M V Govindan: കുഞ്ഞിന് കേരളം സ്നേഹത്തണലൊരുക്കും; സുരേഷ് ​ഗോപിയ്ക്ക് ​മറുപടിയുമായി എം.വി ​ഗോവിന്ദൻ

MV Govindan replies to Suresh Gopi: കുട്ടിക്ക് ചികിത്സ ഉറപ്പാക്കുമെന്ന് ആരോഗ്യ വകുപ്പ് മന്ത്രി വീണാ ജോർജ് നേരിട്ട് അവരെ അറിയിച്ചിട്ടുണ്ടെന്ന് എം.വി ഗോവിന്ദൻ പറഞ്ഞു.

തിരുവനന്തപുരം: അപൂർവ രോഗം ബാധിച്ച രണ്ടു വയസുകാരന് കേരളം സ്നേഹത്തണൽ ഒരുക്കുമെന്ന് സിപിഎം സംസ്ഥാന സെക്രട്ടറി എം.വി ​ഗോവിന്ദൻ. സഹായം ചോദിച്ചുവരുന്നവരെ ആടിയോടിക്കുകയല്ല, ചേർത്തുപിടിക്കുകയാണ് കേരളത്തിന്റെ സംസ്കാരം. ആ കരുതൽ ഉറപ്പാക്കാൻ സർക്കാർ തയ്യാറായിരിക്കുകയാണെന്നും അദ്ദേഹം വ്യക്തമാക്കി. ‌‌

കുട്ടിയുടെ കുടുംബവുമായി ഫോണിൽ സംസാരിച്ച് എല്ലാ പിന്തുണയും വാഗ്ദാനം ചെയ്തു. ഉടൻ തന്നെ അവരെ നേരിൽ കാണാനാകുമെന്നും പ്രതീക്ഷിക്കുന്നു. കുട്ടിക്ക് ചികിത്സ ഉറപ്പാക്കുമെന്ന് ആരോഗ്യ വകുപ്പ് മന്ത്രി വീണാ ജോർജ് നേരിട്ട് അവരെ അറിയിച്ചിട്ടുണ്ട്. കോയമ്പത്തൂര്‍ സ്വദേശിയും മലയാളിയുമായ സിന്ധുവിന്റെ മകന് വേണ്ടിയാണ് അപൂര്‍വ രോഗത്തിനുള്ള വിലപിടിപ്പുള്ള മരുന്ന് ആരോഗ്യ വകുപ്പ് നല്‍കുന്നത്. മലയാളിയുടെ സ്നേഹവും കരുതലും ഒരിക്കൽക്കൂടി ലോകത്തിനു മുമ്പിൽ തെളിമയോടെ നിൽക്കുകയാണെന്നും എം.വി ​ഗോവിന്ദൻ കൂട്ടിച്ചേർത്തു.

നേരത്തെ, ​ഗുരുവായൂരിലെത്തിയ സുരേഷ് ​ഗോപിയോട് സഹായം തേടിയ യുവതിയോട് ​ഗോവിന്ദൻ മാഷേ പോയി കാണാൻ സുരേഷ് ​ഗോപി ആഹ്വാനം ചെയ്തിരുന്നു. ഗുരുവായൂർ ക്ഷേത്ര ദർശനത്തിന് എത്തിയ സുരേഷ് ഗോപി ദർശനം കഴിഞ്ഞ് പ്രസാദ് ഊട്ടിൽ ഭക്ഷണം വിളമ്പുകയും തുടർന്ന് ഭക്ഷണം കഴിച്ച ശേഷം ജനങ്ങളെ നേരിൽ കാണുകയും ചെയ്തിരുന്നു. ഇതിനിടയിലാണ് അപൂർവ രോഗം ബാധിച്ച കുഞ്ഞുമായി യുവതി സുരേഷ് ഗോപിയുടെ അടുത്തെത്തിയത്. എന്നാൽ, യുവതിയോട് ഗോവിന്ദൻ മാഷ് പോയി കാണ് എന്നായിരുന്നു സുരേഷ് ​ഗോപിയുടെ മറുപടി.