Bengaluru Rameshwaram Cafe Blast: ബെം​ഗളൂരു സ്ഫോടനത്തിൽ ഒരാൾ കസ്റ്റഡിയിൽ

Rameshwaram Cafe Blast Case: നേരത്തെ തന്നെ 28 നും 30 നും ഇടയിൽ പ്രായമുള്ളയാളാണ് ബാ​ഗ് കഫെയിൽ കൊണ്ടുവച്ചതെന്ന സൂചന അന്വേഷണ സംഘത്തിന് ലഭിച്ചിരുന്നു. ഇയാൾ കഫെയിൽ നിന്ന് ഭക്ഷണം ഓർഡ‍ർ ചെയ്തുവെങ്കിലും അത് കഴിക്കാതെ ബാ​ഗ് കഫെയിൽ വച്ച് സ്ഥലം വിടുകയായിരുന്നു

ബെംഗളൂരു: ബെംഗളൂരു രാമേശ്വരം കഫേയിലുണ്ടായ സ്ഫോടനത്തിൽ ഒരാൾ കസ്റ്റഡിയിലായതായി റിപ്പോർട്ട്. കസ്റ്റഡിയിലായത് ബെംഗളൂരു സ്വദേശിയാണ്.  ഇയാളെ കുറിച്ചുള്ള കൂടുതൽ വിവരങ്ങൾ പോലീസ് പുറത്ത് വിട്ടിട്ടില്ല. സെൻട്രൽ ക്രൈം ബ്രാഞ്ച് ഇയാളെ ചോദ്യം ചെയ്യുന്നുണ്ട്. 

നേരത്തെ തന്നെ 28 നും 30 നും ഇടയിൽ പ്രായമുള്ളയാളാണ് ബാ​ഗ് കഫെയിൽ കൊണ്ടുവച്ചതെന്ന സൂചന അന്വേഷണ സംഘത്തിന് ലഭിച്ചിരുന്നു. ഇയാൾ കഫെയിൽ നിന്ന് ഭക്ഷണം ഓർഡ‍ർ ചെയ്തുവെങ്കിലും അത് കഴിക്കാതെ ബാ​ഗ് കഫെയിൽ വച്ച് സ്ഥലം വിടുകയായിരുന്നു എന്നായിരുന്നു റിപ്പോർട്ട്. ഇതിനിടയിൽ കുന്ദലഹള്ളിയിലുള്ള രമേശ്വരം കഫേയിലുണ്ടായത് ബോംബ് സ്‌ഫോടനമാണെന്ന് സിദ്ധരാമയ്യ സ്ഥിരീകരിച്ചിരുന്നു. തീവ്രത കുറഞ്ഞ ഐഇഡി സ്‌ഫോടനമാണെന്ന് സംശയിക്കുന്നുവെന്നും അദ്ദേഹം ഇന്നലെ പറഞ്ഞിരുന്നു.  സ്ഫോടനത്തിൽ പരിക്കേറ്റ 9 പേർ ചികിത്സയിലാണ്. 

സ്ഫോടനമുണ്ടായത് വൈറ്റ്ഫീല്‍ഡിലെ രാമേശ്വരം കഫേയിലാണ്. എന്താണ് സംഭവിച്ചത് എന്ന് വിശദമായി പരിശോധിക്കുകയാണെന്നും സിസിടിവി ദൃശ്യങ്ങൾ അടക്കം ശേഖരിച്ചിട്ടുണ്ടെന്നും അപ്പോൾ തന്നെ റിപ്പോർട്ട് വന്നിരുന്നു. ഇതിനിടയിൽ സ്ഫോടനത്തിൻ്റെ സിസിടിവി ദൃശ്യങ്ങൾ പുറത്തുവന്നു. ആ ദൃശ്യങ്ങളിൽ നിന്നും ഗ്യാസ് ലീക്ക് സംഭവിച്ചതല്ലെന്ന് വ്യക്തമാണ്. ആളുകൾ ചിതറി ഓടുന്നതും സിസിടിവി ദൃശ്യങ്ങളില്‍ കാണാം. നല്ല ആൾത്തിരക്കുള്ള ഇടത്താണ് സ്ഫോടനം നടന്നത്.  ഇതിനിടയിൽ കഫേയിലുണ്ടായ സ്‌ഫോടനത്തിൽ ഭീകരവിരുദ്ധ നിയമമായ യു.എ.പി.എ. പ്രകാരം കേസ് രജിസ്റ്റര്‍ ചെയ്തിട്ടുണ്ട്.