Cardiac Arrest: മുതിർന്ന ഐപിഎസ്‌ ഉദ്യോഗസ്ഥന്റെ മകൾ ഹോസ്റ്റൽ മുറിയിൽ മരിച്ച നിലയിൽ

UP News: അനികയെ ശനിയാഴ്ച രാത്രിയാണ് ഹോസ്റ്റൽ മുറിയിൽ അബോധാവസ്ഥയിൽ കണ്ടെത്തിയത്. ഏറെ നേരം വിളിച്ചിട്ടും പ്രതികരിക്കാത്തതിനെ തുടർന്ന്‌ മുറിയുടെ വാതിൽ തകർത്താണ് അകത്തു കയറിയത്.

ലഖ്‌നൗ: മുതിർന്ന പോലീസ് ഉദ്യോഗസ്ഥന്റെ മകളെ ഹോസ്റ്റൽ മുറിയിൽ മരിച്ച നിലയിൽ കണ്ടെത്തിയതായി റിപ്പോർട്ട്. ഉത്തർപ്രദേശിലെ ലഖ്‌നൗവിൽ റാം മനോഹർ ലോഹ്യ നാഷണൽ ലോ യൂണിവേഴ്‌സിറ്റിയിലെ വിദ്യാർത്ഥിനി അനിക രസ്തോഗിയാണ് മരിച്ചത്. 

മൂന്നാം വർഷ ബിഎ എൽഎൽബി വിദ്യാർത്ഥിനിയായ അനിക ദേശീയ അന്വേഷണ ഏജൻസിയിൽ (NIA) ഇൻസ്പെക്ടർ ജനറലായ സഞ്ജയ് രസ്തോഗിയുടെ മകളാണ്. 1998 ബാച്ച് മഹാരാഷ്ട്ര കേഡർ ഐപിഎസ് ഉദ്യോഗസ്ഥനാണ് ഈ സഞ്ജയ് രസ്തോഗി.

അനികയെ ശനിയാഴ്ച രാത്രിയാണ് ഹോസ്റ്റൽ മുറിയിൽ അബോധാവസ്ഥയിൽ കണ്ടെത്തിയത്. ഏറെ നേരം വിളിച്ചിട്ടും പ്രതികരിക്കാത്തതിനെ തുടർന്ന്‌ മുറിയുടെ വാതിൽ തകർത്താണ് അകത്തു കയറിയത്. ഉടൻതന്നെ അനികയെ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. ഹൃദയാഘാതമാണ് അനികയുടെ  മരണ കാരണമെന്നാണ് റാം മനോഹർ ലോഹ്യ ആശുപത്രി അറിയിച്ചത്. ഹോസ്റ്റൽ മുറി അകത്തുനിന്നും പൂട്ടിയിരിക്കുകയായിരുന്നെന്നും സംശയാസ്പദമായി ഒന്നും കണ്ടെത്താനായില്ലെന്നും പോലീസ് പറഞ്ഞു. പോസ്റ്റ്‌മോർട്ടം റിപ്പോർട്ടിന്റെ അടിസ്ഥാനത്തിൽ തുടർ നടപടി സ്വീകരിക്കുമെന്നും പെൺകുട്ടിയുടെ കുടുംബം ഇതുവരെ പരാതി നൽകിയിട്ടില്ലെന്നും പോലീസ് അറിയിച്ചു.