ന്യൂഡല്ഹി: ജമ്മു-കാഷ്മീര് വിഷയത്തില് ഇന്ത്യക്കെതിരായ നടത്തിയ നീക്കത്തില് പാക്കിസ്ഥാന് രാഹുല് ഗാന്ധിയുടെ പേര് വലിച്ചിഴച്ചെന്ന ആരോപണവുമായി കോണ്ഗ്രസ്.
പാക്കിസ്ഥാന് രാഹുലിന്റെ മുന് പ്രസ്താവന തെറ്റായി വ്യാഖ്യാനിച്ചതായും ഐക്യരാഷ്ട്രസഭയ്ക്ക് പാക്കിസ്ഥാന് നല്കിയ പരാതിയിലാണ് രാഹുലിന് പാക് അനുകൂല നിലപാടെന്ന് തെറ്റിദ്ധരിപ്പിച്ചതെന്നും എഐസിസി വക്താവ് രണ്ദീപ് സുര്ജെവാല പറഞ്ഞു. ഐക്യരാഷ്ട്രസഭയെയും ലോകത്തെയും തെറ്റിദ്ധരിപ്പിക്കാനുള്ള നീക്കമാണിതെന്നും എഐസിസി വക്താവ് വിശദമാക്കി.
ജമ്മു, കശ്മീര്, ലഡാക് എന്നിവ ഇന്ത്യയുടെ ഭാഗമായിരുന്നെന്ന കാര്യത്തില് ആര്ക്കും സംശയം വേണ്ട. അതിപ്പോഴും അങ്ങനെതന്നെയാണ്. എപ്പോഴും അങ്ങനെയായിരിക്കുകയും ചെയ്യും. പാക്കിസ്ഥാന്റെ നിന്ദ്യമായ പ്രചാരണങ്ങള് കൊണ്ട് ഈ സത്യത്തെ തിരുത്തിക്കുറിക്കാനാവില്ലെന്നും രണ്ദീപ് സുര്ജെവാല കൂട്ടിച്ചേര്ത്തു.
ജമ്മു-കശ്മീര് ഇന്ത്യയുടെ ആഭ്യന്തരകാര്യമാണെന്നും പാക്കിസ്ഥാന് ഉള്പ്പടെയുള്ള വിദേശരാജ്യങ്ങള് ഇക്കാര്യത്തില് ഇടപെടേണ്ടതില്ലെന്നും രാഹുല് ഗാന്ധി രാവിലെ ട്വീറ്റ് ചെയ്തിരുന്നു. ഈ ട്വീറ്റിന്റെ സാഹചര്യം വിശദീകരിക്കുകയായിരുന്നു സുര്ജെവാല.