Mayor KSRTC Driver Row: മേയർ-കെഎസ്ആർടിസി ഡ്രൈവർ തർക്കം; മേയർക്കെതിരെ കേസെടുക്കാൻ ഉത്തരവ്, നടപടി ഡ്രൈവർ നൽകിയ ഹർജിയിൽ

Case Against Mayor: തിരുവനന്തപുരം ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതിയാണ് കേസെടുക്കാൻ നിർദേശം നൽകിയത്. യദുവിന്റെ പരാതി കോടതി പൊലീസിന് കൈമാറി.

തിരുവനന്തപുരം: മേയർ-കെഎസ്ആർടിസി ഡ്രൈവർ തർക്കത്തിൽ എച്ച്. എൽ യദുവിൻ്റെ ഹർജിയിൽ കേസെടുക്കാൻ നിർദേശം. എഫ്ഐആറിട്ട് കേസ് രജിസ്റ്റർ ചെയ്ത് അന്വേഷിക്കണമെന്ന് പൊലീസിനോട് കോടതി. യദുവിന്റെ പരാതി കോടതി പൊലീസിന് കൈമാറി. തിരുവനന്തപുരം ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതിയാണ് കേസെടുക്കാൻ നിർദേശം നൽകിയത്.

മൂന്ന് ആരോപണങ്ങളാണ് യദു കോടതിയിൽ നൽകിയ ഹർജിയിൽ വ്യക്തമാക്കിയത്. മേയർ ആര്യ രാജേന്ദ്രനും ഭർത്താവും എംഎൽഎയുമായിട്ടുള്ള സച്ചിൻദേവും ഉൾപ്പെടെ അഞ്ച് പേർ ചേർന്ന് ബസ് തടഞ്ഞ് ഔദ്യോഗിക കൃത്യനിർവഹണം തടസ്സപ്പെടുത്തി ട്രിപ്പ് മുടക്കി. മേയർ മോശമായി പെരുമാറി, പൊലീസിൽ രണ്ടു തവണ പരാതി നൽകിയിട്ടും തനിക്കെതിരെ മറ്റൊരു കേസെടുത്തതല്ലാതെ മേയർക്കെതിരെ താൻ നൽകിയ പരാതിയിൽ  അന്വേഷിക്കാൻ പോലീസ് തയ്യാറായില്ല തുടങ്ങിയ ആക്ഷേപങ്ങളാണ് ഹർജിയിൽ ആരോപിച്ചത്.

സമാനമായ സാഹചര്യങ്ങൾ സൂചിപ്പിച്ച് ഡ്രൈവർ യദു ചില കാര്യങ്ങൾ കൂടി ആക്ഷേപമായി ഉയർത്തി. കോടതി കേസ് പരിഗണിച്ചപ്പോൾ യദുവിൻ്റെ അഭിഭാഷകൻ ഇക്കാര്യം രാവിലെ കോടതിയിൽ വ്യക്തമാക്കി. കോടതിയുടെ മേൽനോട്ടത്തിൽ മേയർക്കും എംഎൽഎ സച്ചിൻദേവിനുമെതിരെ അന്വേഷണം വേണമെന്ന് യദു ആവശ്യപ്പെട്ടിരുന്നു.

കൻ്റോൺമെൻ്റ് പൊലീസിലും സിറ്റി പൊലീസ് കമ്മീഷണർക്കും നേരത്തെ പരാതി നൽകിയിരുന്നു. കൻ്റോൺമെൻ്റ് പൊലീസ് പരാതിയിൽ കേസെടുത്തിരുന്നില്ല. സിറ്റി പൊലീസിന് നൽകിയ പരാതി കൻ്റോൺമെൻ്റ് അസിസ്റ്റൻറ് കമ്മീഷണർക്ക് സിറ്റി പൊലീസ് കമ്മീഷണർ അന്വേഷണത്തിനായി കൈമാറിയിരുന്നു. ഇതിൽ കേസന്വേഷണം നടക്കുകയാണ്. 

ആ ഘട്ടത്തിൽ കൂടിയാണ് കോടതിയുടെ നിർദ്ദേശാനുസരണം മേയർക്കും എംഎൽഎക്കും മേയറുടെ സഹോദരൻ, സഹോദരൻ്റെ ഭാര്യ എന്നിവർക്കെതിരെ  പുതിയ എഫ്ഐആർ രജിസ്റ്റർ ചെയ്ത് കൻ്റോൺമെൻ്റ് പൊലീസിന് കേസെടുക്കേണ്ടി വന്നിരിക്കുന്നത്. ഇക്കഴിഞ്ഞ ശനിയാഴ്ചയാണ് മേയർക്കെതിരെ കേസെടുക്കണമെന്ന് ആവശ്യപ്പെട്ട് ഡ്രൈവർ യദു ഫസ്റ്റ് ക്ലാസ് ജുഡീഷ്യൽ മജിസ്ട്രേറ്ററ്റ് കോടതിയിൽ ഹർജി സമർപ്പിച്ചത്.