮವಾರ ಅನುಮೋದಿಸಲಾಗಿದೆ.

ನೇಪಾಳ (Nepal) ಸರಕಾರ ಬಿಡುಗಡೆ ಮಾಡಿರುವ ಹೊಸ ನಕ್ಷೆಯ ಪ್ರಕಾರ ಲಿಂಪಿಯಾಧುರಾ, ಲಿಪುಲೆಖ್ ಮತ್ತು ಕಲಾಪಾನಿ ನೇಪಾಳಕ್ಕೆ ಸೇರಿದವು ಎಂದು ತೋರಿಸಲಾಗಿದೆ. ಆದರೆ ವಾಸ್ತವವಾಗಿ ಈ ಪ್ರದೇಶಗಳು ಭಾರತದ ಗಡಿಯೊಳಗೆ ಇರುವ ಪ್ರದೇಶಗಳಾಗಿವೆ.

ಕಳೆದ ವಾರ ನೇಪಾಳ ಅಧ್ಯಕ್ಷರು, ಸಂಸತ್ತಿನ ಜಂಟಿ ಅಧಿವೇಶನವನ್ನು ಉದ್ದೇಶಿಸಿ ಮಾತನಾಡುತ್ತಾ ದೇಶದ ಹೊಸ ನಕ್ಷೆಯು ನಾವು ನಮ್ಮದೇ ಎಂದು ಪರಿಗಣಿಸುವ ಪ್ರದೇಶಗಳನ್ನು ತೋರಿಸುತ್ತದೆ ಎಂದು ಹೇಳಿದ್ದರು. ಅಧ್ಯಕ್ಷ ಬಿದ್ಯಾ ದೇವಿ ಭಂಡಾರಿ ಮಾತನಾಡಿ ಲಿಂಪಿಯಾಧುರಾ, ಲಿಪುಲೆಖ್ ಮತ್ತು ಕಲಾಪಣಿ ಪ್ರದೇಶಗಳು ನೇಪಾಳದಲ್ಲಿ ಬರುತ್ತವೆ ಮತ್ತು ಅವುಗಳನ್ನು ಪುನರ್ವಸತಿ ಮಾಡಲು ಸಹ ದೃಢವಾದ ಕ್ರಮಗಳನ್ನು ತೆಗೆದುಕೊಳ್ಳಲಾಗುವುದು. ಈ ಎಲ್ಲ ಪ್ರದೇಶಗಳನ್ನು ನೇಪಾಳದ ಅಧಿಕೃತ ನಕ್ಷೆಯಲ್ಲಿ ಸೇರಿಸಲಾಗುವುದು ಎಂದು ಅವರು ಹೇಳಿದ್ದರು.

ಇತ್ತೀಚೆಗೆ ರಕ್ಷಣಾ ಸಚಿವ ರಾಜನಾಥ್ ಸಿಂಗ್ (Rajnath Singh) ಅವರು ಧಾರ್ಚುಲಾದಿಂದ ಲಿಪುಲೆಖ್ವರೆಗಿನ ಹೊಸ ರಸ್ತೆಯನ್ನು ಉದ್ಘಾಟಿಸಿದರು.  ಈ ರಸ್ತೆಯ ಮೂಲಕ ಕೈಲಾಶ್ ಮಾನಸರೋವರಕ್ಕೆ ಹೋಗುವ ಯಾತ್ರಿಕರು ಕಡಿಮೆ ಸಮಯ ತೆಗೆದುಕೊಳ್ಳುತ್ತಾರೆ ಎಂದು ಅವರು ತಿಳಿಸಿದ್ದರು. ಆದರೆ ಇದಕ್ಕೆ  ಕಠ್ಮಂಡು ವಿರೋದ ವ್ಯಕ್ತಪಡಿಸಿತ್ತು.

 ನಂತರ ನೇಪಾಳದ ವಿದೇಶಾಂಗ ಸಚಿವ ಪ್ರದೀಪ್ ಕುಮಾರ್ ಗಯಾವಲಿ ಅವರು ಭಾರತದ ರಾಯಭಾರಿ ವಿನಯ್ ಮೋಹನ್ ಕ್ವಾತ್ರಾ ಅವರೊಂದಿಗೆ ಈ ವಿಷಯವನ್ನು ಕೈಗೆತ್ತಿಕೊಂಡರು. ಈ ನಿಟ್ಟಿನಲ್ಲಿ ಭಾರತವು ಜವಾಡಾದಲ್ಲಿ ತನ್ನ ಸ್ಥಾನವನ್ನು ಸ್ಪಷ್ಟಪಡಿಸಿತು ಮತ್ತು ಉತ್ತರಾಖಂಡದ ಪಿಥೋರಗಢ ಜಿಲ್ಲೆಯಲ್ಲಿ ನಿರ್ಮಿಸಲಾದ ಸಂಪೂರ್ಣ ರಸ್ತೆ ಭಾರತದ ಭೂಪ್ರದೇಶದಲ್ಲಿದೆ ಎಂಬುದನ್ನು ಸಾಬೀತುಪಡಿಸಿತ್ತು. ಆದಾಗ್ಯೂ ನೇಪಾಳ ಮತ್ತೆ ವಿವಾದಿತ ನಕ್ಷೆಗೆ ಅನುಮೋದನೆ ನೀಡಿದೆ.

ವಾಸ್ತವವಾಗಿ ಭಾರತ ಮತ್ತು ನೇಪಾಳ ನಡುವೆ ನಡೆಯುತ್ತಿರುವ ವಿವಾದ (ಭಾರತ-ನೇಪಾಳ ವಿವಾದ) ಹೊಸದಲ್ಲ. 1816 ರಲ್ಲಿ ಸುಗಾಲಿ ಒಪ್ಪಂದದ ಪ್ರಕಾರ ನೇಪಾಳದ ರಾಜನು ಕಲಾಪಣಿ ಮತ್ತು ಲಿಪುಲೆಖ್ ಸೇರಿದಂತೆ ತನ್ನ ಕೆಲವು ಪ್ರದೇಶಗಳನ್ನು ಬ್ರಿಟಿಷರಿಗೆ ಹಸ್ತಾಂತರಿಸಿದನು.