ಬೆಂಗಳೂರು: 2018 ರ ಚುನಾವಣೆಗೆ ರಾಜ್ಯದಲ್ಲಿ ಭಾರಿ ಸಿದ್ದತೆ ನಡೆಯುತ್ತಿದ್ದು, ಎಲ್ಲಾ ಪಕ್ಷಗಳೂ ತಮ್ಮದೇ ವೈಕರಿಯಲ್ಲಿ ಚುನಾವಣಾ ಪ್ರಚಾರದಲ್ಲಿ ತೊಡಗಿದೆ. ಎಲ್ಲಾ ಪಕ್ಷಗಳಿಗೂ ಈ ಚುನಾವಣೆ ಪ್ರತಿಷ್ಠೆಯ ಕದನವಾಗಿದ್ದು, ರಾಜಕೀಯ ಪಕ್ಷಗಳೂ ತನ್ನ ಅಭ್ಯರ್ಥಿಗಳ ಆಯ್ಕೆಯಲ್ಲಿ ಬಹಳ ಎಚ್ಚರಿಕೆಯಿಂದ ಮುನ್ನಡೆಯುತ್ತಿವೆ. ಅದೇ ನಿಟ್ಟಿನಲ್ಲಿ ಜೆಡಿಎಸ್ ಬೆಂಗಳೂರಿನ ಹತ್ತಕ್ಕೂ ಹೆಚ್ಚು ವಿಧಾನಸಭಾ ಕ್ಷೇತ್ರಗಳಲ್ಲಿ ತನ್ನ ಅಭ್ಯರ್ಥಿಗಳನ್ನು ಅಂತಿಮಗೊಳಿಸಿದೆ.
ಮೂಲಗಳು ನೀಡಿರುವ ಮಾಹಿತಿಯ ಪ್ರಕಾರ ಚಿಕ್ಕಪೇಟೆ ವಿಧಾನ ಸಭಾ ಕ್ಷೇತ್ರದಿಂದ MLC ಟಿ.ಎ. ಶರವಣ ಸ್ಪರ್ಧಿಸಲಿದ್ದಾರೆ. ಅಲ್ಲದೆ ಪದ್ಮನಾಭನಗರದಿಂದ- ವಿ.ಕೆ. ಗೋಪಾಲ್, ಬಸವನಗುಡಿಯಿಂದ- ಬಾಗೆಗೌಡ, ಗಾಂಧಿ ನಗರದಿಂದ- ಸರ್ವೋದಯ ನಾರಾಯಣಸ್ವಾಮಿ, ಯಲಹಂಕದಿಂದ - ನಿವೃತ್ತ ಎಸಿಪಿ, ಕೃಷ್ಣಪ್ಪ, ಹೆಬ್ಬಾಳ ಕ್ಷೇತ್ರದಿಂದ- ಹನುಮಂತೇಗೌಡ, ಮಹಾಲಕ್ಷ್ಮಿ ಲೇಔಟ್ ನಿಂದ - ಗೋಪಾಲಯ್ಯ, ಗೋವಿಂದರಾಜನಗರದಿಂದ - ರಂಗೇಗೌಡ, ಸರ್ವಜ್ಞನಗರದಿಂದ - ಅನ್ವರ್ ಷರೀಫ್, ಸಿ.ವಿ. ರಾಮನ್ ನಗರದಿಂದ - ಎಸ್ ಎಮ್ ಬಸವರಾಜು, ಬ್ಯಾಟರಾಯನಪುರದಿಂದ - ಟಿ.ಜಿ. ಚಂದ್ರ, ರಾಜಾಜಿನಗರದಿಂದ- ಆನಂದ್ (ಪ್ರಸನ್ನ ಥೀಯೇಟರ್ ಮಾಲಿಕ) ಮತ್ತು ಮಹದೇವಪುರದಿಂದ- ಸತೀಶ್ ಅವರಿಗೆ ಟಿಕೇಟ್ ಸಿಗಲಿದೆ ಎಂದು ತಿಳಿದುಬಂದಿದೆ.
ಜೆಡಿಎಸ್ ವರಿಷ್ಠರು, ಜೆಡಿಎಸ್ ನ ರೆಬೆಲ್ಸ್ ಕ್ಷೇತ್ರಗಳಾದ ಚಾಮರಾಜಪೇಟೆ ಹಾಗೂ ಪುಲಕೇಶಿನಗರ ವಿಧಾನ ಕ್ಷೇತ್ರದ ಟಿಕೆಟ್ ಇನ್ನೂ ಅಂತಿಮ ಗೊಳಿಸಿಲ್ಲ ಎಂದು ಹೇಳಲಾಗಿದೆ.
