POCSO case: പോക്‌സോ കേസ്: നടൻ കൂട്ടിക്കൽ ജയചന്ദ്രൻ ഒളിവിൽ

Kootickal Jayachandran: താമസ സ്ഥലവും സുഹൃത്തുക്കളുടെയും ബന്ധുക്കളുടെയും വീട്ടിൽ ഇദ്ദേഹത്തിനായി പരിശോധന നടത്തിയിരുന്നുവെന്നാണ് പോലീസ് പറയുന്നത്.

കോഴിക്കോട്: പോക്‌സോ കേസിലുൾപ്പെട്ട നടനും ഹാസ്യ കലാകാരനുമായ കൂട്ടിക്കൽ ജയചന്ദ്രൻ ഒളിവിലെന്ന് പോലീസ് റിപ്പോർട്ട്. പരാതിയിൽ കേസെടുത്തതോടെ നടൻ ഒളിവിൽപ്പോവുകയായിരുന്നുവെന്നാണ് കസബ പോലീസ് പറഞ്ഞത്. 

താമസ സ്ഥലവും സുഹൃത്തുക്കളുടെയും ബന്ധുക്കളുടെയും വീട്ടിൽ ഇദ്ദേഹത്തിനായി പരിശോധന നടത്തിയിരുന്നുവെന്നാണ് പോലീസ് പറയുന്നത്. നിലവിൽ ഇദ്ദേഹത്തിന്റെ മൊബൈൽ ഫോൺ സ്വിച്ച് ഓഫാണെന്നും എവിടെയാണ് ഒളിവിലെന്നതു സംബന്ധിച്ച ഒരുസൂചനയും ഇതുവരെ ലഭിച്ചിട്ടില്ലെന്നും പോലീസ് വ്യക്തമാക്കി.

അന്വേഷണം തുടരുന്നതിനിടെ കോഴിക്കോട് പോക്‌സോ കോടതിയിൽ കൂട്ടിക്കൽ ജയചന്ദ്രൻ ജാമ്യാപേക്ഷ നൽകിയിരുന്നുവെങ്കിലും  ജൂലായ്‌ 12 ന് ജാമ്യാപേക്ഷ തള്ളിയിരുന്നു. പിന്നീട് മുൻകൂർ ജാമ്യാപേക്ഷയുമായി അദ്ദേഹം  ഹൈക്കോടതിയെ സമീപിച്ചിരുന്നു. ഈ ഹർജിയിൽ അടുത്തയാഴ്ചയാണ് വാദം കേൾക്കലിന് വച്ചിരിക്കുന്നത്.

നാലു വയസുകാരിയെ പീഡിപ്പിച്ചെന്ന പരാതിയിലാണ് നടനെതിരെ കേസെടുത്തിരിക്കുന്നത്. കുട്ടിയുടെ അമ്മയുടെ പരാതിയിൽ കസബ പോലീസാണ് കേസെടുത്തത്. കുടുംബ തർക്കങ്ങൾ മുതലെടുത്ത് നടൻ കുഞ്ഞിനെ പീഡിപ്പിക്കുകയായിരുന്നുവെന്നാണ് പരാതിയിൽ ആരോപിച്ചിരിക്കുന്നത്. ജില്ലാ ചൈൽഡ് പ്രൊട്ടക്ഷൻ യൂണിറ്റിന്റെ നിർദ്ദേശത്തെ തുടർന്ന് പോലീസ് കുട്ടിയുടെ മൊഴിയെടുത്തിട്ടുണ്ട്. വീട്ടിലെത്തിയാണ് കുട്ടിയുടെ മൊഴിയെടുത്തത്.