ചരിത്രം തിരുത്തിയ വിധിയില്‍ വീണ്ടും "ചരിത്ര വിധി", ശബരിമല കേസ് തുറന്ന കോടതിയിലേയ്ക്ക്

 

Last Updated : Nov 13, 2018, 03:56 PM IST
ചരിത്രം തിരുത്തിയ വിധിയില്‍ വീണ്ടും "ചരിത്ര വിധി", ശബരിമല കേസ് തുറന്ന കോടതിയിലേയ്ക്ക്

 

ന്യൂഡല്‍ഹി: ചരിത്രം തിരുത്തിയ വിധിയില്‍ വീണ്ടും "ചരിത്രപരമായ വിധി". ശബരിമല സ്ത്രീ പ്രവേശന കേസ് തുറന്ന കോടതിയിലേയ്ക്ക്. 

ശബരിമല സ്ത്രീ പ്രവേശനത്തില്‍ വീണ്ടും തുറന്ന കോടതിയില്‍ വാദം കേട്ട് തീരുമാനമെടുക്കാനാണ് സുപ്രീം കോടതിയുടെ തീരുമാനം. 

പുനഃപരിശോധനാ ഹര്‍ജികളും ഒപ്പം റിട്ട് ഹര്‍ജികളും ജനുവരി 22ന് സുപ്രീം കോടതി പരിഗണിക്കും. 

വിധിയുമായി ബന്ധപ്പെട്ട് ഇതുവരെ 49 പുനഃപരിശോധനാ ഹര്‍ജികളാണ് സുപ്രീം കോടതിയില്‍ എത്തിയിരിക്കുന്നത്.
ഈ ഹര്‍ജികളെല്ലാം ചീഫ് ജസ്റ്റിസ് രഞ്ജന്‍ ഗോഗോയ് അദ്ധ്യക്ഷനായ അഞ്ചംഗ ഭരണഘടനാ ബഞ്ച് ചേംബറില്‍ പരിഗണിച്ചിരുന്നു.

പുനഃപരിശോധനാ ഹര്‍ജികള്‍ തുറന്ന കോടതിയില്‍ കേള്‍ക്കണമെന്ന ആവശ്യം രാവിലെ സുപ്രീംകോടതി തള്ളിയിരുന്നു. രാവിലെ പത്തരയ്ക്ക് ചീഫ് ജസ്റ്റിസ് അദ്ധ്യക്ഷനായ ബഞ്ചിലാണ് ഹര്‍ജികള്‍ തുറന്ന കോടതിയില്‍ പരിഗണിക്കണമെന്ന് ഹര്‍ജിക്കാരുടെ അഭിഭാഷകന്‍ ആവശ്യപ്പെട്ടത്. 

എന്നാല്‍ ചേംബറില്‍ പരിഗണിയ്ക്കാന്‍ തീരുമാനിച്ച ഹര്‍ജികള്‍ തുറന്ന കോടതിയില്‍ പരിഗണിക്കാനുള്ള സാഹചര്യമില്ലെന്ന് ചീഫ് ജസ്റ്റിസ് ചൂണ്ടിക്കാട്ടി. നേരത്തെ വ്യക്തമാക്കിയത് പോലെ ഹര്‍ജികള്‍ ചേംബറില്‍ത്തന്നെ പരിഗണിക്കുമെന്നും ചീഫ് ജസ്റ്റിസ് രഞ്ജന്‍ ഗോഗോയ് വ്യക്തമാക്കി.

സുപ്രീംകോടതി വിധി വന്നതിനു ശേഷം പുനഃപരിശോധനാ ഹര്‍ജികള്‍ പരിഗണിച്ച് വീണ്ടും തുറന്ന കോടതിയില്‍ വാദം നടന്ന കേസുകള്‍ തന്നെ വളരെ വിരളമാണ്. 

 

Trending News